Biełaruska adkryła škołu dla ślapych dziaciej u indyjskaj hłybincy
Užo 11 hadoŭ biełaruska Śviatłana žyvie ŭ nievialikim indyjskim horadzie Kuč-Bichar u štacie Zachodniaja Bienhalija. Razam z mužam Radžam jana kiruje dabračynnaj škołaj dla nieviduščych dziaciej i dziaciej z asablivaściami psichafizičnaha raźvićcia. Jak uładkavana žyćcio škoły, jana raskazała časopisu chryścijan jevanhielskaj viery «Błahodať».
Śviatłana Saŭčuk naradziłasia i vyrasła ŭ Biełarusi. Pavodle jaje słoŭ, jana z malenstva maryła pra misijanierskuju dziejnaść i ŭ vyniku zmahła realizavać hetaje žadańnie. Ciapier jana z mužam Radžam i dačkoj Amielijaj žyvie ŭ horadzie Kuč-Bichar u indyjskim štacie Zachodniaja Bienhalija (stalica — Kalkuta), jaki znachodzicca na ŭschodzie krainy.
U Kuč-Bichary muž Śviatłany kiruje chryścijanskaj škołaj dla nieviduščych dziaciej i dziaciej sa składanymi psichafizičnymi parušeńniami. Pa słovach žančyny, u miascovych umovach takija dzieci — samaja nieabaronienaja katehoryja. Bolšaść ich baćkoŭ žyvuć u hłybokaj halečy: časta jany vychodziać ranicaj z domu, nie viedajučy, ci ŭdasca im zarabić choć niešta na ježu da viečara.
Jak śćviardžaje Śviatłana, hadavać dzicia z asablivaściami va ŭmovach hłybokaj halečy i nizkaj adukavanaści — zadača amal nievykanalnaja. U siemjaŭ niama hrošaj na miedycynu i śpiecyjalnuju adukacyju, tamu biez dapamohi škoły takija dzieci ŭ realnym žyćci byli b asudžanyja stać žabrakami.
Ich ustanova zarehistravanaja jak dabračynnaja arhanizacyja. Jana daje vychavancam mahčymaść vučycca i stanavicca samastojnymi členami hramadstva. Žančyna padkreślivaje, što škoła nie biare z baćkoŭ hrošy za navučańnie.
Zaraz pad apiekaj Śviatłany i Radža znachodziacca 70 čałaviek — ad małodšaha da starejšaha školnaha ŭzrostu. Žančyna raspaviadaje, što zvyčajna vychavancy žyvuć u chostele dziesiać miesiacaŭ u hodzie. Adnak sustrakajucca i tyja, ad kaho baćki praz haleču faktyčna admovilisia.
Śviatłana zhadvaje vypadak, kali baćka adnaho z chłopčykaŭ prosta skazaŭ, što nie čakaje syna dadomu na kanikuły, bo nie zmoža prakarmić jaho. U takich situacyjach škoła stanovicca dla dziciaci adzinym pastajannym domam.
Jak pracuje škoła
Pavodle Śviatłany, navučańnie ŭ škole arhanizavana ŭ niekalki etapaŭ. Da vośmaha kłasa dzieci atrymlivajuć adukacyju niepasredna ŭ ich ustanovie. Paśla hetaha jany zastajucca žyć u chostele, ale praciahvajuć navučańnie ŭžo ŭ zvyčajnych haradskich inkluziŭnych škołach. Žančyna tłumačyć, što heta nieabchodna dla sacyjalizacyi: dzieciam važna navučycca žyć siarod viduščych ludziej, a nie tolki ŭ zakrytaj supolnaści nieviduščych.
Kali dazvalajuć finansy, najlepšym vučniam dapamahajuć pastupić u kaledž. Dla astatnich padbirajuć kursy, kab jany mahli asvoić rabočuju prafiesiju i zarablać na žyćcio ŭłasnymi rukami.
Jak adznačaje Śviatłana, siarod ich vypusknikoŭ užo jość nastaŭniki, supracoŭniki pošty i bankaŭ, a taksama fizijaterapieŭty. Pavodle jaje słoŭ, heta najlepšy adkaz na pytańnie, ci jość u takich dziaciej budučynia.
Sama Śviatłana zajmajecca pošukam finansavańnia, kamunikacyjaj sa sponsarami i padrychtoŭkaj spravazdač. Akramia taho, jana kuryruje dva raźvivajučyja prajekty.
Pieršy — heta piakarnia, dzie jana razam ź nieviduščymi dziaŭčatami vučycca piačy chleb, kieksy i bułački. Žančyna zaŭvažaje, što pakul heta bolš navučalny prajekt, ale časam źjaŭlajucca i sapraŭdnyja zakazy. Kali dziaŭčaty atrymlivajuć za svaju pracu apłatu, heta natchniaje ich pracavać jašče bolš staranna.
Druhi prajekt — «škoła viazańnia kručkom». Pavodle Śviatłany, mnohija navat nie ŭjaŭlajuć, jakija navyki zdolnyja asvoić nieviduščyja ludzi. Ciapier u jaje hrupie dziesiać dziaŭčat, čatyry ź jakich całkam nie bačać. Jany vyrablajuć nievialikija sumački dla mabilnych telefonaŭ, jakija płanujuć pradavać.
Składanaści: ad pobytu da ideałohii
Žančyna apisvaje žyćcio ŭ chostele jak isnavańnie adnoj vialikaj siamji. U joj, jak jana kaža, byvaje ŭsiakaje: niechta pabiŭsia, niechta zachvareŭ, niechta atrymaŭ traŭmu ci nie spraviŭsia z ekzamienami. Adnak jość i bolš surjoznyja vykliki.
Škoła maje chryścijanski ŭchił, choć 90% vučniaŭ — ź induisckich siemjaŭ. Pa słovach Śviatłany, heta časam stvaraje napružanaść. Žančyna zhadvaje vypadki emacyjnaha cisku na dziaciej z boku svajakoŭ z-za roznych relihijnych pohladaŭ. Taksama jana adznačaje, što ahulnaja situacyja ŭ rehijonie ŭskładniajecca praz uzmacnieńnie cisku na relihijnyja mienšaści.
Niahledziačy na ŭsie ciažkaści, Śviatłana i Radž praciahvajuć pracu, jakaja dla ich źjaŭlajecca hałoŭnaj spravaj žyćcia.
Ciapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek33
Kamientary
pavaha biełaruscy