Ludzi ŭ Kijevie zahinuli, kali biehli va ŭkryćci i dapamahčy paranienym
U noč na 1 žniŭnia rasijanie znoŭ atakavali Ukrainu. U piaci rajonach Kijeva paciarpieli dziasiatki ludziej. Siem kijaŭlan zahinuli ŭ Darnickim rajonie stalicy Ukrainy, jaki vorah atakavaŭ balistyčnymi rakietami.
Častka ź ich trapiła pad udar, kali sprabavała dabracca da schovišča, paviedamlaje «Suśpilnie. Kijiv».
U Darnickim rajonie dźvie balistyčnyja rakiety trapili niepadalok ad žyłych damoŭ. Byli paškodžanyja 13 šmatpaviarchovikaŭ, a ŭ adnym sa skvieraŭ paśla padzieńnia rakiety ŭtvaryłasia vialikaja varonka.
Paśla abviaščeńnia pavietranaj tryvohi miascovyja žychary pabiehli da bietonnaha zbudavańnia, jakoje vykarystoŭvałasia jak schovišča. U hety momant pobač vybuchnuła adna z rakiet — zahinuli piać čałaviek.
Kali inšyja kijaŭlanie pačali akazvać dapamohu paciarpiełym, pobač udaryła jašče adna rakieta, jakaja zabiła jašče dvuch čałaviek.
Žychar adnaho z paškodžanych šmatpaviarchovikaŭ raspavioŭ, što padčas ataki zahinuŭ jaho susied — mužčynu adarvała nohi.
«Pieršy vybuch prahrymieŭ, kali ŭsie spali. Druhi — kali biednyja ludzi pačali ŭciakać. Častka ciapier atrymała kantuzii.
Tam unizie była bolš-mienš tryvałaja bietonnaja pabudova, raniej tam byŭ zavod. Ludzi schavalisia tam. Askołkami pasiekła tych, chto bieh tudy. U našym domie paškodžanyja ŭsie trochpakajovyja kvatery. Niekatoryja ludzi nie mahli vybracca», — raskazaŭ kijaŭlanin Aleh.
Padčas ataki zahinuŭ patrulny palicejski Jahor Ciarochin, jaki ŭ tuju noč dapamahaŭ paciarpiełym na miescy abstrełu. U 22‑hadovaha kijaŭlanina zastalisia maci i dzieviacihadovy brat.
«Słužbu ŭ Patrulnaj palicyi Kijeva Jahor pačaŭ u 2025 hodzie. Jon byŭ addany prysiazie, dobrasumlenna vykonvaŭ svaje słužbovyja abaviazki, byŭ nadziejnym naparnikam i čałaviekam, jaki zaŭsiody prychodziŭ na dapamohu tym, chto jaje patrebavaŭ.
Takim jon zastaŭsia da apošniaj chviliny svajho žyćcia. Ratujučy inšych, jon addaŭ samaje darahoje — ułasnaje žyćcio», — paviedamili ŭ Patrulnaj palicyi.
Jašče adna siamiejnaja para zdoleła vyratavacca, schavaŭšysia ŭ vannym pakoi. Muž i žonka žyvuć na trecim paviersie adnaho ź piacipaviarchovych damoŭ, dzie rasijski ŭdar častkova razburyŭ padjezd na pieršych dvuch pavierchach.
«Nas vyratavała vannaja. Plitka pačała sypacca, ale bojler acaleŭ. Nie viedaju, jak jon nie zvaliŭsia nam na hałovy i jak my zastalisia žyvyja.
Muž tolki krychu parezaŭ nahu ab škło. A ŭvohule Boh nas vyratavaŭ — inakš ja heta rastłumačyć nie mahu», — raskazała žycharka Kijeva Lesia.
Pad udaram taksama apynuŭsia Sałamianski rajon, dzie paciarpieli dva šmatpaviarchovyja damy, paviedamlaje «Kijiv24». U budynkach vyhareli kvatery, vybuchovaj chvalaj vybiła bolšaść voknaŭ, byli razburanyja mižpaviarchovyja pierakryćci, paškodžanyja bałkony i fasady.
«My pačuli niekalki pieršych vybuchaŭ i pačali vybiahać z kvatery, ale ŭbačyli, što lacić jašče adna balistyčnaja rakieta, tamu vyrašyli nie ryzykavać i zastalisia. U niejki momant pačuli ŭdar — źnikła śviatło. Potym adbyŭsia druhi ŭdar i vielmi mocnaja vybuchovaja chvala.
Kali raspluščyli vočy, ubačyli, što ŭ nas vybityja ŭsie vokny i dźviery. Faktyčna zastalisia tolki ścieny», — raskazaŭ adzin z žycharoŭ Kijeva.
Ciapier čytajuć
Siarhiej Cichanoŭski zapuściŭ svoj jutub-kanał ź vieršami i kazkami85
Kamientary
Jany atakujuć nas na praciahu 500 hod .
Nie napałochajecie vy Litvinaú ani bombami , ani rakietami , manholskija zabojcy !
Ukraina pieramoža !
My pieramožam !
Da zbroi !