Google prybraŭ ŠI-instrumient Nano Banana z Google Earth užo praź dzień paśla zapusku
Karystalniki paśpieli «razbambić» chmaračosy ŭ ZŠA, stvaryć jadziernyja abjekty ŭ Iranie i «razburyć» Ejfielevu viežu.
Google adklučyŭ novuju funkcyju hienieracyi malunkaŭ Nano Banana u Google Earth mienš čym praz sutki paśla jaje zapusku. Kampanija patłumačyła heta tym, što karystalniki pačali raspaŭsiudžvać zhienieravanyja vyjavy, jakija «mohuć parušać praviły płatformy», i paabiacała viarnuć instrumient tolki paśla ŭkaranieńnia «bolš nadziejnych miechanizmaŭ abarony», piša telehram-kanał «Ostorožno, novosti».
Pryčynaj krytyki stali ekśpierymienty daśledčykaŭ OSINT i zvyčajnych karystalnikaŭ. Jany vyjavili, što z dapamohaj tekstavych zapytaŭ možna było stvarać fotarealistyčnyja sceny niepasredna na asnovie spadarožnikavych zdymkaŭ Google Earth. Siarod prykładaŭ — samalot, jaki ŭrazajecca ŭ chmaračos na Manchetenie, jadzierny abjekt u Iranie, łahiery biežancaŭ na miažy ZŠA i Mieksiki, a taksama vielizarnaja varonka ad vybuchu ŭ Łos-Andželesie.
Daśledčyk OSINT Chienk van Es pakazaŭ, što zmoh za niekalki siekund «raźmiaścić» łahiery biežancaŭ kala mieksikanskaj miažy i «pabudavać» jadzierny abjekt u Iranie, zadaŭšy ŭsiaho niekalki tekstavych kamand. Pavodle jaho słoŭ, servis amal nie abmiažoŭvaŭ padobnyja zapyty.
Z rezkaj krytykaj vystupiła i supolnaść GeoConfirmed. Tam zajavili, što Google Earth doŭhi čas byŭ adnym z klučavych instrumientaŭ dla pravierki infarmacyi i hieałakacyi, a mahčymaść hienieravać realistyčnyja, ale vydumanyja spadarožnikavyja vyjavy moža surjozna ŭskładnić baraćbu z dezinfarmacyjaj.
Na dumku analitykaŭ, ciapier tym, chto zajmajecca pravierkaj faktaŭ, spačatku daviadziecca ŭpeŭnicca, što pierad imi nie padrobleny zdymak Google Earth, a ŭžo potym analizavać samu padzieju. Jany taksama papiaredzili, što złamyśniki zmohuć stvarać falšyvyja vajennyja abjekty, źmianiać pryznačeńnie budynkaŭ abo fabrykavać nastupstvy atak, vydajučy takija vyjavy za sapraŭdnyja.
U Google padkreślili, što ŭsie zhienieravanyja vyjavy byli paznačanyja jak stvoranyja štučnym intelektam i nie adlustroŭvalisia ŭ asnoŭnaj viersii Google Earth dla inšych karystalnikaŭ. Adnak paśla chvali krytyki kampanija vyrašyła časova całkam adklučyć funkcyju.
30 lipienia Google pradstaviŭ funkcyju Nano Banana dla veb-viersii Google Earth. Jana dazvalała hienieravać vyjavy na asnovie spadarožnikavych zdymkaŭ, aerafotazdymkaŭ i trochmiernych kart miascovaści z dapamohaj tekstavych zapytaŭ. U kampanii prapanoŭvali vykarystoŭvać jaje dla vizualizacyi histaryčnych padziej, stvareńnia infahrafiki, architekturnych i deviełapierskich prajektaŭ, płanavańnia budaŭnictva i inšych tvorčych zadač. Instrumient byŭ dastupny karystalnikam Google Earth pa ŭsim śviecie.
Ciapier čytajuć
Siarhiej Cichanoŭski zapuściŭ svoj jutub-kanał ź vieršami i kazkami85
Kamientary
Akramia pieraličanaha, ludzi malavali ruskija tanki ŭ Kijevie, visielicy dla zdradnikaŭ u Łondanie i inšaje.
2. ŠI i tak umiejuć damaloŭvać zdymki. Zaraz prosta prybrali funkcyju, jakuju zručna vyzyvać u samoj prahramie.
3. Z ulikam hetaha nieabchodnaść fakt-čekinhu nie pavialičyłasia. Jak była, tak i zastałasia.
4. Pamyječnyja sabčakoŭskija «Ostorožno, novosti» (nazva takaja tut) sami nie dali nijakich pieršakrynic, a tut u vas pieršakrynica.
A što kali jany pamylajucca abo dali fejk? Chapaje ž aŭtarytetnych krynic, ad BBC Verify, sam Google - uvohule šmat chto napisaŭ.
5. Sumna, što zamiest prapanavanaha vyvučeńnia historyi abo płanavańnia budučyni (ŭ tym liku zabudovy) ludzi kinulisia praviarać technałohiju vandalizmam.
Hałoŭnaja dumka "iak by što źniščyć, zachapić, jak napužać".
Ad redaktara. A moža b vy nam bolš napisali na hetuju temu? Byŭ by ŭdziačny. Dašlicie na [email protected] ci ŭ TH @nn_editor
[Zredahavana]