Saudaŭskaja Aravija rychtujecca pastavić na miesca jemienskich chusitaŭ
Saudaŭskaja Aravija rychtujecca da mahčymaj bujnoj vajennaj apieracyi suprać jemienskich chusitaŭ. Pavodle infarmacyi vydańnia The Guardian, havorka moža iści nie tolki pra avijaŭdary i dziejańni na mory, ale i pra paŭnavartasnaje naziemnaje nastupleńnie ŭ centralnaj častcy Jemiena.
Pryčynaj abvastreńnia stała situacyja vakoł sudnachodstva i pastavak nafty praz Čyrvonaje mora. Chusity, jakija kantralujuć stalicu Jemiena Sanu i značnuju častku ŭźbiarežža Čyrvonaha mora, 20 lipienia zajavili pra błakadu saudaŭskich sudnaŭ. Jany śćviardžajuć, što hatovyja spynić jaje, kali Saudaŭskaja Aravija admienić svaju błakadu terytoryj, jakija kantralujuć chusity.
Pavodle jemienskich krynic, saudaŭskija vajskoŭcy pačali vyvodzić častku svaich padraździaleńniaŭ z uschodnich rajonaŭ Jemiena, jakija kantralujucca mižnarodna pryznanym uradam krainy. Miarkujecca, što hetyja siły mohuć być pierakinutyja dla apieracyi suprać chusitaŭ, jakija ŭtrymlivajuć zachodniuju častku Jemiena.
Adnačasova Er-Ryjad sprabuje stvaryć mižnarodnuju marskuju kaalicyju dla abarony handlovych sudnaŭ u Čyrvonym mory i Bab-el-Mandebskim pralivie. Pavodle infarmacyi saudaŭskaha Ministerstva abarony, ideju ŭžo padtrymali 14 krain, u tym liku Turcyja, Pakistan, Jehipiet, Sudan i Džybuci. Saudaŭskaja Aravija taksama prapanavała dałučycca da kaalicyi ZŠA, Hiermanii, Francyi, Vialikabrytanii i Italii.
Napružanaść jašče bolš uzrasła 25 lipienia, kali chusity zajavili pra ŭdar pa naftavaj infrastruktury Saudaŭskaj Aravii. Pavodle ich śćviardžeńniaŭ, cellu stali važnyja abjekty, praź jakija nafta z radoviščaŭ na ŭschodzie krainy transpartujecca da ekspartnaha terminała na Čyrvonym mory.
Dla Saudaŭskaj Aravii hety maršrut maje asablivaje značeńnie. Na fonie vajny pamiž Iranam i Izrailem i prablem z sudnachodstvam u rehijonie ŭłady aścierahajucca, što Čyrvonaje mora moža stać jašče adnym maršrutam, niebiaśpiečnym dla ekspartu nafty. Kali jon budzie pierakryty adnačasova z Armuzskim pralivam, to mahčymaści krainy pastaŭlać naftu na suśvietny rynak istotna skarociacca.
Pavodle krynic vydańnia, pierahrupoŭka saudaŭskich vojskaŭ moža być źviazanaja z padrychtoŭkaj apieracyi ŭ pravincyi Al-Bajda ŭ centralna-paŭdniovaj častcy Jemiena. Chusity zachapili hety rehijon u 2020—2021 hadach.
Saudaŭskaja Aravija ŭmiašałasia ŭ hramadzianskuju vajnu ŭ Jemienie jašče ŭ 2015 hodzie, padtrymaŭšy mižnarodna pryznany ŭrad u baraćbie z chusitami. Za nastupnyja hady pamiž bakami adbyvalisia šmatlikija bajavyja sutyknieńni, ale ahulny bałans sił doŭhi čas istotna nie mianiaŭsia. Ciapier ža, pavodle The Guardian, hetaja raŭnavaha pačała parušacca.
Pry hetym Er-Ryjad, jak adznačajecca, imkniecca pakazać, što zdolny abaranić svaju terytoryju i naftavyja abjekty, ale nie choča niepasredna ŭciahvacca ŭ jašče bolšy kanflikt ź Iranam. Saudaŭskija ŭłady pa-raniejšamu raźličvajuć, što supiarečnaści pamiž Tehieranam i Vašynhtonam možna vyrašyć dypłamatyčnym šlacham. Paralelna Aman i Iran viaduć pieramovy ab mahčymym adnaŭleńni narmalnaha sudnachodstva praz Armuzski praliŭ.
Na fonie pahroz z boku chusitaŭ niekatoryja saudaŭskija naftavyja tankiery ŭžo pačali abychodzić niebiaśpiečny Bab-el-Mandeb vakoł Afryki. Heta pavialičvaje praciahłaść rejsaŭ jak minimum na dva tydni. Pry hetym častka tankieraŭ inšych krain, u tym liku Kitaja i Pakistana, praciahvaje karystacca pralivam, tamu sudnachodstva ŭ rehijonie pakul nie spyniłasia.
Kamientary