Palicyja Słavakii praduchiliła padpał zavoda pa vytvorčaści bieśpiłotnikaŭ.
Pavodle źviestak pravaachoŭnikaŭ, dvuch padazravanych u płanavańni dyviersii zatrymali ŭ Słavakii, jašče adnaho — u Hiermanii. Paciarpiełych i škody niama, piša Moscow Times.
Na abjekcie pracavali kala 70 supracoŭnikaŭ, a košt majomaści ŭ cechu składaŭ dziasiatki miljonaŭ jeŭra. Palicejskija kanfiskavali haručuju sumieś, instrumienty, mabilnyja telefony, videakamieru i płan. Kanfiskavanaja haručaja sumieś była napałmam. Śledstva pa kryminalnaj spravie praciahvajecca.
Cellu byŭ zavod bieśpiłotnikaŭ ukrainskaj kampanii Skyeton u horadzie Prešaŭ. Jaje ofis u Kijevie ŭžo byŭ źniščany ŭ vyniku rasijskaj ataki ŭ mai 2026 hoda.
Kampanija Skyeton naładziła vypusk dronaŭ Raybird u Słavakii praz daččynuju strukturu Tropozond. BPŁA Raybird u realnym časie pieradaje kaardynaty celaŭ i intehrujecca z artyleryjskimi sistemami HIMARS, Caesar i Krab.
Kampanija zahadzia rychtavałasia da atak i raźmierkavała vytvorčyja mahutnaści pa roznych rehijonach Ukrainy i za miažoj. U 2025 hodzie Skyeton i brytanskaja abaronnaja kampanija Prevail Partners abviaścili ab stvareńni sumiesnaha pradpryjemstva Skyeton Prevail Solutions. Na sumiesnaj vytvorčaści ŭ Vialikabrytanii płanavałasia naniać 160 čałaviek. Taksama kampanija supracoŭničaje z dackaj Quadsat.
U Jeŭropie adbyłosia niekalki incydentaŭ na pradpryjemstvach, źviazanych z pastaŭkami zbroi Ukrainie.
15 žniŭnia ŭ Talinie adbyŭsia padpał budynka, jaki vykarystoŭvaje estonskaja kampanija Milrem Robotics. Jana vyrablaje vajskovuju robatatechniku i pastaŭlaje sistemy Ukrainie. Paźniej u Łatvii zatrymali traich jaje hramadzian pa padazreńni ŭ arhanizacyi padpału. Estonskija ŭłady rasśledujuć mahčymuju datyčnaść Rasii.
13 žniŭnia na zavodzie KNDS Ammo Italy u Kalefiera niedaloka ad Ryma adbyŭsia mahutny vybuch. Pradpryjemstva ŭvachodzić u abaronny chołdynh KNDS, jaki pastaŭlaje zbroju Ukrainie. Zavod pad Rymam vyrablaje bojeprypasy dla suchaputnych i vajenna-marskich sił. U Kijevie pracuje daččynaja kampanija KNDS Ukraine, jakaja supracoŭničaje z ukrainskaj abaronnaj pramysłovaściu.
Čaćviorty epizod adbyŭsia 10 žniŭnia. Pažar pačaŭsia na terytoryi pradpryjemstva EMCO kala vioski Bielica ŭ Bałharyi. Kala 300 rabotnikaŭ pradpryjemstva evakujavali. EMCO naležyć bałharskamu zbrojevamu mahnatu Emilijanu Hiebravu. Jaho kampanii pastaŭlali ŭzbrajeńnie Ukrainie z 2014 hoda. Pryčyny pažaru na składzie bojeprypasaŭ rasśledujucca.
U Čechii palaki źbili palaka, pryniaŭšy jaho za ŭkrainca z-za šapki ŭ kolerach Vierchniaj Silezii. Chłopiec jechaŭ u viełaprabieh dziela chvoraj na rak ciažarnaj partniorki2525
Kamientary