Паліцыя Славакіі прадухіліла падпал завода па вытворчасці беспілотнікаў.
Паводле звестак праваахоўнікаў, двух падазраваных у планаванні дыверсіі затрымалі ў Славакіі, яшчэ аднаго — у Германіі. Пацярпелых і шкоды няма, піша Moscow Times.
На аб’екце працавалі каля 70 супрацоўнікаў, а кошт маёмасці ў цэху складаў дзясяткі мільёнаў еўра. Паліцэйскія канфіскавалі гаручую сумесь, інструменты, мабільныя тэлефоны, відэакамеру і план. Канфіскаваная гаручая сумесь была напалмам. Следства па крымінальнай справе працягваецца.
Цэллю быў завод беспілотнікаў украінскай кампаніі Skyeton у горадзе Прэшаў. Яе офіс у Кіеве ўжо быў знішчаны ў выніку расійскай атакі ў маі 2026 года.
Кампанія Skyeton наладзіла выпуск дронаў Raybird у Славакіі праз даччыную структуру Tropozond. БПЛА Raybird у рэальным часе перадае каардынаты цэляў і інтэгруецца з артылерыйскімі сістэмамі HIMARS, Caesar і Krab.
Кампанія загадзя рыхтавалася да атак і размеркавала вытворчыя магутнасці па розных рэгіёнах Украіны і за мяжой. У 2025 годзе Skyeton і брытанская абаронная кампанія Prevail Partners абвясцілі аб стварэнні сумеснага прадпрыемства Skyeton Prevail Solutions. На сумеснай вытворчасці ў Вялікабрытаніі планавалася наняць 160 чалавек. Таксама кампанія супрацоўнічае з дацкай Quadsat.
У Еўропе адбылося некалькі інцыдэнтаў на прадпрыемствах, звязаных з пастаўкамі зброі Украіне.
15 жніўня ў Таліне адбыўся падпал будынка, які выкарыстоўвае эстонская кампанія Milrem Robotics. Яна вырабляе вайсковую робататэхніку і пастаўляе сістэмы Украіне. Пазней у Латвіі затрымалі траіх яе грамадзян па падазрэнні ў арганізацыі падпалу. Эстонскія ўлады расследуюць магчымую датычнасць Расіі.
13 жніўня на заводзе KNDS Ammo Italy у Калефера недалёка ад Рыма адбыўся магутны выбух. Прадпрыемства ўваходзіць у абаронны холдынг KNDS, які пастаўляе зброю Украіне. Завод пад Рымам вырабляе боепрыпасы для сухапутных і ваенна-марскіх сіл. У Кіеве працуе даччыная кампанія KNDS Ukraine, якая супрацоўнічае з украінскай абароннай прамысловасцю.
Чацвёрты эпізод адбыўся 10 жніўня. Пажар пачаўся на тэрыторыі прадпрыемства EMCO каля вёскі Беліца ў Балгарыі. Каля 300 работнікаў прадпрыемства эвакуявалі. EMCO належыць балгарскаму зброеваму магнату Эміліяну Гебраву. Яго кампаніі пастаўлялі ўзбраенне Украіне з 2014 года. Прычыны пажару на складзе боепрыпасаў расследуюцца.
Цяпер чытаюць
«Кайлас, я іду». Што за беларуска знікла ў жудасным селі ў Непале11
Каментары