Miljony sprob uzłomu. Banki, avijakampanii, dziaržustanovy pa ŭsim śviecie adklučajuć anłajn-servisy praź dzirki ŭ biaśpiecy PHP
Kampanii i dziaržaŭnyja ŭstanovy terminova abnaŭlajuć prahramnaje zabieśpiačeńnie, a častku sajtaŭ adklučajuć, kab zaścierahčy ad uzłomu. Pavodle Cloudflare, paśla raskryćcia dźviuch krytyčnych uraźlivaściaŭ u PHP kolkaść sprob skarystacca imi vyrasła da miljonaŭ. Abmiežavańni zakranuli i biełaruskija sajty.
PHP — mova prahramavańnia, na jakoj pracujuć mnohija sajty i anłajn-servisy. Vyjaŭlenyja ŭ joj pamyłki mohuć dazvolić złamyśnikam zapuskać škodnasny kod na sierviery biez aŭtaryzacyi. Heta stvaraje pahrozu dla sajtaŭ niezaležna ad taho, jakoj kampanii ci ŭstanovie jany naležać, piša Reuters.
Raspracoŭščyki vypuścili terminovyja vypraŭleńni 21 kastryčnika i zaklikali nieadkładna ich ustalavać. Adnak administrataram treba nie tolki abnavić prahramnaje zabieśpiačeńnie, ale i pravieryć, ci ŭsio paśla hetaha pracuje. Tamu častku servisaŭ na hety čas adklučajuć.
Ad tysiač sprob da miljonaŭ — za niekalki hadzin
Kiraŭnik Cloudflare Mećju Pryns paviedamiŭ, što sproby skarystacca ŭraźlivaściami fiksavali jašče da publičnaj abviestki pra ich. Paśla raskryćcia infarmacyi kolkaść takich sprob rezka pavialičyłasia.
«Za dziesiać hadzin da publičnaj abviestki my bačyli ŭ našaj sietcy tysiačy sprob skarystacca ŭraźlivaściu. Za 45 chvilin paśla abviestki ich kolkaść vyrasła da dziasiatkaŭ tysiač, za dźvie hadziny — da socień tysiač, a ciapier — da miljonaŭ», — napisaŭ jon.
Heta kolkaść sprob ataki, a nie paśpiachova ŭzłamanych sajtaŭ.
Adklučajucca banki, pieravozčyki i dziaržaŭnyja servisy
U Japonii pra časovaje prypynieńnie častki internet-servisaŭ paviedamili finansavyja kampanii Nomura i Mitsubishi UFJ, avijakampanija ANA i čyhunačny pieravozčyk East Japan Railway. Abmiežavańni taksama ŭviali Ministerstva finansaŭ, mietearałahičnaje ahienctva i padatkovaja słužba krainy.
Francuzskaja telekamunikacyjnaja hrupa Orange previentyŭna zakryła dostup da niekatorych sajtaŭ i prahram svaich daččynych kampanij.
U Finlandyi dziaržaŭny IT-pravajdar Valtori pačaŭ pastupova adnaŭlać dostup da servisaŭ paśla načnoha ŭstalavańnia vypraŭleńniaŭ. Jaho kiraŭnik Chanu Naŭmanien papiaredziŭ, što adnaŭleńnie moža zaniać dni ci navat tydni: sistemy patrabujuć dbajnaj pravierki.
U Valtori padkreślili, što sajty adklučyli dziela biaśpieki. Pra ich uzłom ci vykarystańnie hetych uraźlivaściaŭ suprać ich pravajdaru nieviadoma.
Što ŭ Biełarusi
Hoster.by 21 kastryčnika paviedamiŭ, što pavodle rasparadžeńnia dziaržaŭnaha orhana, jaki kaardynuje kibierbiaśpieku, abmiežavali ŭvachodny trafik z-za miažy.
Pavodle kampanii, zakranutyja sajty pavinny zastavacca dastupnymi ŭ Biełarusi, ale nie adkryvacca ź inšych krain. Vyklučeńnie zrabili dla davieranych sietak pošukavych robataŭ Google, «Jandeksa» dy inšych pošukavikaŭ. Jaki mienavita orhan vydaŭ rasparadžeńnie i kolki resursaŭ zakranuli abmiežavańni, nie ŭdakładniałasia.
Siońnia ranicaj błakiroŭku źniali, ale niekatoryja sajty zastajucca niedasiažnymi z-za miažy.
Kamientary