Мільёны спроб узлому. Банкі, авіякампаніі, дзяржустановы па ўсім свеце адключаюць анлайн-сэрвісы праз дзіркі ў бяспецы PHP

PHP — мова праграмавання, на якой працуюць многія сайты і анлайн-сэрвісы. Выяўленыя ў ёй памылкі могуць дазволіць зламыснікам запускаць шкоднасны код на серверы без аўтарызацыі. Гэта стварае пагрозу для сайтаў незалежна ад таго, якой кампаніі ці ўстанове яны належаць, піша Reuters.

Распрацоўшчыкі выпусцілі тэрміновыя выпраўленні 21 кастрычніка і заклікалі неадкладна іх усталяваць. Аднак адміністратарам трэба не толькі абнавіць праграмнае забеспячэнне, але і праверыць, ці ўсё пасля гэтага працуе. Таму частку сэрвісаў на гэты час адключаюць. 

Ад тысяч спроб да мільёнаў — за некалькі гадзін

Кіраўнік Cloudflare Мэцью Прынс паведаміў, што спробы скарыстацца ўразлівасцямі фіксавалі яшчэ да публічнай абвесткі пра іх. Пасля раскрыцця інфармацыі колькасць такіх спроб рэзка павялічылася.

«За дзесяць гадзін да публічнай абвесткі мы бачылі ў нашай сетцы тысячы спроб скарыстацца ўразлівасцю. За 45 хвілін пасля абвесткі іх колькасць вырасла да дзясяткаў тысяч, за дзве гадзіны — да соцень тысяч, а цяпер — да мільёнаў», — напісаў ён.

Гэта колькасць спроб атакі, а не паспяхова ўзламаных сайтаў.

Адключаюцца банкі, перавозчыкі і дзяржаўныя сэрвісы

У Японіі пра часовае прыпыненне часткі інтэрнэт-сэрвісаў паведамілі фінансавыя кампаніі Nomura і Mitsubishi UFJ, авіякампанія ANA і чыгуначны перавозчык East Japan Railway. Абмежаванні таксама ўвялі Міністэрства фінансаў, метэаралагічнае агенцтва і падатковая служба краіны.

Французская тэлекамунікацыйная група Orange прэвентыўна закрыла доступ да некаторых сайтаў і праграм сваіх даччыных кампаній.

У Фінляндыі дзяржаўны IT-правайдар Valtori пачаў паступова аднаўляць доступ да сэрвісаў пасля начнога ўсталявання выпраўленняў. Яго кіраўнік Хану Наўманен папярэдзіў, што аднаўленне можа заняць дні ці нават тыдні: сістэмы патрабуюць дбайнай праверкі.

У Valtori падкрэслілі, што сайты адключылі дзеля бяспекі. Пра іх узлом ці выкарыстанне гэтых уразлівасцяў супраць іх правайдару невядома.

Што ў Беларусі

Hoster.by 21 кастрычніка паведаміў, што паводле распараджэння дзяржаўнага органа, які каардынуе кібербяспеку, абмежавалі ўваходны трафік з-за мяжы.

Паводле кампаніі, закранутыя сайты павінны заставацца даступнымі ў Беларусі, але не адкрывацца з іншых краін. Выключэнне зрабілі для давераных сетак пошукавых робатаў Google, «Яндэкса» ды іншых пошукавікаў. Які менавіта орган выдаў распараджэнне і колькі рэсурсаў закранулі абмежаванні, не ўдакладнялася.

Сёння раніцай блакіроўку знялі, але некаторыя сайты застаюцца недасяжнымі з-за мяжы. 

• 1
• 1
• 2
• 1
• 1
• 0
• 0
• 0