«Naša Niva» ź infarmacyjaj pra «Chrosnaha baćku»: tyraž źnik

«Našu Nivu» bambardujuć čytačy. Haziety niama ŭ prodažy: u čym pryčyna? № 25 «NN» raskazvaŭ pra situacyju z Mytnym sajuzam, film NTV i reakcyju na jaho biełaruskich uładaŭ.

Tranślacyju stužki ŭ Biełarusi pierakryli. Adnak viestki pra jaho vyklikała vialikuju cikavaść siarod nasielnictva. Na internet-sajtach, u tym liku i NN.By, jakija dali infu pra heta, artykuły stali samymi čytanymi materyjałami za apošnija 30 dzion. Rolik filma na Ju-Tjubie sabraŭ 118 000 prahladaŭ pa stanie na 18.30 čaćviarha.

Zvyčajna «NN» pastupaje ŭ prodaž u Minsku ŭ sieradu ŭ abied, u rehijonach — u čaćvier ad ranku. Ani ŭ sieradu, ani ŭ čaćvier, ani ŭ piatnicu hazieta ŭ kijoskach nie pajaviłasia. Choć u sieradu hazieta vyjšła z drukarni zvyčajnym paradkam, a 8.00. Tyraž byŭ zvyčajny — 6350 asobnikaŭ. I padpisčykam hazieta pryjšła, jak zvykła.

U «Biełsajuzdruku» nam adkazali: «Ničoha nie viedajem, na naš aptovy skład hazieta pastupiła».

My pračakali da viečara čaćviarha. Adnak i paśla abiedu hazieta tak i nie pajaviłasia ŭ prodažy. Dla pravierki my sami abjechali kijoski ŭ roznych rajonach Minska: na Jubilejnaj płoščy, u rajonie mietro «Puškinskaja», na płoščy Jakuba Kołasa, vulicy Kazłova, nasuprać Akademii milicyi, u rajonie BNTU. «Usie astatnija haziety pryjšli, jak zvyčajna, a «Našaj Nivy» čahości niama», — razvodzili rukami kijaskiorki.

U adnym z kijoskaŭ u Kuncaŭščynie kijaskiorka adkazała, što «vy nie pieršy pytajeciesia. Nie, niama. Nam kiraŭnictva skazała, što hety numar nie vyjdzie».

U kijosku va Uruččy nam adkazali: «Nam paviedamili, što redaktar hetaha numara nie vypuściŭ. A moža tam jak kaliści z «Tajnami źviozd», dzie było niešta pra Łukašenku i nam pryjšło ŭkazańnie terminova źniać z prodažu».

U adździele roźničnych prodažaŭ «Biełsajuzdruk» a 17.00 adkazvali raniejšaje: «Numar pastupiŭ u sietku». Nijakich bolš tłumačeńniaŭ my nie atrymali. Pa stanie na viečar čaćviarha hazieta nie źjaviłasia ŭ prodažy i ŭ Homieli, Breście, Hrodnie, Viciebsku, Mahilovie, Lidzie, Salihorsku, Barysavie, Biełaaziersku, Navapołacku, Słucku, Vaŭkavysku, Mastach. Usiudy adkazvali, što hazieta «nie pastupiła, choć i pavinna była».

Kali b adbyŭsia techničny zboj, u pracesie dastaŭki, hazieta mieła b źjavicca ŭ prodažy sa spaźnieńniem maksimum na paŭdnia, z nastupnaj ekśpiedycyjaj. Adnak na hety momant prajšło ŭžo paŭtara sutak, a haziety ŭ prodažy niama. Taksama niemahčyma vytłumačyć pastupleńnie haziety ŭ asobnyja kijoski i jaje adsutnaść u absalutnaj bolšaści, pry tym što pradukcyju razvozić adzin ekśpiedycyjny aŭtamabil.

Za minułyja dva hady byŭ tolki adzin vypadak, kali hazieta ŭ abłasnych centrach źjaviłasia ŭ prodažy ŭ piatnicu, a nie ŭ čaćvier. I nie było nivodnaha vypadku, kali hazieta nie źjaŭlałasia ŭ prodažu ŭ Minsku ŭ čaćvier.

Zabaronieny numar «NN» možna pračytać tut u PDF.

• 0
• 0
• 0
• 0
• 0
• 0
• 0
• 0