Zialenski nazvaŭ pieršy dzień pieramoŭ u Abu-Dabi «kanstruktyŭnym i davoli źmiastoŭnym»
Prezident Ukrainy Uładzimir Zialenski paviedamiŭ pra vyniki pieršaha dnia pieramoŭ u Abu-Dabi. Spačatku ŭkrainskaja delehacyja praviała sustreču ź jeŭrapiejskimi i amierykanskimi partniorami, paśla čaho adbylisia trochbakovyja pieramovy z udziełam pradstaŭnikoŭ Ukrainy, ZŠA i Rasii.
Pavodle słoŭ Zialenskaha, trochbakovaja sustreča prajšła kanstruktyŭna i była davoli źmiastoŭnaj. Baki abmierkavali nieabchodnaść i mahčymyja paramietry humanitarnych krokaŭ. Adnym z hałoŭnych pryjarytetaŭ Ukrainy zastajecca vyzvaleńnie vajennapałonnych.
Taksama padrabiazna razhladalisia źmiest harantyj biaśpieki dla Ukrainy i asnovy ich doŭhaterminovaha funkcyjanavańnia. Ukrainski bok padkreśliŭ nieabchodnaść realnych miechanizmaŭ, jakija nie dazvolać paŭtaryć vajnu. Akramia taho, abmiarkoŭvałasia nieabchodnaść krokaŭ dla deeskałacyi.
Ukrainski prezident pastaviŭ pierad svajoj delehacyjaj kankretnyja zadačy dla dalejšaha dyjałohu — jak padčas trochbakovych pieramovaŭ na nastupny dzień, tak i ŭ chodzie sustreč z pradstaŭnikami prezidenta ZŠA i jeŭrapiejskimi partniorami ŭ najbližejšyja dni.
Hałoŭnaj metaj jon nazvaŭ realnaje nabližeńnie miru i zapeŭniŭ, što ŭkrainski bok budzie vieści praduktyŭnuju, jakasnuju i sumlennuju pracu. Taksama jon padziakavaŭ ZŠA za arhanizacyju pieramoŭ, a Abjadnanym Arabskim Emiratam — za nadańnie placoŭki dla sustreč.
Kamientary