U Haradockim rajonie adnaviaskoŭcy vyratavali z vohniennaha doma chvoraha dzieda i troch unukaŭ. Haspadar doma, 61-hadovy piensijanier, spraŭlaŭsia pa haspadarcy, sprabavaŭ sam patušyć ahoń, dy ničoha nie atrymałasia.
Jak paviedamiła Maryna Fando, pres-sakratar Viciebskaha abłasnoha ŭpraŭleńnia pa nadzvyčajnych situacyjach, pažar adbyŭsia ŭviečary ŭ žyłym domie ŭ vioscy Ściapanavičy. Adnaviaskoŭcy — členy dobraachvotnaj pažarnaj kamandy Raman Haholinski, Uładzimir Palakoŭ i Alaksiej Jeŭdakimaŭ, usie rabotniki miascovaha sielskahaspadarčaha kaapieratyva, — ubačyli dym i adrazu kinulisia na dapamohu.
U vyniku da prybyćcia pažarnych vyratavali ŭnukaŭ haspadara doma: 2002, 2004 i 2008-ha hoda naradžeńnia i baćku jaho niaviestki, jaki vypisaŭsia z balnicy paśla insultu i mieŭ patrebu ŭ dohladzie.
Ahniom źniščanyja dach doma, majomaść, paškodžany letniaja kuchnia i haspadarčaja pabudovy.
Miarkujecca, što pryčyna pažaru — hulnia dziaciej z ahniom. U siamji, darečy, jość jašče dvoje dziaciej. Siamja naohuł znachodzicca na ŭliku jak prablemnaja. Raniej pražyvała ŭ domie, absalutna nieprydatnym dla pražyvańnia: ź niaspraŭnaj pravodkaj, paŭrazburanaj piečču. Tamu rabotniki rajonnaha adździeła pa nadzvyčajnych situacyjach vyjšli ź inicyjatyvaj da kiraŭnictva haspadarki vydzielić siamji novy dom.
Dy, vidać, ščaścia bolš tut nie stała. Baćka dziaciej užo hod nie žyvie ŭ siamji. Maci na momant pažaru znachodziłasia ŭ balnicy z samym małym, jakomu mieniej za hod.
Chutčej za ŭsio, budzie vyrašacca pytańnie ab pazbaŭleńni baćkoŭ baćkoŭskich pravoŭ.
Nieviadoma, čym by skončyłasia hetaja "vohniennaja historyja", kali b nie śmiełyja ludzi. I nie lišnim budzie ŭspomnić pra toje, što zapałki dzieciam nie cacka.
Ciapier čytajuć
«Chaču ŭziać intervju» — «Nie» — «Davajcie ja vas sfatahrafuju» — «Nie». Bialacki raskazaŭ pra sustreču ŭ kałonii z Pratasievičam6
Kamientary