«Šmat małych murašoŭ i nivodnaha vialikaha»

Lider abjadnanych demakratyčnych siłaŭ Alaksandar Milinkievič u paniadziełak siarod inšaha vykazaŭsia, što biare na siabie adkaznaść za ruch «Za svabodu», jaki ŭtvaryŭsia adrazu paśla vybaraŭ. Milinkievič skazaŭ, što palitrada demakratyčnych siłaŭ nie zmahła realizavać patencyjał ruchu, zasiarodziŭšysia na svaich prablemach.

Što dumajuć ludzi pra takuju inicyjatyvu Alaksandra Milinkieviča. Palitolah Jury Čavusaŭ zaznačaje, što taki krok saśpieŭ jašče uviesnu, kali hramadzianskaja aktyŭnaść biełarusaŭ była na vielmi vysokim uzroŭni, a ciapier čas krychu syšoŭ. Paprostu ŭsim, u tym liku Milinkieviču, nadakučyli hetyja biaskoncyja palityčnyja razdrai ŭ kaalicyi, utvareńnie niejkich hrupovak. Liberały z adnaho boku, ź inšaha – nacyjanalisty i sacyjalisty i h.d. Milinkievič pajšoŭ na taki krok tolki paśla taho, jak sustreŭsia z aktyvistami ruchu «Za svabodu» ŭ rehijonach. Ludzi sapraŭdy čakali ad jaho takich krokaŭ, ale značna raniej. Milinkievič moh zaniać pazycyju «anhielskaj karalevy», pazirajučy na ŭsio, što robicca źnizu, zvysoku, ale nie zrabiŭ hetaha. Napiaredadni miascovych vybaraŭ treba iznoŭ pracavać, bo minułyja vybary ŭžo syšli ŭ niabyt, a dośvied vybaraŭ, na žal, nie nazapašvajecca», – miarkuje Jury Čavusaŭ.

Demakratyčny aktyvist z Barysava Źmicier Barodka dumaje, što najlepš, kab ruch «Za svabodu» transfarmavaŭsia ŭ hramadzianskuju kampaniju, bo ludziam akurat padabajecca takaja apalityčnaja nazva. Źmicier čakaje ad kampanii «Za svabodu» niejkich pazytyŭnych zruchaŭ. «Narod u rehijonach hatovy pracavać dziela dabra Biełarusi, jany kažuć, my pryšli zmahacca za svaju krainu i im u pryncypie biaz roźnicy, chto staić la styrna. Jany nie čakajuć niejkich ukazak źvierchu, a dziejničajuć sami». Adnak u cełym aktyvizacyju ruchu «Za svabodu» Źmicier Barodka razhladaje jak dobruju navinu.

Namieśnik staršyni PKB Valer Uchnaloŭ kaža, što heta nadzvyčaj dobraja ideja. «Toje, što Milinkievič vyrašyŭ stvaryć svoj ruch, nie zaminaje isnavańniu demakratyčnaj kaalicyi, tym bolej što sam Milinkievič nie źbirajecca pakidać svajo liderstva ŭ joj. Prosta pryjšoŭ čas bolš aktyŭnych dziejańniaŭ u hetym kirunku. Adnosna ruchu «Za svabodu» my majem uzhodnienuju pazycyju ŭ ramkach demakratyčnaj kaalicyi, my ŭsie pazytyŭna stavimsia da jaha isnavańnia. Prosta paśla prezydenckich vybaraŭ u palityku, hramadzkuju dziejnaść pryjšło bahata ludziej, jakija nie źbirajucca ŭstupać u nivodnuju partyju, dla takich i isnuje ruch «Za svabodu», – kaža Valer Uchnaloŭ.

Zusim inšuju pazycyju maje rok-muzyka, lider hurtu Neuro Dubel Alaksandar Kullinkovič: «Mianie vielmi zasmučaje toje, što apošnimi miesiacami robicca ŭ našaj apazycyi. Adzinaje, što adbyłosia dobraje ŭ jejnych šerahach, – heta abrańnie lidera. Ciapier ža praciahvajucca i množacca raniejšyja pučki, uskryki i zalacańni ŭ šerahach apazycyi. Heta ŭsio adšturchoŭvaje ad jaje prostych ludziej, jany staviacca da apazycyi niesurjozna, bo ŭ jaje niama adzinstva, niama manalitu. U našaj apazycyi vielmi šmat małych murašoŭ, ale niama adnaho vialikaha, jaki b byŭ zdolny pavieści jaje za saboj, kab jaje surjozna ŭspryniali nia tolki prostyja ludzi, ale i ŭłady. Ciapier ža sa stvareńniem hetych ruchaŭ i kampanij apazycyja viartajecca da svajho staroha stanu, a jon, jak viadoma, ni da čaho dobraha nie pryvioŭ», – padsumoŭvaje Alaksandar Kullinkovič.

• 0
• 0
• 0
• 0
• 0
• 0
• 0
• 0