10 pryčynaŭ, kab nie daviarać Rasiei

«The Heritage Foundation», adzin ź viadučych daśledna-adukacyjnych centraŭ ZŠA, zaścierahaje prezydenta ZŠA Baraka Abamu, kab jon nie śpiašaŭsia z ratyfikacyjaj damovy ab uzajemnym skaračeńni jadziernych arsenałaŭ z Rasiejaj, jaki Abama i prezydent Rasiei Dźmitry Miadźviedzieŭ padpisali ŭ krasaviku sioleta.

«The Heritage Foundation» ličyć, što Rasieja nie źjaŭlajecca nadziejnym partneram u mižnarodnych adnosinach i što ratyfikacyja zhadanaj damovy Senatam ZŠA nia maje sensu. «The Heritage Foundation» padaje 10 pryčynaŭ, dziela jakich Vašynhtonu nia varta daviarać Maskvie.

1. U minułym Rasieja šmatrazova parušała raniejšuju Damovu ab abmiežavańni stratehičnych nastupalnych uzbrajeńniaŭ (START), jakaja była dziejnaj u 1991—2009 hh.

2. Rasieja i nadalej razhladaje ZŠA i NATO jak hałoŭnaha vajennaha praciŭnika ŭ śviecie. Niadaŭniaje vykryćcio rasiejskaj špijonskaj sietki ŭ ZŠA śviedčyć ab tym, što Rasieja zachavała svaju mentalnaść časoŭ «chałodnaj vajny».

3. Pavodle dadzienych amerykanskaj vyviedki, Rasieja parušaje mižnarodnyja damovy ab nieraspaŭsiudžańni ŭzbrajeńniaŭ, pieradajučy technalohii, źviazanyja z balistyčnymi rakietami, Iranu i Paŭnočnaj Karei.

4. Rasieja pa-raniejšamu prajektuje, vyrablaje i madernizuje jadziernuju zbroju. Novaja vajennaja daktryna Rasiei vyznačaje nizki paroh dla pieršaha jadziernaha ŭdaru. Maskva moža vykarystać taktyčnuju jadziernuju zbroju ŭ Eŭropie ŭ zvyčajnym, niajadziernym kanflikcie. U 2009 hodzie Rasieja praviała vajennyja vučeńni, jakija madelavali jadziernuju ataku na Polšču.

5. Rasieja nie vykonvaje Kanvencyi ab bijalahičnaj zbroi i Kanvencyi ab chimičnaj zbroi.

6. Rasieja nieadnarazova parušała svaje abiacańni vyvieści vojski z Małdovy i Hruzii. Napadajučy na Hruziju ŭ 2009 hodzie, Rasieja pa sutnaści admoviłasia ad Chelsynskaha aktu 1975 hodu, jaki harantuje nieparušnaść miežaŭ u Eŭropie paśla Druhoj suśvietnaj vajny.

7. Rasieja pahražała raźmiaścić rakiety «Iskander» na miežach sajuźnikaŭ ZŠA ŭ adkaz na amerykanski plan zbudavańnia va Ŭschodniaj Eŭropie systemy abarony ad rakietnych atakaŭ ź Iranu.

8. Rasieja raźvivaje suviazi z terarystyčnymi arhanizacyjami CHAMAS i «Chiezbała» dy daje vajskovuju i dyplamatyčnuju padtrymku takim pa-antyamerykansku nastrojenym krainam jak Syryja, Iran i Venesueła.

9. Kreml vykarystoŭvaje zaležnaść svaich susiedziaŭ i eŭrapiejskich krainaŭ ad pastavak rasiejskaha hazu jak element palityčnaha cisku.

10. U Rasiei Uładzimira Pucina i Dźmitryja Miadźviedzieva ŭstalavaŭsia aŭtarytarny režym i ź ciaham času aŭtarytarnyja tendencyi ŭ krainie ŭsio pahłyblajucca.

• 0
• 0
• 0
• 0
• 0
• 0
• 0
• 0