Anarchistaŭ trymajuć na Akreścina čaćviertyja sutki

Zatrymanyja ŭ Minsku anarchisty čaćviertyja sutki znachodziacca ŭ pryjomniku-raźmierkavalniku na Akreścina. Paplečniki sumniajucca ŭ datyčnaści anarchisckaha ruchu da incydentu la pasolstva Rasii.

3 vieraśnia, a 6-j ranicy supracoŭnikami pravaachoŭnych orhanaŭ ŭ cyvilnym byli zatrymanyja Ihar Bahačak, Valeryja Chocina, Siarhiej Ślusar, Mikałaj Dziadok, Alaksiej Žynhieroŭki i Alaksandar Franckievič. Z kvatery, dzie žyli maładziony, kanfiskavali piać kamputaraŭ, dva noŭtbuki, mabilnyja telefony, časopisy dy hrošy.

Maładyja ludzi da hetaha času znachodziacca pad aryštam u Centry izalacyi pravaparušalnikaŭ na vulicy Akreścina ŭ Minsku. Prychilnikaŭ anarchisckich idejaŭ apytvajuć pra incydent la pasolstva Rasii ŭviečary 30 žniŭnia. Pakul što abvinavačvańnie aktyvistam nie pradjaŭlena.

Śledstva aryjentavana, kab pravieryć datyčnaść anarchistaŭ da chulihanskich dziejańniaŭ, a taksama razhladzieć inšyja viersii, paviedamlaje HUUS .

2 vieraśnia ŭ roznych ŚMI źjaviłasia infarmacyja, što adkaznaść za ataku na ambasadu ŭziali na siabie ci to rasijskija, ci to biełaruskija anarchisty. Nacyjanalnaść zajaŭnikaŭ ciažka vyznačyć, aryhinał ichniaha paviedamleńnia vydaleny, da taho ž anarchisty vystupajuć suprać dziaržaŭnych miežaŭ i adnolkava nie lubiać instytut dziaržavy, niezaležna ad nazvy krainy. Pryznańnie supołki «Siabry svabody» ŭpieršyniu źjaviłasia na sajcie belarus.indymedia.org, jaki źjaŭlajecca resursam z adkrytaj publikacyjaj i nie maje redakcyjnaj hrupy, bo źmiest sajtu farmujecca karystalnikami.

Adnak zajavy «Siabroŭ svabody» z partała vydalili maderatary, infarmacyju paličyli niesapraŭdnaj i niebiaśpiečnaj dla isnavańnia sajta.

Jak zaznačajuć aktyvisty anarchisckich ruchaŭ, pra aŭtanomnuju supołku «Sabroŭ svabody» raniej ničoha nie było viadoma, jaje isnavańnie vyhladaje sumnieŭnym. Imi było zajaŭlena, što ataka na ambasadu Rasii ładziłasia ŭ znak salidarnaści z abaroncami chimkinskaha lesa blizu Maskvy. Adnak maskoŭskija abaroncy nie vyklučajuć mahčymaść pravakacyi.

«Mahčyma, značnuju rolu zajmajuć prykmiety razvarušvańnia pieradvybarčaj situacyi pavodle scenara, jaki my ŭžo nazirali napiaredadni vybaraŭ 2006 hoda», — ličyć anarchist ź Minska.

Na terytoryi rasijskaj ambasady 30 žniŭnia a 22:20 achoŭniki znajšli pałajučy słužbovy aŭtamabil. Na miescy zdareńnia była vyjaŭlena butelka z reštkami haručaj sumiasi. Raspačata kryminalnaja sprava pa artykule «Chulihanstva».

• 0
• 0
• 0
• 0
• 0
• 0
• 0
• 0