U HUUS Minharvykankama paćvierdzili fakt zatrymańnia šaści anarchistaŭ

U HUUS Minharvykankama paćvierdzili fakt zatrymańnia šaści maładych ludziej, jakija padazrajucca ŭ dačynieńni da incydentu kala rasijskaha pasolstva ŭ Minsku 30 žniŭnia.

Jak zajaviŭ načalnik adździeła infarmacyi i hramadskich suviaziaŭ HUUS Minharvykankama Alaksandr Łastoŭski, z zatrymanymi pracuje śledstva. Jany praviarajucca na dačynieńnie jak da incydentu kala pasolstva, tak i da inšych supraćpraŭnych dziejańniaŭ.

Jak raniej paviedamlałasia, maładyja ludzi byli zatrymanyja 3 vieraśnia. Pavodle słoŭ Alaksandra Łastoŭskaha, termin ich utrymańnia pad vartaj chutčej za ŭsio budzie praciahnuty ŭ adpaviednaści z Kryminalna-pracesualnym kodeksam. Zhodna z KPK, maksimalny termin zatrymańnia biez pradjaŭleńnia abvinavačańnia ŭ Biełarusi składaje 72 hadziny. Prakuror moža pradoŭžyć hety termin da 10 sutak.

Incydent kala rasijskaha dyppradstaŭnictva ŭ Minsku adbyŭsia viečaram 30 žniŭnia. U 22.20 supracoŭniki departamienta achovy MUS Biełarusi pry abchodzie terytoryi pasolstva vyjavili padpaleny słužbovy aŭtamabil «Mazda-3». Na miescy zdareńnia była znojdziena šklanaja butelka jomistaściu 0,33 litra z reštkami zapalnaj sumiesi i askołki šklanoj butelki z reštkami knota. Pa fakcie incydentu była raspačata kryminalnaja sprava pa artykule «Chulihanstva».

2 vieraśnia interniet-resursy belarus.indymedia.org i belarus.avtonom.org raźmiaścili zajavu, u jakoj havaryłasia, što adkaznaść za napad na rasijskaje pasolstva ŭ Minsku viečaram 30 žniŭnia ŭziali na siabie anarchisty. «Hetaj akcyjaj my vykazvajem hnieŭ i pratest suprać aryštaŭ i represij u dačynieńni da sacyjalnych aktyvistaŭ, jakija stali na abaronu Chimkinskaha lesu ŭ Maskvie», — adznačałasia ŭ zajavie. Paźniej pradstaŭniki kampanii ŭ abaronu Chimkinskaha lesu zajavili, što nie majuć infarmacyi, ci źjaŭlajecca heta akcyja dziejańniami pravakataraŭ abo sapraŭdy nieabyjakavych ludziej.

5 vieraśnia sajt belarus.indymedia.org paviedamiŭ, što Ihar Bahačak, Valeryja Chocina, Siarhiej Ślusar, Mikałaj Dziadok, Alaksiej Žynhiaroŭski i Alaksandr Franckievič byli zatrymanyja 3 vieraśnia, a šostaj hadzinie ranicy supracoŭnikami pravaachoŭnych orhanaŭ i dahetul znachodziacca ŭ Centry izalacyi pravaparušalnikaŭ (CIP) na vulicy Akreścina ŭ Minsku. Z kvatery, jakuju arandavali maładyja ludzi, kanfiskavany piać kampjuteraŭ, dva noŭtbuki, mabilnyja telefony, hrošy, afišy i časopisy.

• 0
• 0
• 0
• 0
• 0
• 0
• 0
• 0