Piać kandydataŭ u prezidenty atrymali papiaredžańni Hienprakuratury

Hienieralnaja prakuratura vyniesła piaci kandydatam u prezidenty Biełarusi aficyjnyja papiaredžańni ab niedapuščalnaści parušeńnia zakanadaŭstva.

Pavodle źviestak BiełaPAN, papiaredžańni atrymali

Uładzimir Niaklajeŭ, Vital Rymašeŭski, Mikałaj Statkievič, Jarasłaŭ Ramančuk i Andrej Sańnikaŭ.

Nahodaj dla hetaha stali zakliki apazicyjnych kandydataŭ da praviadzieńnia niesankcyjanavanaj akcyi na Kastryčnickaj płoščy ŭ Minsku ŭ dzień vybaraŭ, 19 śniežnia.

Varta adznačyć, što Statkievič i Rymašeŭki papiaredžany paŭtorna: pieršy raz Hienprakuratura papiaredžvała ich za zaklik da vybarščykaŭ uziać udzieł u niesankcyjanavanaj akcyi na Kastryčnickaj płoščy 24 listapada.

Jak paviedamiła BiełaPAN pres-sakratar Niaklajeva Julija Rymašeŭskaja, siońnia na mabilny telefon kandydata patelefanavaŭ «niejki čałaviek z Hienprakuratury». Jon paviedamiŭ, što ŭ vypadku praviadzieńnia niezakonnaj akcyi 19 śniežnia ŭ dačynieńni da Nieklajeva budzie raspačata kryminalnaja sprava. «Toj čałaviek zapeŭniŭ, što zaŭtra ž paviedamleńnie pryjdzie pa damašnim adrasie ŭ paštovuju skryniu», — skazała Rymašeŭskaja.

Uładzimir Niaklajeŭ prakamientavaŭ heta tak:

«Zapałochvańnie pieraśledam — turmoj, kryminałam. Ničoha novaha naš režym nie prydumaŭ. I čym bližej da hałasavańnia, kali budzie vyrašacca los režymu, tym mienšaj budzie jaho demanstratyŭnaja demakratyja. Jana zakančvajecca. A pačynajecca zvyčajnaje».

Anałahičnaje telefanavańnie z Hienprakuratury pastupiła Mikałaju Statkieviču. «Ja adkazaŭ, što hałoŭnaje parušeńnie zakanadaŭstva — heta zabojstva i źniknieńnie apanientaŭ ułady. A masavaja akcyja 19 śniežnia — heta realizacyja kanstytucyjnaha prava hramadzian na svabodu schodaŭ. I kali prakuratura nie źbirajecca zachoŭvać Kanstytucyju, my budziem rabić heta sami», — zajaviŭ Statkievič.

Pavodle słoŭ Jarasłava Ramančuka, jamu na mabilny patelefanavaŭ načalnik upraŭleńnia pa nahladzie za zachavańniem zakanadaŭstva i zakonnaści pravavych aktaŭ Hienprakuratury Pavieł Radzivonaŭ. Jon paviedamiŭ, što kandydatu vyniesiena papiaredžańnie, jakoje ŭ piśmovym vyhladzie budzie dasłana na damašni adras. Ramančuk zajaviŭ u adkaz, što płošča — heta častka jaho kampanii jak kandydata ŭ prezidenty. «Heta budzie zusim mirny schod,

my pryjdziem pasłuchać, što nam skaža staršynia Centrvybarkama Lidzija Jarmošyna pavodle vynikaŭ hałasavańnia.

Ničoha supraćzakonnaha ci złačynnaha ŭ hetym ja nie baču, tak robicca va ŭsich cyvilizavanych krainach śvietu», — padkreśliŭ Ramančuk.

U štabach Andreja Sańnikava i Vitala Rymašeŭskaha pakul nie viedajuć pra papiaredžańnie Hienprakuratury.

• 0
• 0
• 0
• 0
• 0
• 0
• 0
• 0