Kastusioŭ abviarhaje BT i vinavacić pravakataraŭ

Uśled za zajavami Jarasłava Ramančuka, Viktara Ciareščanki ŭ efiry BT byŭ pakazany vystup Ryhora Kastusiova. Pramova kandydata ad BNF davałasia narezkami — vyrazanymi byli pytańni žurnalistaŭ, a taksama, vierahodna, častka adkazaŭ.

Kastusioŭ taksama asudziŭ biesparadki 19 śniežnia, ale zrabiŭ heta ŭ inšym klučy:

Naprykład, jon naŭprost nie źvinavaciŭ arhanizataraŭ akcyi.

«My zaŭsiody vystupali za mirnyja akcyi pratestu, na žal, źjaviŭsia šerah ludziej, jakim zachaciełasia zrabić pravakacyju. Škada, što zakončyłasia bićciom voknaŭ, łamańniem dźviarej

— chaciełasia kab usio heta było troški inakš. Na maju dumku, i ja kazaŭ pra heta raniej, pastupała takaja infarmacyja pra toje, što rasijski bok zacikaŭleny ŭ takim raźvićci padziej u Biełarusi. Jak pakazvajuć fakty, hetaja naša zaniepakojenaść paćvierdziłasia.

Składana skazać kankretna chto heta, ale ja liču, što ŭsio ž taki prajaviŭsia prarasijski viektar. Kaniešnie, jany bolš zacikaŭleny ŭ tym, što adbyłosia».

Kastusioŭ zaznačyŭ, što padziei učorašniaha viečara mohuć drenna adbicca na stasunkach ź Jeŭropaj.

«Ciažka kamientavać jak zreahuje Jeŭropa na toje, što adbyłosia ŭ Minsku, ale dla nas, dla mianie asabista, škada, što heta moža sapsavać adnosiny Biełarusi i JEZ, bo my zaŭždy vystupali za toje, kab Biełaruś była ŭ Jeŭraźviazie, ustupiła ŭ jaho — heta naša meta. Kali padziei buduć raźvivacca ŭ advarotnym kirunku, heta budzie na ruku Kramlu, i Biełaruś budzie ŭciahnutaja u palityčnyja i ekanamičnyja stasunki z Rasijaj dosyć hłyboka. Prava kožnaha čałavieka tak ci inakš reahavać na peŭnuju padzieju, ale ja zaŭždy zaklikaŭ, kab takija akcyi pravodzilisia mirna».

Paźniej Ryhor Kastusioŭ abvierh svoj vystup pa BT, nazvaŭšy jaho narezkaj cytataŭ i zajaviŭ, što adkaža na ŭsie pytańni a 16-j padčas pres-kanfierencyi na ofisie BNF.

Voś što jon skazaŭ žurnalistam uviečary 20 śniežnia padčas pres-kanfierencyi.

«Paśla ŭdaru pa hałavie dubinkaj amapaŭca ja z dapamohaj vypadkovych ludziej syšoŭ z płoščy. My sieli ŭ aŭtamabil i sprabavali vyjechać, adnak užo praź niekalki kvartałaŭ aŭtamabil spyniła DAI. Mianie vyvieli z mašyny i adrazu pasadzili ŭ inšuju», — raspavioŭ spadar Ryhor.

Jon taksama paviedamiŭ, što paśla niekalkich pierajezdaŭ apynuŭsia ŭ znakamitaj «amierykancy» — unutranaj turmie KDB — dzie vypadkova pabačyŭ Andreja Dźmitryjeva (kiraŭnika štabu Niaklajeva), a taksama niekalkich maładych ludziej, jakich nie paznaŭ.

«Aformili pratakoł ab zatrymańni na troje sutak. Kala šostaj hadziny ranicy zaviali ŭ kamieru. Adnak siońnia, paśla intervju BT, adpuścili», — zajaviŭ Ryhor Kastusioŭ.

Na pres kanfierencyi taksama było zaznačana, što BNF vystupaje vyklučna za mirnaje vyrašeńnie prablemaŭ i ličyć, što vybary prezidenta Biełarusi nie mohuć być pryznanymi mižnarodnaj supolnaściu. «Partyja BNF uskładaje adkaznaść za razhon mirnaj manifiestacyi na biełaruskija ŭłady. My ličym, što vyniki vybaraŭ nie mohuć być pryznanyja mižnarodnymi strukturami, a taksama zaklikajem vykazać salidarnaść z usimi zatrymanymi», — zajaviŭ Kastusioŭ.

Taksama pa BT byŭ pakazany tekst zajavy Dźmitryja Usa, ale sam kandydat pierad kamierami nie źjaviŭsia.

• 0
• 0
• 0
• 0
• 0
• 0
• 0
• 0