«Bieź jakoha-niebudź čytelnaha syhnału z boku Rasiei my nie sastupim», – zapeŭniła ministarka Fatyha.
Varšava pa-raniejšamu nie daviaraje Bruselu (Eŭrakamisii) prava vieści pieramovy z Rasiejaj ad imia krainaŭ Eŭropy. Pieramovy z Rasiejaj pra novaje pahadnieńnie ab supracoŭnictvie majuć pačacca 24 listapada ŭ Chelsynki na aficyjnaj naradzie ES–Rasieja.
Ciapier niemaviedama, ci pieramovy ŭvohule pačnucca i ci narada maje sens, bo polskaja minictarka zamiežnych spraŭ Hanna Fatyha pastaviła veta na źmiest mandatu.
Polšča žadaje, kab EZ najpierš schiliła Rasieju spynić embarha na impart polskaha miasa i ratyfikavać Eŭrapiejskuju enerhietyčnuju Chartyju, jakaja b davała eŭrapiejskim firmam dostup da rasiejskaj enerhatranzytnaj infrastruktury.
Polšča čakaje, što jašče da sustrečy EZ–Rasieja Maskva daść «palityčny syhnał» hatoŭnaści prypynić embarha.
Choć palakaŭ ustrymalisia padtrymać inšyja krainy, navat tyja, jakija ŭ dušy całkam pahadžajucca z polskimi patrabavańniami, naprykład, Litva. Litoŭski ministar zamiežnych spravaŭ, darečy, były pasoł u Miensku, Piatras Vajtekunas tolki prapanavaŭ kampramisnuju versiju mandatu. Fatyha jaho nie padtrymała.
Pakolki ŭsie rašeńni, što majuć dačynieńnie da zamiežnaj palityki EZ, pavinny prymacca adnahałosna, było abvieščana, što mandat budzie abmiarkoŭvacca Kamitetam pastajannych pradstaŭnikoŭ (h.zv. COREPER) ci na ŭzroŭni ambasadaraŭ EZ. Niaviedama, ci jany pačnuć dyskutavać pra heta ŭžo ŭ sieradu ci na nastupnym tydni, na čarhovym pasiedžańni Kamitetu.
«Zusim nie abaviazkova pahadnieńnie budzie pryniataje ŭ sieradu. Bieź jakoha-niebudź čytelnaha syhnału z boku Rasiei my nie sastupim», – zapeŭniła ministarka Fatyha.
Eŭrakamisija padkreślivaje, što Polšča adna ŭ svaich patrabavańniach nie paddavacca rasiejskamu nacisku i bolš rašuča adstojvać nacyjanalnyja intaresy. «My ŭsie zaklikali Polšču, kab jana admoviłasia ad svajho pratestu», – kamentavała paśla zakančeńnia pieramovaŭ kamisar EZ Benita Ferera-Valdner.
Eksperty Eŭrakamisii dakazvajuć, što Polšča stavić pad udar siabie (i, mahčyma, kolki inšych dziaržavaŭ, jakija zacikaŭlenyja ŭ novaj damovie), ale nie Rasieju.
Bo Maskva i tak nia vielmi zacikaŭlenaja va ŭzhadnieńni novaj damovy. I jana peŭna nie pahadzicca na ratyfikacyju enerhietyčnaj Chartyi.
«Adzinaje, čaho ciapier moža dasiahnuć Polšča, padtrymlivajučy veta, heta pakazać, što Eŭraźviaz padzieleny, -- dakazvajuć pradstaŭniki Eŭrakamisii. -- Albo, prosta kažučy, što Polšča maje asobnaje mierkavańnie. Nia dumaju, što Polšča zdolnaja skasavać toje, na što pahadzilisia 24 astatnija dziaržavy.
Polskija dyplamaty śćviardžajuć, što Brusel sam častkova adkazny za veta, bo Kamisija zrabiła zamała, kab schilić Rasieju da źniaćcia embarha. «Kali b Eŭrakamisija pavodziłasia inakš, dyk inšaja była b i našaja pazycyja», – śćviardžaje polski dyplamat.
Kamientary