Rymašeŭski maje namier prasić Łukašenku ab asabistaj sustrečy

Były kandydat u prezidenty sustaršynia arhkamiteta pa stvareńni BCHD Vital Rymašeŭski maje namier źviarnucca da Alaksandra Łukašenki z prośbaj ab asabistaj sustrečy.

Pra heta jon zajaviŭ 4 studzienia hrupie biełaruskich i litoŭskich žurnalistaŭ.

Nahadajem, Rymašeŭski byŭ zatrymany 19 śniežnia paśla akcyi apazicyi ŭ Minsku. Razam z šaściu inšymi eks-kandydatami ŭ prezidenty jon abvinavačvajecca ŭ arhanizacyi masavych biesparadkaŭ. Artykuł 293 Kryminalnaha kodeksa praduhledžvaje da 15 hadoŭ pazbaŭleńnia voli. Sa śledčaha izalatara KDB Rymašeŭskaha vypuścili ŭ noč na 1 studzienia pad padpisku ab niavyjeździe, paśla taho jak jon napisaŭ tłumačalnuju zapisku na imia Łukašenki. 4 studzienia palityk mieŭ namier dać pres-kanfierencyju, ale vymušany byŭ źmianić svaje płany. U KDB Rymašeŭskaha papiaredzili: u vypadku praviadzieńnia pres-kanfierencyi jaho znoŭ zaklučać pad vartu.

«Kali b pres-kanfierencyja adbyłasia, ja b źviarnuŭsia da Łukašenki z zaklikam ab sustrečy.

Spadziajusia, što zmahu skazać usio, što ja chaču skazać, asabista Łukašenku», — paviedamiŭ siońnia Rymašeŭski.

Jon paćvierdziŭ, što napisaŭ tłumačalnuju zapisku na imia Łukašenki. «Na žal, raskazać, pra što jana, i kamientavać jaje ja zaraz nie mahu, bo daŭ padpisku ab nierazhałošvańni. Ale chaču skazać usim svaim niadobrazyčliŭcam: „Nie radujciesia“, a ŭsim svaim prychilnikam: „Nie chvalujciesia“. Maja pazicyja da 19 śniežnia, 19-ha i paśla 19-ha zastałasia niaźmiennaj. I nijakija listy, nijakija tłumačeńni, nijakija maje pakazanni nie supiarečyli hetaj pazicyi.

Ja hatovy nieści adkaznaść za svaje słovy i pierad Boham, i pierad ludźmi», — padkreśliŭ palityk.

Svajoj pieršačarhovaj zadačaj Rymašeŭski ličyć vyzvaleńnie ŭsich zatrymanych 19 śniežnia. «Ja nie liču siabie na voli, ja nie budu adčuvać siabie svabodna i ščaśliva, pakul choć adzin z maich kalehaŭ znachodzicca ŭ źniavoleńni. Dla mianie adna z samych hałoŭnych metaŭ — ja pamiataju heta kožny dzień — zrabić usio mahčymaje, kab jany vyjšli na svabodu «, — zajaviŭ jon.

Pavodle słovaŭ eks-kandydata, źniavolenym zaraz patrebna pierš za ŭsio salidarnaść. «Palitviaźniaŭ treba padtrymlivać, padtrymlivać i jašče raz padtrymlivać. Mnohija dziejańni, jakija byli ažyćcioŭleny, byli pravilnymi. Ja navat nie viedaju, byŭ by ja na voli, zmoh by ja zrabić bolš i lepš, čym było zroblena inšymi ludźmi», — skazaŭ Rymašeŭski.

Jon «byŭ pryjemna ździŭleny tym uzroŭniem samaarhanizacyi ludziej, uzroŭniem salidarnaści, jakaja prajaviłasia niahledziačy na toje, što ŭsie lidery znachodziacca ŭ źniavoleńni». «Nadzieja nie ŭ lidarach, a jak raz u hetych ludziach. Kali jość takija ludzi, jakija zdolnyja sami dziejničać, samaarhanizavacca, — u hetym nadzieja, u hetym budučyniu», — pierakanany palityk.

• 0
• 0
• 0
• 0
• 0
• 0
• 0
• 0