Juryst: Nie majuć prava zvalniać za prahuły ŭ vyniku zatrymańnia

Padčas akcyi pratestu 19 śniežnia byli zatrymanyja, a zatym padvierhnutyja administracyjnamu aryštu šmat pracujučych hramadzian, studentaŭ i navučencaŭ.

Z hetaj nahody prafsajuzny juryst Uładzimir Łazoŭski tłumačyć:

«Pavodle p. 5 art. 42 Pracoŭnaha kodeksa Respubliki Biełaruś (dalej — PK) pracaŭnik moža być zvolnieny za prahuł (u tym liku za adsutnaść na pracy bolš za try hadziny na praciahu pracoŭnaha dnia) biez pavažlivych pryčyn.

Zvalnieńnie pavodle p. 5 art. 42 PK mahčymaje pry adnačasovaj najaŭnaści dźviuch prykmiet: nieźjaŭleńnie na pracy na praciahu ŭsiaho pracoŭnaha dnia abo bolš za try hadziny i adsutnaść dla hetaha pavažlivych pryčyn. Kali adnoj z hetych prykmiet niama, to p. 5 art. 42 PK užyvać nielha.

Skasavańnie pracoŭnaj damovy z pracaŭnikom pavodle p. 5 art. 42 PK mahčymaje tolki ŭ vypadku, kali jaho adsutnaść na pracy źjaŭlajecca niezakonnym, h.zn. kali takija pavodziny pracaŭnika nie adpaviadajuć pracoŭnamu zakanadaŭstvu i zasnavanaj na im pracoŭnaj damovie i źjaŭlajecca parušeńniem pracoŭnych abaviazkaŭ.

Padčas razhladu sprečak ab skasavańni pracoŭnaj damovy pavodle p. 5 art. 42 PK, orhan pa razhladzie pracoŭnaj sprečki pavinien uličvać pavažlivyja pryčyny adsutnaści na pracy. Najaŭnaść pavažlivaj pryčyny abaviazany dakazać pracaŭnik. Zakanadaŭstva nie akreślivaje paniatak pavažlivaj pryčyny, ale daje pieralik abstavinaŭ, jakija mohuć razhladacca ŭ jakaści pavažlivych. U kožnym kankretnym vypadku sud, razhladajučy spravu, pavinien vyznačyć, ci źjaŭlajecca pryčyna adsutnaści na pracy pavažlivaj.

Na praktycy da pavažlivych pryčynaŭ adsutnaści na pracy adnosiać: chvarobu pracaŭnika, dohlad chvoraha člena siamji, zalivy i pažary ŭ kvatery, stychijnaje biedstva, darožna- transpartnyja zdareńni, administracyjnyja aryšty i da t.p.

Pavodziny pracaŭnika mohuć być kvalifikavanyja jak prahuł tolki pry najaŭnaści viny pracaŭnika. Nie źjaŭlajecca vinoj i nie moža być kvalifikavanaja jak prahuł adsutnaść na pracy ŭ suviazi sa źmienaj hrafika abo rasparadku pracy, pra jakija pracaŭnik nie viedaŭ i nie pavinien byŭ viedać, adsutnaść na pracy ŭ suviazi z aryštam za administracyjnaje pravaparušeńnie.

Pavažlivyja pryčyny adsutnaści na pracy mohuć paćviardžacca adpaviednym dakumientam (balničnym listkom, pozvaj u vajenkamat, sud, prakuraturu, daviedkaj ab zatrymańni i h.d.), a taksama inšymi srodkami dakazvańnia i dokazami, pieraličanymi ŭ art. 178 Hramadzianskaha pracesualnaha kodeksa Respubliki Biełaruś, naprykład, pakazańniami śviedak.

Skasavańnie pracoŭnaj damovy pavodle p. 5 art. 42 PK dapuskajecca tolki z zachavańniem ahulnych praviłaŭ nakładańnia dyscyplinarnych spahnańniaŭ. Da ŭžyvańnia dyscyplinarnaha spahnańnia najmalnik abaviazany zapatrabavać piśmovaje tłumačeńnie pracaŭnika (č. 1 art. 199 PK). Adnak zhodna z p. 32 Pastanovy plenuma nievykanańnie najmalnikam hetaha abaviazku i nieatrymańnie takoha tłumačeńnia nie źjaŭlajecca padstavaj dla skasavańnia dyscyplinarnaha spahnańnia, kali fakt parušeńnia pracoŭnaj dyscypliny paćvierdžany najmalnikam pradstaŭlenymi sudu dokazami. Dyscyplinarnaje spahnańnie afarmlajecca zahadam (rasparadžeńniem), pastanovaj najmalnika, jakoje z ukazańniem matyvaŭ dajecca pracaŭniku pad podpis u piacidzionny termin.

Pracaŭnik, nie aznajomleny z zahadam (rasparadžeńniem), pastanovaj ab dyscyplinarnym spahnańni, ličycca tym, chto nie maje dyscyplinarnaha spahnańnia (č. 5 i 6 art. 199 PK).

Skasavańnie pracoŭnaj damovy ź inicyjatyvy najmalnika robicca paśla papiaredniaha, ale nie paźniej, čym za dva tydni, paviedamleńnia adpaviednaha prafsajuza. U vypadkach, praduhledžanych kalektyŭnymi damovami, pahadnieńniami, skasavańnie pracoŭnaj damovy ź inicyjatyvy najmalnika moža adbycca tolki z papiaredniaj zhody adpaviednaha prafsajuza (č. 2 art. 46 PK).

Kali ŭ dačynieńni da vas parušanaja pracedura vyšejahučanych dziejańniaŭ abo vas zvolnili, niahledziačy na pradstaŭlenyja dakumienty ab administracyjnym aryšcie, vy možacie źviarnucca ŭ Kamisiju pa pracoŭnych sprečkach vašaha pradpryjemstva, arhanizacyi ci niepasredna ŭ sud z zajavaj ab adnaŭleńni na pracy».

Pry isnaj sistemie ŭłady ciažka raźličvać na sudy. Ale pry pracoŭnych sprečkach našym jurystam udajecca abaraniać pracaŭnikoŭ u sudovych razhladach i vyjhravać spravy ŭ najmalnikaŭ.

• 0
• 0
• 0
• 0
• 0
• 0
• 0
• 0