Jak pavodzić siabie padčas dopytu

Kab samomu nie parušyć zakon i pieraduchilić niezakonnyja dziejańni ŭ dačynieńni da vas.

Telefonnyja zaprašeńni

Pačalisia telefanavańni z vyklikami na razmovy ŭ pravaachoŭnyja orhany. Adrazu zapytajcie imia, proźvišča, pasadu čałavieka, jaki telefanuje. Vyklik pa telefonie nie praduhledžany zakanadaŭstvam. (Moža być vyklik telefanahramaj, jakaja pavinna fiksavacca ŭ žurnale adpraŭnika i taho, kamu jaje adpraŭlajuć. Kali takich žurnałaŭ niama, to telefanahramu nie prymiecie.) Tamu prapanujcie surazmoŭcu aformić vyklik aficyjna. Kali pačynajuć pahražać pa telefonie, skažycie, što napišacie skarhu ŭ prakuraturu.

Navat kali da vas pryjšli na pracu ci vučobu, patrabujcie aficyjny pazoŭ.

Prysłali pazoŭ

Kali vy razumiejecie, što nie možacie pa surjoznych pryčynach u patrebny čas być va ŭstanovie, u jakuju vyklikajuć, za sutki da pryznačanaha času možacie patelefanavać tudy i paviedamić ab hetym. Ale pa telefonie vy nie abaviazanyja tłumačyć samu pryčynu. Prasicie prysłać pazoŭ na inšy dzień.

Niefarmalnaja razmova

Lepš dla pachodu na dopyt uziać z saboj advakata. Kali jaho nie puskajuć z vami, to adnamu niama čaho tudy chadzić. Vy majecie prava na jurydyčnuju dapamohu ŭ lubym vypadku.

Padčas niefarmalnaj razmovy vašy słovy mohuć aformić u vyhladzie tłumačeńniaŭ. Zhodna z Kryminalna-pracesualnym kodeksam, tłumačeńnie daje ekśpiert, a nie śviedka. Kali vas vyklikali jak śviedku, to abaviazanyja pravodzić dopyt, ale ni ŭ jakim razie nie patrabavać tłumačeńniaŭ. Navat kali ŭ pazovie napisana mienavita takaja farmuloŭka. Treba patrabavać, kab razmova išła pad pratakoł. Sačycie, kab śledčy zapisvaŭ svaje pytańni da taho, jak vy pačali adkazvać. Patrabujcie dasłoŭnaha zapisu vašych adkazaŭ. Vy možacie navat sami zapisvać adkazy.

Na dopycie

Vy nie abaviazanyja davać raśpisku ab nierazhałošvańni «tajamnicy śledstva». Bo ŭsio, što vy havorycie na dopycie, nie źjaŭlajecca tajamnicaj. Vaša admovu padpisać takuju raśpisku moža pryvieści da taho, što pravodzić dopyt uvohule admoviacca. Ale kali vy padpisali taki dakumient, to raskazvać ab akaličnaściach nie možacie.

Pratakoł

U «šapcy» pratakoła dopyta pavinna być paznačana, pa jakoj kryminalnaj spravie vas dapytvajuć. Usie, chto znachodzicca ŭ kabiniecie śledčaha, pavinny być upisanyja ŭ pratakoł. Vam prapanujuć padpisacca ab adkaznaści za admovu ad dačy śviedčańniaŭ i za daču zahadzia iłžyvych śviedčańniaŭ. Heta značyć, zahadzia pradumanaj many. Ale adkaznaści za nienaŭmysnyja pamyłki dapytanaha nie praduhledžvajecca.

Na jakija pytańni možna nie adkazvać

— Jakija tyčacca vas asabista i členaŭ vašaj siamji. Na takija pytańni adkazvaje padazravany, a nie śviedka.

— Na pytańni, jakija navodziać na «patrebny» śledčamu adkaz. U asnoŭnym heta takija, na jakija patrabujecca adkaz «tak» ci «nie». Naprykład, śledčy maje pytacca nie «Vy byli 19 śniežnia na Płoščy?», a «Dzie Vy byli 19 śniežnia?»

— Na pytańni, jaki nie majuć dačynieńnia da spravy.

— Na pytańni, adkazy na jakija patrabujuć pad ciskam (u tym liku psichałahičnym) ci pahrozami.

Mahčymyja pytańni i adkazy na ich možna pačytać tut.

• 0
• 0
• 0
• 0
• 0
• 0
• 0
• 0