Čym biełarusy abaraniajuć Radzimu (fota)

Bolšaść uzoraŭ uzbrajeńnia i vajennaj techniki ŭ biełaruskaj armii tolki ź vialikaj naciažkaj možna nazvać sučasnymi. Daŭno naśpieła nieabchodnaść ich madernizavać ci, jašče lepš, zamianić. Ale na heta banalna nie chapaje hrošaj. U toj ža čas pa niekatorych vidach uzbrajeńniaŭ biełaruskaja armija hladzicca nie horš za nataŭskija siły.

Dziejnaj kancepcyjaj budaŭnictva i raźvićcia Uzbrojenych sił Biełarusi da 2020 hoda praduhledžany pierachod ad etapu rearhanizacyi da etapu intensiŭnaha naroščvańnia bajavych mahčymaściaŭ armii. Praŭda, jość aściaroha, što pastaŭlenyja ŭ kancepcyi zadačy mohuć być albo nie vykananyja ŭ poŭnym abjomie, albo nadoŭha adkładzienyja.

Pryčyny adstavańnia ad hrafiku, na dumku śpiecyjalistaŭ, banalnyja: raście košt raspracoŭki i vytvorčaści novych vidaŭ zbroi i bajavoj techniki, u toj čas jak vydzielenych srodkaŭ chranična nie chapaje.

Jašče adnoj pieraškodaj dla realizacyi pałažeńniaŭ kancepcyi źjaŭlajecca niazdolnaść Rasii zabiaśpiečyć svajho samaha blizkaha sajuźnika nieabchodnaj kolkaściu sučasnych vidaŭ techniki i ŭzbrajeńnia.

Pa śviedčańni pradstaŭnika Ministerstva abarony Biełarusi Piatra Haleźnika, u 2010 hodzie finansavaje zabiaśpiečańnie armii ažyćciaŭlałasia va ŭmovach žorstkich biudžetnych abmiežavańniaŭ. I pačatak vykanańnia biudžetu 2011 hoda nie abiacaje źmienaŭ da lepšaha.

Z vykazvańniaŭ kamandujučaha suchaputnymi vojskami biełaruskaj armii hienierał-majora Alaksandra Nikicina možna zrabić vysnovu, što až da 2020 hoda bujnych zakupak uzbrajeńnia i vajennaj techniki dla hetaha vidu vojskaŭ naohuł nie budzie.

Što da madernizacyi, to ciapier na pradpryjemstvach biełaruskaha VPK viaducca pracy pa ŭdaskanaleńni asnoŭnaha bajavoha tanka T-72B. Dziaržvajenpram asvoiła taksama adnaŭlenčy ramont i madernizacyju reaktyŭnych sistem załpavaha ahniu (RSZA) «Śmierč», «Urahan», «Hrad».

Ciapier zaviaršajecca raspracoŭka aŭtamatyzavanych sistem kiravańnia (ASK) farmavańniami RSZA «Śmierč». U pierśpiektyvie praduhledžvajecca ich vykarystańnie ŭ składzie raźviedvalna-ahniavoj sistemy, jakaja vykarystoŭvaje bieśpiłotnyja avijacyjnyja kompleksy.

Značna bolš mierapryjemstvaŭ zapłanavana vykanać u miežach prahramy ŭdaskanaleńnia supraćpavietranaj abarony krainy.

Havoračy ab pryjarytetnych kirunkach raźvićcia ŭzbrajeńniaŭ, vajennaj i śpiecyjalnaj techniki VPS i SPA, varta asabliva spynicca na bieśpiłotnych avijacyjnych kompleksach (BAK) roznaha pryznačeńnia. Na siońniašni dzień u Biełarusi ŭžo raspracavanyja i vyrablajucca bieśpiłotniki małych pamieraŭ. Hetyja aparaty prajšli vyprabavańni na palihonie Ašułuk (Rasija). Ciapier staić zadača asvoić vytvorčaść bolš bujnych bieśpiłotnych latalnych aparataŭ.

U lik raspracoŭščykaŭ i patencyjnych vytvorcaŭ takich aparataŭ uvachodziać nie tolki arhanizacyi i pradpryjemstvy Dziaržvajenpramu i Minabarony (takich jak 558-y avijaramontny zavod i Vajennaja akademija Respubliki Biełaruś). Značnyja napracoŭki ŭ hetaj halinie maje taksama Minski avijaramontny zavod, padviedamasny Departamientu pa avijacyi Ministerstva transpartu i kamunikacyj.

Raźvićciom hetaha pierśpiektyŭnaha napramku avijacyjnaj techniki zajmajucca i navukoŭcy Nacyjanalnaj akademii navuk Biełarusi. Na bazie Fizika-techničnaha instytuta akademii arhanizujecca sučasnaja vytvorčaść bieśpiłotnych latalnych aparataŭ.

VPS i vojski SPA Biełarusi aktyŭna viaduć zakupku i asvajeńnie bieśpiłotnych latalnych aparataŭ. Na aeradromie «Asaŭcy» (Biaroza, Bresckaja vobłaść) sfarmavany 927-y centr padrychtoŭki i vykarystańnia bieśpiłotnych avijacyjnych kompleksaŭ.

Kali ž kazać pra ŭzbrajeńni i techniku častak SPA jak takich, to bajazdolnaść hrupoŭki najaŭnych u ich rasparadžeńni zienitna-rakietnych kompleksaŭ (ZRK) S-300 užo ŭ najbližejšaj budučyni moža być pavyšanaja za košt ich paetapnaj madernizacyi na adnym z pradpryjemstvaŭ Dziaržvajenpramu ŭ Barysavie.

Razam z dapracavanym S-300 asnovaj SPA krainy na najbližejšyja 10–15 hadoŭ stanuć abnoŭlenyja kompleksy blizkaha i siaredniaha dziejańnia «Asa-AKM» i «Buk-MB». Mahčymaje taksama pryniaćcie na ŭzbrajeńnie zienitnaha rakietnaha kompleksu T38 «Štylet», stvoranaha na bazie raspracavanaj raniej unitarnym pradpryjemstvam «Tetraedr» viersii mabilnaha ZRK «Asa-AKM» — kompleksu «Asa-1T».

Nie zdymajecca z paradku dnia i pytańnie ab zakupcy najnoŭšych rasijskich dalokich zienitnych rakietnych sistem S-400. Nie pieraškodziła b i zakupka sučasnych ZRK blizkaha radyusu dziejańnia «Tor-2 M» dla prykryćcia pazicyj S-400 ad vysokadakładnaj zbroi. Praŭda, na dumku šerahu ekśpiertaŭ i vysokapastaŭlenych pradstaŭnikoŭ biełaruskaha VPK, heta adbudziecca niachutka. Pierš za ŭsio — praź niedachop vytvorčych mahutnaściaŭ u VPK Rasii.

Što da radyjołakacyjnych srodkaŭ, srodkaŭ radyjoelektronnaj raźviedki i procidziejańnia, to tut u pieršuju čarhu varta nazvać madernizavanyja radyjołakacyjnyja stancyi P-18BM i PRV-16BM. Dapracoŭka padvysiła ich dakładnasnyja charaktarystyki, uzrovień abarony ad aktyŭnych i pasiŭnych pieraškod, ekspłuatacyjnuju nadziejnaść. Na padychodzie — ekśpierymientalnyja ŭzory całkam novych RŁS «Uschod-D».

U liku novych srodkaŭ radyjoelektronnaj baraćby čaściej za ŭsio zhadvajucca stancyi radyjopieraškod R-934UM «Udar» i R-378UM «Ukoł», kompleks pastanoŭki pieraškod łaziernym sistem naviadzieńnia «Sapfir», kompleks radyjopieraškod sistemie hłabalnaj radyjonavihacyi GPS «Navies-U».

Najnoŭšym srodkam radyjotechničnaj abarony avijacyjnaj techniki źjaŭlajecca kompleks biełaruskaj raspracoŭki «Satelit». Heta bartavaja aparatura indyvidualnaj radyjotechničnaj abarony latalnaha aparata ad vysokadakładnaj radyjokiravanaj zbroi z aktyŭnymi hałoŭkami samanaviadzieńnia kłasaŭ «pavierchnia — pavietra» i «pavietra — pavietra».

Havoračy pra piłatavanuju avijacyjnuju techniku, varta ŭ pieršuju čarhu zhadać pra ŭžo realizavanyja ŭ Biełarusi prahramy madernizacyi źniščalnikaŭ MiH-29 da ŭzroŭniu MiH-29BM (što prykładna adpaviadaje rasijskaj prahramie MiH-29 SMT2) i Su-27UB da ŭzroŭniu Su-27UBM (rasijski anałah — Su-30K). Akramia taho, viertaloty Mi-8 madernizujucca da ŭzroŭniu Mi-8 MTK01, jakija, u pryvatnaści, prystasavanyja dla načnych bajavych dziejańniaŭ. Pryznačanaja dapracoŭka šturmavikoŭ Su-25.

Akramia taho, zajaŭlena ab namiery pavialičyć moc biełaruskich VPS za košt zakupki ŭ Rasii sučasnych šmatfunkcyjanalnych bajavych samalotaŭ, jakija majuć pašyranyja mahčymaści dla naniasieńnia ŭdaraŭ pa naziemnych mišeniach (nazyvalisia Su-30 i MiH-35).

Miarkujecca zakuplać i navučalna-trenirovačnyja samaloty. Tak, u dadatak da ŭžo najaŭnych 10 mašyn L-39, nabytych u 2006 hodzie va Ukrainie, Biełaruś płanuje papoŭnić park jašče dziasiatkam takich ža samalotaŭ. U bolš addalenaj pierśpiektyvie pranujecca nabyć eskadryllu navučalna-bajavych samalotaŭ «Jak-130».

Vystupajučy 8 śniežnia 2010 na čaćviortym aficerskim schodzie Uzbrojenych sił Biełarusi, ministr abarony Juryj Žadobin zajaviŭ, što z 2006 hoda na ŭzbrajeńnie biełaruskaj armii pryniata 80 uzoraŭ uzbrajeńnia i vajennaj techniki. Značnaja častka ich pryznačanaja dla VPS i vojskaŭ SPA, u tym liku aŭtamatyzavanyja sistemy kiravańnia vojskami typu «Bor» i aŭtamatyzavanaja sistema apracoŭki palotnaj infarmacyi «Dźvina». Heta dazvoliła stvaryć adzinuju aŭtamatyzavanuju sistemu kiravańnia VPS i vojskami SPA krainy.

Adnak ciapier płany pa ŭdaskanaleńni i zakupkach uzbrajeńnia i vajennaj techniki dla biełaruskaha vojska mohuć apynucca pad pahrozaj zryvu praz ekanamičnyja ciažkaści.

Zaraz razhledzim, jakija jakasnyja paramietry novych i madernizavanych uzoraŭ techniki, što pastupili ci ŭ najbližejšy čas pastupiać na ŭzbrajeńnie biełaruskaj armii, u paraŭnańni z nataŭskimi anałahami.

Tut karcina nieadnaznačnaja. Naprykład, taktyčna-techničnyja dadzienyja tanka T-72B navat paśla jaho dapracoŭki buduć istotna sastupać adpaviednym pakazčykam bronietechniki NATA. Značna lepšaja situacyja z reaktyŭnymi sistemami załpavaha ahniu: paśla madernizacyi jany jašče doŭha buduć zastavacca ŭ šerahu najlepšych suśvietnych uzoraŭ. Što da radyjołakacyjnaj techniki i srodkaŭ REB, a taksama ASK, to jany ŭ cełym adpaviadajuć patrabavańniam viadzieńnia bajavych dziejańniaŭ u ciapierašnich umovach.

Zienitna-rakietnyja kompleksy S-300 paśla ŭdaskanaleńnia (nie kažučy ŭžo pra najnoŭšyja Z-400) u budučyni nie sastupiać pieršynstva ŭ svaim kłasie. Praŭda, Zachad nad takimi sistemami raniej surjozna i nie pracavaŭ — z pryčyny inšaj kancepcyi pabudovy SPA: tam asnoŭnuju staŭku robiać na źniščalniki.

Naŭrad ci možna kazać pra toje, što vyrablanyja ŭ Biełarusi bieśpiłotniki chacia b nablizilisia da ŭzroŭniu sučasnych amierykanskich i izrailskich raspracovak u hetaj halinie. Što da piłatavanych bajavych samalotaŭ, to ciapierašnija tempy ich dapracoŭki vidavočna niedastatkovyja. Najaŭnyja prahramy madernizacyi ryzykujuć sastareć jašče ŭ pracesie ich realizacyi.

• 0
• 0
• 0
• 0
• 0
• 0