Ekśpiert prahnazuje, što da červienia ceny nie vyrastuć.
Biełarusaŭ apanoŭvaje cukrovaja lichamanka. Paśla čarhovaha paviedamleńnia pra pavyšeńnie roźničnaj cany na cukar u kramach puściejuć palicy. Padaražańnie cukru robicca temaj dla haračych razmovaŭ u hramadskim transparcie.
Menedžar adnaho z cukrovych kambinataŭ Biełarusi na ŭmovach ananimnaści patłumačyŭ «NN», čamu naš cukar dvojčy padaražeŭ ad pačatku hoda i kali čakać nastupnaha rostu cenaŭ.
Troški bolš za pałovu ŭsiaho cukru ajčynnyja kambinaty vyrablajuć ź impartnaj syraviny, jakuju Biełaruś nabyvaje praź Ńju-Jorkskuju biržu. Za apošni hod ceny na tryśnioh rezka vyraśli — kali ŭ śniežni tona syrcu kaštavała pryblizna $680, to ŭ studzieńskich kantraktach źjavilisia ličby ŭ $750-800.
Usiaho razam ź pieravozkaj, mytami i pierapracoŭkaj sabiekošt tony cukru dla kambinataŭ składaje kala $1000-1100, a ad prodažaŭ na ŭnutranym rynku jana atrymlivajuć na siońnia kala $620.Dziakujučy rostu cenaŭ, cukrovym kambinatam udałosia skaracić hety razryŭ, ale jon pa-raniejšamu zastajecca istotnym. Zachoŭvać rentabielnaść dazvalaje praca na zamiežny rynak.
Ceny na tryśnioh vyraśli pa ŭsim śviecie. Pryčyna — pavodki ŭ Indyi i Pakistanie i suša ŭ Brazilii i Rasii letaś, a taksama sioletnija zalevy ŭ Aŭstralii, jakaja pastaŭlaje 1/3 suśvietnaha abjomu cukrovaj syraviny. Takim čynam, asnoŭnaja pryčyna rostu cenaŭ na cukar u Biełarusi — ekanamičnaja.
Choć biez palityčnaha składniku nie abyšłosia: u śniežni minułaha hodu kambinatam zahadali trymać ceny da studzienia — vybary ž u krainie!
Zatoje zarabiŭ na prostych spažyŭcach handal. Kali stała viadoma pra druhoje padaražańnie, dziaržaŭnyja kramy zataryli cukram składy, ale na pryłaŭki jon trapiŭ užo pa novaj canie.
Čaho čakać ad cenaŭ na cukar u bližejšy čas? Ekśpiert miarkuje što da červienia cukar bolš nie padaražeje. Dalej usio budzie zaležyć ad novaha ŭradžaju tryśniahu. A taksama ad cenaŭ na enierhanośbity, što pastaŭlajucca z Rasii.
Kamientary