Mova malunkaŭ Zlango zamienić SMS
Nadychodzić čas Zlango – malunkavaj movy SMS. Ciapier zamiest taho, kab marudna vybirać litary na klavijatury telefonu, čałaviectva budzie karystacca tematyčnymi ikonkami.
Hijerohlify dla mabilnych telefonaŭ byli vynajdzienyja ŭ Izraili, i karystajucca imi pakul što tolki abanenty izraelskich mabilnych sietak. Adnak u chutkim časie Zlango pašyrycca i na inšyja krainy.
Jak śćviardžajuć stvaralniki, Zlango - prostaja, zrazumiełaja i nieskładanaja dla vyvučeńnia. Dastatkova hadziny, kab zasvoić značeńnie ikonak. Jany padzielenyja na niekalki katehoryjaŭ: ludzi, dziejańni, miescy, emocyi, čas, dumki i inš. Ikonki hruntujucca na symbalach, ukaraniełych u kultury. Naprykład, lebiedź – heta «pryhožy», brydkaje kačania – «brydki». Mozh aznačaje «razumny», pierakreśleny mozh – «durny». Słova «skazaŭ» – heta dymok padobny da taho, što malujuć u komiksach, a «ty» – čałaviek, jaki pakazvaje palcam na taho, chto hladzić, vodhałas viadomaha plakatu z časoŭ II suśvietnaj vajny «A ci ŭstupiŭ ty ŭžo ŭ vojska?»
Na dumku vynachodnikaŭ, znaki Zlango – intuityŭnyja, zrazumiełyja ŭ šmat jakich kulturach i dastatkova krychu ŭjaŭleńnia, kab ich zrazumieć. Jajka – heta «novy», serca – «kachańnie», «pab» – chatka z kuflem piva źvierchu.
- U Zlango – zvyš 200 ikonak. Ź ich dapamohaj možna vykazać amal usio sapraŭdy fajnym čynam – kaža Joŭ Łorč (Yoav Lorch), dyrektar firmy «Zlango», što i prapanavała ŭniversalnuju movu dla mabilnych telefonaŭ.
Stvaralniki nastrojenyja aptymistyčna. Na ich dumku, dastatkova krychu dośviedu ŭ razhadvańni rebusaŭ, kab arhientyniec moh parazumiecca z kitajkaj pry dapamozie Zlango. Novaja mova dapamahaje vykazać i davoli składanyja rečy. Na internet-staroncy zlango.com źmieščanaja historyja Adama i Jevy i kazka pra Čyrvony Kapturok.
Nazva "Zlango" pačynajecca ź litary "Z", u honar našaha ziemlaka Ludvika Zamenhofa – vynachodnika movy esperanta. Rešta nazvy pachodzić z anhielskaj lingo – žarhon, słenh i language – mova.
Kamientary