Śviedčańni vidavočcy: Jak zatrymlivali Daškieviča i Łobava

U Siecivie źjaviŭsia videarolik, u jakim Dzianis Łazar raskazvaje pra padziei 18 śniežnia.

Za kolki dzion da suda nad Źmitrom Daškievičam i Eduardam Łobavym niezarehistravany «Małady front» padrychtavaŭ videarolik ź śviedčańniami Dzianisa Łazara. U im jon raskazvaje pra padziei 18 śniežnia, kali jaho z Daškievičam i Łobavym zatrymali pa padazreńni ŭ chulihanstvie.

Dzianis Łazar raskazvaje, što 17 śniežnia jon pryjechaŭ u Minsk, kab u dzień vybaraŭ udzielničać u mitynhu razam ź inšymi «maładafrontaŭcami». Pa jaho słovach, u noč na subotu jon i jaho siabry zaŭvažyli sačeńnie za kvateraj, jakuju jany zdymali. Vyrašyli jaje pakinuć. U subotu ŭ abied sieli ŭ aŭtobus, jaki kiravaŭsia z vuł. Panamarenki ŭ bok Malinaŭki. Praz dva prypynki zaŭvažyli, što za imi sočać, vyjšli z aŭtobusa i pajšli ŭ dvary.

Tam da ich padyšli čatyry čałavieki. Spytali ŭ Daškieviča niejki adras i paprasili cyharetu. A ŭśled za hetym pačali jaho źbivać. Udaryli ŭ žyvot. Jon pavaliŭsia na ziamlu. Pavalili i Łobava z Łazaram. Źmitru pačali krucić ruki, a Dzianisu naciahnuli na vočy šapku. Jon kaža, što z taho momantu ničoha nie bačyŭ.

Naprykancy rolika nahadvajecca pra toje, što Z. Daškievič i E. Łobaŭ «abvinavačvajucca ŭ asabliva złosnym chulihanstvie, jakoha jany nie ździajśniali».

Raniej, 15 sakavika, namieśnica staršyni niezarehistravanaha «Maładoha frontu» Nasta Pałažanka źviarnułasia z adkrytym listom da sudździ pa spravie Daškieviča Aleny Šylko j hetak zvanych «paciarpiełych» Kanstancina Savickaha j Aleha Małyšava. Pałažanka prosić nie dapuskać biezzakońnia ŭ sudzie i nahadvaje pra maralnuju j kryminalnuju adkaznaść za niespraviadlivy prysud.

Nahadajem, što pavodle viersii śledstva, Daškievič, Łazar i Łobaŭ abvinavačvajucca ŭ ździajśnieńni asabliva złosnaha chulihanstva (č.3 art.339 KK). Nibyta jany 18 śniežnia 2010 hoda z chulihanskich pamknieńniaŭ biespadstaŭna i naŭmysna, kułakami i mietaličnymi abcuhami źbili dvuch hramadzian. Dzianis Łazar zranku 28 śniežnia byŭ adpuščany na volu i ŭsie padazreńni ź jaho byli źniatyja, sprava ŭ adnosinach da jaho spyniena. Abvinavačańnie Dźmitryju Daškieviču i Eduardu Łobavu było pradjaŭlena 6 studzienia. Padčas śledstva jany ŭtrymlivalisia ŭ Žodzinskim śledčym izalatary. 2 sakavika ich pieraviali u minski SIZA № 1 pa vuł. Vaładarskaha.

Im pahražaje pakarańnie ŭ vyhladzie pazbaŭleńnia voli na termin ad 3 da 10 hadoŭ.

Pieršapačatkova sud nad «maładafrontaŭcami» byŭ pryznačany na 21 sakavika, ale potym byŭ pieraniesieny na 22 sakavika — dzień pakarańnia śmierciu Kastusia Kalinoŭskaha.

• 0
• 0
• 0
• 0
• 0
• 0
• 0
• 0