U Hłybokim prajšła dazvolenaja ŭładami akcyja salidarnaści z palitviaźniami
Za pikietoŭcami naziraŭ zahadčyk idealahičnaha adździełu Michaił Čarapkoŭski.
Na placoŭku kala rajonnaha Domu kultury z partretami palitźniavolenych vyjšli try miascovyja aktyvisty. Akcyja była dazvolena rajvykankamam, i jaje kantralavaŭ asabista zahadčyk idealahičnaha adździełu Michaił Čarapkoŭski.
Jašče da pačatku imprezy placoŭku, jakuju rajonnyja ŭłady vyznačyli dla praviadzieńnia masavych akcyj, ačapili pałasataj stužkaj. Zahadčyk idealahičnaha adździełu Hłybockaha rajvykankamu spadar Čarapkoŭski patłumačyŭ, što mienavita ciapier, u subotu, u rajcentry pravodzicca dobraŭparadkavańnie darohi.
Prajezd pa vulicy Kamunistyčnaj byŭ pierakryty, i miascovyja aktyvisty miarkujuć, što heta niezdarma: placoŭka i tak niešmatludnaja, a ŭ vyniku «ramontnych rabot» akcyju salidarnaści z palitviaźniami zmahli ŭbačyć nia tak šmat ziemlakoŭ, jak było b pažadana.
Zajaŭku na praviadzieńnie akcyi padavaŭ u rajvykankam aktyvist Jarasłaŭ Biernikovič. Siońnia jon vyjšaŭ ź plakatam, dzie byŭ partret Uładzimiera Niaklajeva i nadpis «Try miesiacy pad aryštam. Za što?»
«Da siońniašniaj akcyi ŭłady padrychtavalisia — ź dziaviataj ranicy byŭ zabaronieny prajezd pa vulicy Kamunistyčnaj, da dazvolenaj placoŭki padahnali budaŭničuju techniku, jakaja prastojvała z ranku i pačała pracavać ad pačatku akcyi, a zahadčyk idealahičnaha adździełu čakaŭ u mašynie, pakul my raspačniem mierapryjemstva i prysutničaŭ da jaho zakančeńnia».
Pikietoŭcy pastavili namiot i trymali partrety źniavolenych. Jarasłaŭ Biernikovič zapaliŭ śviečki na znak salidarnaści.
Da pikietoŭcaŭ minaki padychodzili z ahladkaj, niekatorych vidavočna biantežyła prysutnaść hałoŭnaha rajonnaha ideolaha. Ale niekatoryja kamentavali źniavoleńnie kandydataŭ u prezydenty dy inšych aktyvistaŭ dosyć adkryta. Da prykładu, 18-hadovy Vital: «Ja liču, što heta niespraviadliva. Ludzi prosta vykazali svaju dumku. I za heta — "sadžać"? Tak rabić niapravilna».
Akcyja praciahvałasia kala dźviuch hadzin. Uvieś hety čas pobač ź pikietoŭcami znachodziŭsia zahadčyk idealahičnaha adździełu, a taksama juryst rajvykankamu. Aktyvisty razdavali minakam aŭdyjodyski ź pieśniami Ŭładzimiera Niaklajeva.
A naprykancy akcyi rajonny ideolah paprasiŭ uziać na pamiać fatazdymki palitźniavolenych — Mikoły Statkieviča, Iryny Chalip i Alaksandra Fiaduty.
Ciapier čytajuć
Palčys, Andrejeva, Łojka i inšyja imiony — paśla vizitu amierykanskich dypłamataŭ u Minsk vyzvalili 250 palitviaźniaŭ12
Kamientary