Viktar Šałkievič: Kali čałaviek jeść adnu bulbu, ź jaho vyraście narmalnaja asoba?

Viečaram 2 krasavika u Pałacy kultury Minskaha aŭtazavoda pry padtrymcy Polskaha instytuta prajšoŭ kancert-prezientacyja pieršaj knihi prozy biełaruskaha barda i aktora Viktara Šałkieviča.

Debiutnaja kniha Šałkieviča atrymała nazvu «Requiem pa niepatrebnych rečach». Heta kniha ŭspaminaŭ, ilustravanaja zdymkami z pryvatnaha archiva aŭtara. Kniha składajecca z 22 nievialikich ese, pryśviečanych niepatrebnym rečam, jakija znachodziacca pobač, ale raźvitvacca ź imi škada, tamu što jany zanadta šmat značać. Heta ese pra rečy — radyjołu «Urał-57», matacykł «Uschod-2 M», hitaru, padaranuju baćkami, chleŭ na rodnaj siadzibie i baćkoŭskuju papruhu, jakija sfarmiravali aŭtara jak asobu.

Svajo vystupleńnie bard nazvaŭ «Urał-57». Kancert składaŭsia z kampazicyj, jakija aŭtar čuŭ u dziacinstvie i jakija pieradajuć atmaśfieru 1960-ch — 1970-ch hadoŭ. U prahramu ŭvajšli jak polskija, rasijskija kampazicyi taho času, tak i aŭtarskija pieśni Šałkieviča.

Paśla kancerta Šałkievič adkazaŭ na pytańni karespandenta BiełaPAN.

Z čym źviazana, što u prahramie prahučała šmat polskich piesień?

«Kali ŭ nas u siamji źjaviłasia radyjo „Urał-57“, — tłumačyć bard, — my šmat słuchali pieršuju prahramu „Radyjo Varšavy“. Ja adnaho nie razumieju: kali čałaviek jeść adnu bulbu, ź jaho vyraście narmalnaja asoba? Tamu, na moj pohlad, treba słuchać roznaje, ale zastavacca samim saboj — heta samaje hałoŭnaje».

Šałkievič maje namier i nadalej ćviorda trymacca praviła: adzin kancert za hod u Minsku?

«Kali ŭ nas i nadalej budzie tak viesieła — narod staić u čerhach u abmieńniki i maciukajecca, — ja nie viedaju, kolki atrymajecca kancertaŭ, — adkazvaje Viktar. — Ź inšaha boku, arhanizavać kancert — heta składanaja reč: treba ž usio rabić samomu, što adnimaje vielmi mnoha vysiłkaŭ.

Knižku dobruju napisać praściej».

Čamu, na jaho pohlad, jaho abyšli cenzary pry składańni tak zvanaha «čornaha śpisu»?

«U nas usich — svaje darohi, i kožny vybiraje, — kaža Šałkievič. — Ja — čałaviek nie miedyjny, liču, što narmalnyja rečy pavinny daśpiavać u cišyni. Nie viedaju, što tam robicca z zabaronami. Zabaranili značyć zabaranili, takaja ich vola. Takaja ŭ nas kraina».

• 0
• 0
• 0
• 0
• 0
• 0