Rasijskaja FSB choča zabaranić Skype i Gmail, bo nie kantraluje pierapisku na hetych resursach
FSB bačyć u siervisach Skype, Gmail i Hotmail pahrozu nacyjanalnaj biaśpieki
FSB bačyć u siervisach Skype, Gmail i Hotmail pahrozu nacyjanalnaj biaśpiecy i prapanavała ich zabaranić.
Takim čynam, śpiecsłužby pryznali, što nie mohuć kantralavać pierapisku i znosiny na hetych resursach, ale adčuvajuć takuju nieabchodnaść.
Ab nieabchodnaści zabarony Skype i Gmail zajaviŭ načalnik centra abarony infarmacyi i śpiecsuviazi FSB Alaksandr Andreječkin. Pa jaho słovach, śpiecsłužby zaniepakojenyja vykarystańniem siervisaŭ pieradačy dadzienych z prymianieńniem sistem šyfravańnia na asnovie zamiežnych ałharytmaŭ, bačačy ŭ ich patencyjnuju pahrozu biaśpiecy.
«U apošni čas prablema vykarystańnia ŭ sietkach suviazi ahulnaha karystańnia šyfravalnych kryptahrafičnych srodkaŭ — u pieršuju čarhu zamiežnaj vytvorčaści — vyklikaje ŭsio bolšuju zakłapočanaść FSB. Raspaŭsiudžvajucca roznyja prahramnyja srodki, jakija dazvalajuć šyfravać trafik. Heta, u pryvatnaści, takija servisy, jak Gmail, Hotmail i Skype «, — skazaŭ Andreječkin na pasiadžeńni uradavaj kamisii pa fiederalnaj suviazi i technałahičnym pytańniach infarmatyzacyi.
Inšymi słovami, FSB nie maje dostup da pošty Gmail i nie moža kantralavać znosiny pa Skype.«Bieskantrolnaje vykarystańnie takich siervisaŭ moža pryvieści da maštabnaj pahrozy biaśpieki Rasii», — padkreśliŭ pradstaŭnik FSB.
Paśla hetaha pasiedžańnie prachodziła ŭ zakrytym režymie.
Jak rastłumačyŭ pa jaho vynikach namieśnik kiraŭnika Minkamsuviazi Illa Masuch, FSB prapanavała zabaranić u Rasii vykarystańnie hetych siervisaŭ, patłumačyŭšy heta tym, što vykarystańnie ŭ ich sistem šyfravańnia abciažarvaje ažyćciaŭleńnie apieratyŭnych mierapryjemstvaŭ.
«Naprykład, da Gmail dostup z boku pravaachoŭnych orhanaŭ ciapier nie rehłamientavany», — adznačyŭ Masuch.
Tym nie mienš paśla burnaj dyskusii było vyrašana stvaryć mižviedamasnuju pracoŭnuju hrupu, jakaja da 1 kastryčnika pavinna vypracavać prapanovy ŭradu pa ŭrehulavańni pytańnia vykarystańnia kryptahrafičnych srodkaŭ u sietkach suviazi ahulnaha karystańnia.
Masuch ličyć, što da zabarony vykarystańnia hetych siervisaŭ sprava nie dojdzie.
«Hramadzian abmiažoŭvać niejkim techničnym čynam my, napeŭna, nie budziem, — skazaŭ namieśnik ministra. — Pazicyja Minkamsuviazi zaklučajecca ŭ tym, što hramadzianam ničoha nielha zabaraniać, asabliva internet. Možna prapanoŭvać niejkija srodki šyfravańnia, ale jany pavinny być biaspłatnymi».
Jon taksama paviedamiŭ, što pracoŭnaja hrupa budzie składacca z pradstaŭnikoŭ dziaržaŭnych orhanaŭ ułady. Z apierataraŭ mahčymy ŭdzieł tolki «Rastelekama».
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty21
Kamientary