Ekanamičnyja sankcyi ES błakujucca Italijaj, Hrecyjaj, Łatvijaj

Siońnia ŭ Luksemburhu adbyvajecca pasiadžeńnie Rady ministraŭ zamiežnych spravaŭ Eŭraźviazu, na jakim budzie razhladacca i sprava ŭviadzieńnia ekanamičnych sankcyj suprać Miensku.

Adkryvajučy pasiadžeńnie, viarchoŭny pradstaŭnik Eŭraźviazu ŭ pytańniach zamiežnaj palityki Ketryn Eštan skazała:

«Ja pieradała svaje spačuvańni siemjam, jakija stracili svaich lubimych abo majuć paranienych u vyniku taho, što adbyłosia ŭ Biełarusi. My taksama praciahvajem sačyć za hetaj sytuacyjaj».

Maja Kacyjančyč, presavy pradstaŭnik Ketryn Eštan, skazała, što nijakaje kankretnaje rašeńnie pa sankcyjach siońnia nia budzie pryniataje.

Pavodle Kacyjančyč, biełaruskaje pytańnie na siońniašniaj sustrečy ŭ Luksemburhu abmiažujecca aznajamleńniem prysutnych z apošnimi palityčnymi padziejami ŭ Biełarusi.

Dyplamat adnaje z krainaŭ Eŭraźviazu, jaki pažadaŭ zastacca ananimnym, skazaŭ našamu radyjo, što Ketryn Eštan, niahledziačy na adsutnaść niejkaha palapšeńnia sytuacyi ŭ Biełarusi, nie vykazvaje achvoty pryniać bolš žorstkija zachady ŭ adnosinach da biełaruskaha režymu.

Hrupa siabroŭ EZ, u jakoj hałoŭnyja roli adyhryvajuć Čechija, Polšča, Słavaččyna i Švecyja, paśladoŭna vystupaje za pryniaćcie kropkavych ekanamičnych sankcyj suprać Miensku, arhumentujučy taki krok tym, što ŭ Biełarusi siadziać u turmach palitźniavolenyja.

Ale siarod usich siabroŭ EZ niama kansensusu nakont sankcyj. Suprać uviadzieńnia sankcyj vykazvajucca Italija, Hrecyja i Łatvija. Aficyjnaje apraŭdańnie — sankcyja suprać dziaržaŭnych biełaruskich kampanij udarać pa zvyčajnych biełarusach.

Ministar zamiežnych spravaŭ Słavaččyny Mikułaš Dzurynda adkidaje takoje apraŭdańnie, spasyłajučysia na svoj dysydencki dośvied z časoŭ kamunistyčnaj Čechasłavakii. Pavodle Dzuryndy, ćviordy kurs Ronałda Rejhana ŭ adnosinach da kamunistyčnych krainaŭ u 1980-ch nie asłabiŭ, a ŭzmocniŭ antykamunistyčny supraciŭ u hetych krainach.

«Ćviordaja, mocnaja, pryncypovaja pazycyja źjaŭlajecca asnovaj dla patencyjalnych źmienaŭ u Biełarusi. Ja miarkuju, što čym macniej my vystupim suprać režymu Łukašenki, tym bolej nadziei my damo zvyčajnym ludziam», — skazaŭ Dzurynda našamu radyjo.

Niahledziačy na toje, što nijakaje rašeńnie ab sankcyjach suprać Miensku siońnia nia budzie pryniataje, vyhladaje, što dyskusija pa Biełarusi budzie vielmi haračaj.

Zhadany ananimny dyplamat skazaŭ našamu radyjo, što pamiž lahieram prychilnikaŭ i lahieram apanentaŭ kropkavych ekanamičnych sankcyj suprać Miensku čakajecca ŭ Luksemburhu «žorstki» abmien replikami pa hetym pytańni.

• 0
• 0
• 0
• 0
• 0
• 0
• 0
• 0