Hienierał śćviardžaje, što hetyja hrošy vydzialalisia na «dziaržaŭny pieravarot».
Hienierał śćviardžaje, što hetyja hrošy vydzialalisia na «dziaržaŭny pieravarot».
Hienierał Mikałaj Čarhiniec u intervju rasijskamu internet-sajtu Lenta.ru źvinavaciŭ adnaho z kandydataŭ u prezidenty Mikołu Statkieviča ŭ atrymańni hrošaj ad niamieckaha palityka, u pasolstvie Hiermanii. Jon śćviardžaje, što hetyja hrošy vydzialalisia na «dziaržaŭny pieravarot». Kamientujučy žorstkija prysudy Statkieviču, Usu i Sańnikavu jon zajaviŭ, što pa-čałaviečy jamu ich škada, ale «jany musiać być pakaranyja, bo rychtavali pieravarot». I pryvioŭ taki prykład:
«Nas zaprasiŭ niamiecki pasoł, my siadzieli, a nasuprać stajała lusterka. I voś adna niemka, jana i ciapier u palitycy, nie pamiataju, jak jaje zavuć, vyjšła ŭ susiedniuju pakoj i Statkieviču daje pački hrošaj. Ja heta dobra baču svaimi vačyma.A ambasadar kaža: «Nam nikoli nie ŭdasca zrynuć Łukašenku, kali my nie abjadnajem našy siły». Pra mianie jon zabyŭsia!»
U hutarcy Čarhiniec šmat kazaŭ pra ekanamičnyja dasiahnieńni Biełarusi. Pry hetym jon davoli śmieła apieryruje ličbami. Tak, pa jaho słovach, u 2001 hodzie ŭ Biełarusi sabrali 4 miljony ton ziernia, a siońnia 10 miljonaŭ — norma. Dziela spraviadlivaści treba ŭdakładnić, što ŭ 1993 hodzie, pierad prychodam Łukašenki da ŭłady, uradžaj pieravyšaŭ 7,2 młn ton. A ŭ 2010-m — tyja samyja 7 miljonaŭ ton, pryčym pad šumichu i raparty, jakija niaredka supravadžajuć prypiski. Hienierał śćviardžaje taksama, što ŭ 2001-m my radavalisia 3-4 miljonam mietraŭ zbudavanaha žylla, a siońnia budujem 11 miljonaŭ. Nieviadoma, adkul takuju ličbu ŭziaŭ hienierał, ale Biełstat kaža, što sioleta za pieršaje paŭhodździe zbudavana 2,64 młn kv.m. žylla.
Ale najbolš śmieła Čarhiniec vykazaŭsia pra rost piensij u Biełarusi. Jany, nibyta, za apošnija try hady vyraśli ŭ 9 razoŭ(cikava, ci viedajuć pra heta piensijaniery?) Toj ža Biełstat iznoŭ nie pahadžajecca: na kaniec 2008 hoda siaredni pamier piensii pa ŭzroście składaŭ 389 tysiač ($177 pa tahačasnym kursie), na siońnia siaredniaja piensija składaje kala $140 dalaraŭ pa aficyjnym kursie.
Dy heta jašče ničoha. Zhodna z Čarhincom, stypiendyi za 3 hady vyraśli ŭ 16 razoŭ!
U intervju Mikałaj Ivanavič taki pryznaje, što adnoj z pryčyn valutnaha kryzisu stali razdźmutyja zarobki, ale pry hetym usialak vyharodžvaje Łukašenku, narakajučy na jaho pamočnikaŭ.
Kamientary