U ZŠA na pažyćciovaje źniavoleńnie asudžany lidar marmonaŭ-šmatžoncaŭ

Lidar marmonaŭ-mnahažoncaŭ Uoren Džefs asudžany na pažyćciovaje źniavoleńnie za seksualny hvałt nad dźviuma niepaŭnaletnimi dziaŭčatami. Jamu treba budzie pravieści za kratami jak minimum 45 hadoŭ, pierš čym jon atrymaje prava na ŭmoŭna-daterminovaje vyzvaleńnie. Da momantu mahčymaha vyzvaleńnia hałoŭnamu marmonu maje spoŭnicca sto hadoŭ.

Takim čynam, jon atrymaŭ maksimalnaje pakarańnie za svaje złačynstvy. Sud pryniaŭ rašeńnie ŭsiaho za 40 chvilin.

Pažyćciovy termin Džefs atrymaŭ za seksualny hvałt nad 12-hadovaj dziaŭčynkaj i 20 hadoŭ turmy — za hvałt nad 15-hadovaj.

Jon uznačalvaŭ fundamientalisckuju carkvu Isusa Chrysta śviatych apošnich dzion, jakaja prapaviedavała palihamiju jak sposab jadnańnia z Boham. Aficyjnyja cerkvy marmonaŭ admovilisia ad praktyki šmatžonstva ŭ 1890 hodzie pad ciskam urada ZŠA — takaja była ŭmova ŭvachodžańnia štata Juta ŭ skład dziaržavy.

Na minułym tydni prysiažnyja vynieśli abvinavaŭčy vierdykt pa hetaj spravie. Prakuror Eryk Nikałs śćviardžaŭ, što pažyćciovy termin dazvolić abaranić ad Džefsa inšych ludziej.

Paśla vyniasieńnia vierdyktu Džefs zajaviŭ u sudzie, što byŭ pasłany Boham, jaki nibyta paabiacaŭ nasłać na ziamlu «vichuru pravasudździa», kali jaho «pakorny słuha» nie budzie vyzvaleny,

Padčas sudovaha raźbiralnictva prakurory prademanstravali prysiažnym vyniki DNK-ekśpiertyzy, jakija pakazali, što Džefs źjaŭlajecca baćkam dziciaci 15-hadovaj paciarpiełaj. Taksama ŭ sudzie byŭ prajhrany aŭdyjozapis, na jakoj jon damahajecca 12-hadovaj dziaŭčynki.

«Prarok» ličyŭ kaštoŭnaj dla historyi kožnuju chvilinu svajho žyćcia i amal usio zapisvaŭ na dyktafon.

«Kali b śviet viedaŭ, što ja rablu, mianie b paviesili na samym vysokim drevie», — napisaŭ jon u 2005 hodzie ŭ svaim dziońniku, jaki naličvaje tysiaču staronak i byŭ kanfiskavany razam z aŭdyjozapisami padčas pieratrusu na jaho ranča ŭ Techasie.

Na sudzie Džefs śćviardžaŭ, što parušanyja jaho relihijnyja pravy. Jon rehularna pierapyniaŭ praces, admoviŭšysia ad niekalkich advakataŭ, i moŭčki vysłuchaŭ abvinavaŭčy vierdykt. Im byŭ vyklikany ŭsiaho adzin śviedka abarony — carkoŭny starasta, jaki začytaŭ śviatoje pisańnie marmonaŭ.

Fundamientalisckaja carkva Isusa Chrysta śviatych apošnich dzion maje bolš za 10 tysiač paśladoŭnikaŭ, jakija ličać Džefsa pradstaŭnikom Boha na Ziamli.

Jaho ŭpłyŭ na paśladoŭnikaŭ, chutčej za ŭsio, nie asłabnie i paśla źniavoleńnia,

Džefsa sudziać nie ŭpieršyniu. U vieraśni 2007 sud užo pryznaŭ jaho saŭdzielnikam dvuch epizodaŭ zhvałtavańnia byłoj žonki marmonaŭ Elis Uoł. Ale jaho paśladoŭnikaŭ z tych časoŭ mienš nie stała. Džefs vydaŭ zamuž 14-hadovuju Uoł za jaje 19-hadovaha stryječnaha brata ŭ 2001 hodzie. Paźniej jana raskazała, što była suprać ustupleńnia ŭ šlub. Jana pakinuła carkvu ŭ 2004 hodzie, paśla razvodu, i syšła da mužčyny, ad jakoha čakała dzicia. Pavodle jaje słovaŭ, Džefs zabaraniaŭ siabram abščyny hladzieć televizar i čytać što-niebudź, akramia Śviatoha Piśma. «U ich praktyčna niama kantaktu z vonkavym śvietam. Ja nie ździŭlusia, kali jany navat nie viedajuć pra prysud, — skazała jana. — A kali jany heta viedajuć, ja ŭpeŭnienaja, jany vinavaciać u hetym siabie. Heta ich vina… jany nie byli dosyć starannyja i pasłuchmianyja». Mnohija baćki ličać za honar vydać svaich dačok za Džefsa. «Hetaja relihijnaja ŭłada ŭ dziesiać razoŭ bolš mahutnaja, čym usie astatnija», — upeŭnienaja Uoł. Sama jana nazvała pažyćciovaje źniavoleńnie Džefsa «sapraŭdnym cudam».

Džefs uznačaliŭ carkvu ŭ 2002 hodzie, paśla śmierci svajho baćki. «Ja dumaju, što jon relihijny vyčvareniec, — zajaviŭ były marmon Ryčard Chołm, jaki syšoŭ z carkvy ŭ 2003 hodzie, pakinuŭšy ŭ jaje ŭłońni troch žonak i 17 dziaciej. — Jaho kiraŭnictva całkam razburyła ŭsio, što było dobraha ŭ hetaj carkvie».

• 0
• 0
• 0
• 0
• 0
• 0
• 0
• 0