Donald Tusk: Biez dyjałohu z apazicyjaj biełaruski režym nie atrymaje finansavaj dapamohi

Situacyja ŭ Biełarusi i šlachi jaje źmianieńnia, uklučajučy mahčymaść arhanizacyi dyjałohu ŭłady i apazicyi, abmierkavany 6 vieraśnia ŭ Varšavie na sustrečach prem'jer-ministra Polščy Donalda Tuska i ministra zamiežnych spraŭ Radasłava Sikorskaha z hrupaj biełaruskich demakrataŭ.

Jak paviedamiła pres-słužba polskaha ŭrada, na sustrečy Tuska z pradstaŭnikami biełaruskaj apazicyi abmiarkoŭvaŭsia, u pryvatnaści, polski vopyt demakratyzacyi ŭ kancy 1980-ch hadoŭ.

«Polski vopyt kruhłaha stała śviedčyć, što sadzicca i razmaŭlać možna tolki tady, kali vyzvaleny ŭsie palitźniavolenyja», — padkreśliŭ Tusk paśla zakančeńnia sustrečy.

Na pieramovach razmova išła taksama ab mižnarodnaj dapamozie Biełarusi. «Ja zajaviŭ ab svajoj poŭnaj prychilnaści da taho, kab była akazana dapamoha apazicyi dla arhanizacyi dyjałohu z uładami, — skazaŭ polski premjer. — My havaryli taksama ab harantyjach, jakija moža dać Jeŭropa, kab hety mierkavany dyjałoh pamiž apazicyjaj i ŭładaj prynios žadanyja vyniki, naprykład, sapraŭdy svabodnyja vybary ŭ parłamient».

Tusk taksama zajaviŭ, što mahčymaja finansavaja dapamoha Biełarusi budzie zaležać ad źmianieńniaŭ u krainie. «Nie budzie finansavaj dapamohi režymu biez radykalnych źmianieńniaŭ, jakija pavinny abapiracca na viadzieńnie surjoznaha palityčnaha dyjałohu z apazicyjaj», — skazaŭ kiraŭnik polskaha ŭrada.

Jak paviedamlaje pres-słužba polskaha MZS, na sustrečy ź Sikorskim pradstaŭniki biełaruskaj apazicyi vykłali ahulnuju pazicyju nakont lubych pieramoŭ z uładami. «Było padkreślena, što jany mahčymy tolki paśla amnistyi i reabilitacyi ŭsich palitźniavolenych u hetaj krainie. Pradstaŭniki apazicyi padkreślili taksama nieabchodnaść uliku Jeŭrasajuzam jaje hołasu ŭ adnosinach ź biełaruskimi ŭładami», — adznačajecca ŭ paviedamleńni.

Biełaruskija demakraty padziakavali Sikorskamu za jaho pazicyju ŭ dačynieńni da režymu Alaksandra Łukašenki i dapamohu hramadzianskaj supolnaści. Jany zajavili ab nieabchodnaści stvareńnia novaha instrumienta padtrymki demakratyi ŭ krainach — susiedziach ES — Jeŭrapiejskaha fondu za demakratyju.

U sustrečach z Tuskam i Sikorskim uziali ŭdzieł Andrej Dźmitryjeŭ (kiraŭnik vybarčaha štaba kandydata ŭ prezidenty na vybarach-2010 Uładzimira Niaklajeva), Siarhiej Kalakin (staršynia Biełaruskaj partyi levych «Spraviadlivy śviet»), Anatol Labiedźka (staršynia Abjadnanaj hramadzianskaj partyi), Alaksandr Milinkievič (lidar ruchu «Za Svabodu»), Stanisłaŭ Šuškievič (eks-śpikier Viarchoŭnaha Savieta 12-ha sklikańnia, staršynia Biełaruskaj sacyjał-demakratyčnaj Hramady), Alaksiej Janukievič (staršynia Partyi BNF).

• 0
• 0
• 0
• 0
• 0
• 0
• 0
• 0