Zatrymany baćka paciarpiełaj, jaki chadajničaŭ pra pieranos suda

U suviazi z zatrymańniem Alaksandra Krutoha, inšy paciarpieły pad čas vybuchu ŭ mietro Samveł Saakian zajaviŭ, što jon źbirajecca naviedvać usie sudovyja pasiadžeńni, bo nie maje harantyj, što i jaho nie zatrymajuć. Saakian jak i Kruty źjaŭlajecca samym aktyŭnym z udzielnikaŭ pracesu z boku paciarpiełych. Jany padajuć chadajnictvy i aktyŭna zadajuć pytańni.

U kancy siońniašniaha pasiadžeńnia paciarpiełaja Inesa Krutaja chacieła pieradać zajavu sudździ nakont zatrymańnia jaje pradstaŭnika ŭ sudzie, jakim źjaŭlajecca jaje baćka. Sudździa Fiedarcoŭ zajaviŭ, što prymie zajavu tolki zaŭtra, siońnia pasiadžeńnie skončana i demanstratyŭna pakinuŭ zału suda.

Sudździa Fiedarcoŭ nie adreahavaŭ na słovy paciarpiełaj pra toje, što joj ciažka znachodzicca na sudzie, bo jana pryjšła na mylicach i ź ciažkaściu adsiedzieła siońniašniaje pasiadžeńnie. Na zaŭtrašniaje pasiedžańnie jana źjavicca nie zmoža.

Jak paviedamiła Inesa Krutaja «NN», na jaje baćku budzie zaviedziena kryminalnaja sprava pa artykule «Chulihanstva», jakaja praduhledžvaje da troch hadoŭ pazbaŭleńnia voli.

U zajavie da suda Inesa Krutaja patrabuje, kab sud praces byŭ prypynieny da taho momantu, kali jaje baćku vypuściać, taksama patrabuje palityčnaha prytułku dla siabie, maci i baćki, spasyłajučysia na słovy adnaho z pradstaŭnikoŭ abvinavačvańnia, jaki padčas adnaho z pasiadžeńniaŭ na repliki zboku prysutnych u zale adreahavaŭ słovami: «Kali vy takija abaroncy, to siadajcie pobač ź imi».

Zajavu Inesa Krutaja nakiruje poštaj.

Paźniej stała viadoma, što pa nakiravańni prakurora Alaksandr Kruty adpraŭleny ŭ Respublikanski navukova-praktyčny centr psichičnaha zdaroŭja (Navinki). Pra heta svajakam paviedamili ŭ Maskoŭskim RUUS stalicy.

16.46-16.56

Začytvajecca pratakoł dopytu Kanavałava ad 8.06.2011.

Całkam paćviardžaje svaje pakazańni pa vybuchach.

Kanavałaŭ paćvierdziŭ, što pad ciskam daŭ pakazańni pra svaju datyčnaść da vybuchaŭ u 2005 hodzie ŭ Viciebsku. Dadzienyja nijakija jamu śledčyja nie davali. Daviedaŭsia pra ich sa srodkaŭ masavaj infarmacyi. Niekatoryja detali vydumvaŭ. Tak, pra vykarystańnie pry tych vybuchach nožak ad hadzińnikaŭ daviedaŭsia padčas pieratrusu na kvatery jaho siamji.

Paćviardžaje svaju datyčnaść da vybuchu ŭ mietro 11 krasavika 2011 hoda.

16.34-16.46

Začytvajecca pratakoł čarhovaha dopytu Kanavałava.

Daje pakazańni pa fakcie vybuchu ŭ biblijatecy ŭ 2002 hodzie. Byŭ vychadny. Dźviery biblijateki byli zamknionyja. Vybuchovy pakiet Kanavałaŭ zamacavaŭ na aknie. Paśla padpaliŭ ficil. Chviliny praź dźvie adbyŭsia vybuch. Było paškodžana škło – miełasia dzira ŭ im. Pry hetym vybuchu byli Rumiancaŭ i Kavaloŭ. Kanavałaŭ ad hetaha epizodu admaŭlaŭsia. Tamu što dumaŭ, što hetaje złačynstva budzie inkryminavacca Rumiancavu i Kavalovu. Ale kali zrazumieŭ, što dla ich heta nie maje značeńnia, pačaŭ raskazvać.

Letam 2001 hoda razam z Kavalovym u padjeździe adnaho doma ŭzarvali vybuchovy pakiet. Vybucham było vybita akno. Na nastupny dzień paśla vybuchu z Kavalovym viarnulisia na toje miesca, kab pahladzieć.

Raskazvaje jašče pra adzin epizod. Razam z Rumiancavym i Kavalovym padpalili ŭ adnym z padjezdaŭ humovy dyvanok. Było heta letam 2001 hoda. Padvalvaŭ dyvanok niepasredna Kanavałaŭ.

16.23-16.34

Začytvajecca pratakoł dopytu Kanavałava ad 2.06.2011.

Prosiać raskazać pra toje, dzie Kanavałaŭ znachodziŭsia ŭ vieraśni 2005 hoda, kali adbylisia vybuchi ŭ Viciebsku. Nie ličyć, što maje dačyńnie da tych vybuchaŭ.

Padčas pieratrusu na kvatery byŭ doma. Šukali nožki ad budzilnika. Pry sabie milicyjanty mieli fota takich nožak. U baćki Kanavałava znajšli. Paśla šukali reštki vybuchoŭčych rečaŭ. U pracesie pieratrusu Kanavałaŭ nie vychodziŭ. Kavaloŭ na vočnaj staŭcy paviedamiŭ, što mienavita padčas taho pieratrusu Kanavałaŭ prynosiŭ jamu damkrat. Kanavałaŭ kaža, što ŭvohule damkrata ŭ jaho nie bało.

Śviedka Špak pakazaŭ, što ŭ Kanavałava ŭ padvale byli “kaktejli Mołatava”. Kanavałaŭ skazaŭ, što heta niapraŭda. Byli butelki ź bienzinam, ale bieź ficilom, zakrytyja korkami.

15.37-16.22

Začytvajecca pratakoł dopytu Kanavałava ad 14.05.2011.

Začytvajecca pratakoł dopytu Kanavałava ad 16.05.2011.

U studzieni 2011 hoda ŭzarvaŭ dreva, jakoje razłamałasia. Sfatahrafavaŭ jaho na mabilnik. Pry vybuchu vykarystoŭvaŭ kala 1 kh vybuchoŭčaha rečyva na asnovie amijačnaj saletry.

Adzin ŭ piaciarpiełych chacieŭ zrabić chadajnictva. Sudździa nie dazvoliŭ. Maŭlaŭ, paśla.

Začytvajecca pratakoł dopytu Kanavałava ad 23.05.2011.

Kanavałava znajomili z uryŭkam z adnaho z pratakołaŭ dopytu Kavalova. Havorka viadziecca pra toje, što Dźmitryj na prośbu Uładzisłava daŭ jamu klučy ad svajho padvała, kab uziać tam jadavity parašok (Uładzisłavu dla čahości patrebien byŭ toj parašok). Z dapamohaj hetaha parašku, pa słovach Kavalova, Dźmitryj chacieŭ skončyć žyćcio samahubstvam. Kanavałaŭ skazaŭ, što nie źbiraŭsia skončyć žyćcio samahubstvam paśla vybuchu. Nie staŭ kamientavać słovy Kavalova.

* * *

Nastupny ŭryvak z dopytu Kavalova. Apošni kazaŭ, što Kanavałaŭ staviŭ raściažku z vybuchoŭkaj. Ad taho vybuchu zaharełasia adździenie na niejkim mužčynu. Za hetym naziraŭ Kanavałaŭ ź binokla z kustoŭ niepadaloku.

Taki ž vybuch i da hetaha Kanavałaŭ chacieŭ ździejśnić. Ale tady mužčyna prajechaŭ pa raściažcy na rovary, i na jaho nie patrapiła zapalnaja vadkaść.

Kanavałaŭ pra heta śviedčańnie siabra skazaŭ, što nie viedaje, pra jakija padziei viałasia havorka. Jon takoha nie rabiŭ.

* * *

Nastupny ŭryvak z pratakołu dopytu Kavalova. Tak, Kanavałaŭ papiaredžvaŭ Kavalova, što choča ŭ centry Viciebska ździejśnić vybuch. Nibyta chacieŭ na łavie pastavić blašanku, jakaja budzie častkaj vybuchoŭki. Kanavałaŭ pra hetyja pakazańni Kavalova skazaŭ, što nie płanavaŭ takoha rabić i nie rabiŭ.

* * *

Nastupny frahmient dopytu Kavalova. Jon śviedčyŭ, što Kanavałaŭ zakłaŭ vybuchoŭku ŭ kłumbu. Padčas tako vybuchu nichto nie paciarpieŭ. Byŭ paškodžany tolki šapik. Pra heta jamu raskazvaŭ sam Dźmitryj. Toj vybuch Kanavałava nie zadavoliŭ, bo nichto nie paciarpieŭ. Tamu chacieŭ vyrabić bolš mocnuju vybuchoŭku, kab pry jaje vybuchu paciarpieli ludzi. Kanavałaŭ pra hetyja pakazańni Kavalova skazaŭ, što nie viedaje, pra što raskazvaŭ Uładzisłaŭ.

* * *

Čarhovy frahmient z dopytu Kavalova. Jon raskazvaje pra druhi vybuch u Viciebsku nasuprać krajaznaŭčaha muzieja. Kanavałaŭ paśla raskazvaŭ Kavalovu, z čaho vyrabiŭ vybuchoŭku. Taksama raskazaŭ pra akaličnaści ŭstanoŭki vybuchoŭki. Kanavałaŭ u toj momant znachodziŭsia niedaloka. Pa prośbie Kanavałava Kavaloŭ advodziŭ jaho ŭ internet-kaviarniu i pakazvaŭ naviny pra vybuch u Viciebsku. Kali pravodziŭsia pieratrus doma ŭ Kanavałavych, Dźmitryj prynios Uładzisłavu damkrat, jaki paprasiŭ schavać. Pry dapamozie damkrata Dźmitryj vyrablaŭ vybuchoŭki. Pa słovach Kavalova, baćka Kanavałava viedaŭ pra vybuchi. Kanavałaŭ pra hetyja słovy siabra skazaŭ, što takija jaho pakazańni nie zrazumiełyja. I da vybuchaŭ u Viciebsku nie maje dačynieńniaŭ. I ničoha nie chavaŭ u Kavalova.

* * *

Čarhovy frahmient dopytu Kavalova. Jon paviedamiŭ, što viedaje pra inšyja vybuchi, ździejśnienyja Kanavałavym. Paśla zakančeńnia 8-ha kłasa jon razam z Kanavałavym pajšli hulać. Dźmitryj pakazaŭ vybuchoŭku, jakuju sam zrabiŭ. U vyhladzie kavałka trubki mietaličnaj. Mahčyma, z łyžnaj pałki. Kanavałaŭ prapanavaŭ uzarvać jaho ŭ adnym z padjezdaŭ. Mety pakalečyć ludziej nie było. Padnialisia na leśvičnuju placoŭku. Kanavałaŭ prymacavaŭ trubku da škła na aknie na ŭzroŭni hałava. Padpaliŭ knot. Vybiehli na vulicu. U vyniku vybuchu šyba vylecieła z ramaŭ i raźbiłasia. Syšli i bolš na hetaje miesca nie viartalisia.

Kanavałaŭ skazaŭ, što chacieŭ adkrucić bołt na trubie, pa jakoj u adzin z damoŭ padavaŭsia haz. Kab była ŭciečka, a paśla ad luboj iskry adbyŭsia b vybuch. Sam Kanavałaŭ nie dumaŭ uzryvać hazavuju trubu.

Kanavałaŭ raskazvaŭ, što niejak prynios na apošni pavierch adnaho z damoŭ zapalnuju vadkaść. Da butelki byŭ padviedzieny knot. I padpaliŭ.

Adnojčy Kavaloŭ pačuŭ chłapki jak ad pietardaŭ. Vyhlanuŭ u akno. I pabačyŭ, što na stajancy haryć stary mikraaŭtobus. Kanavałaŭ praz tydzień skazaŭ, što heta jon padpaliŭ toj aŭtamabil. Kavaloŭ zrazumieŭ, što siabra kinuŭ na zadniaje siadzieńnie butelku z zapalnaj sumieśsiu.

Kanavałaŭ raskazvaŭ Kavalovu, što choča pad adchon puścić ciahnik. Z dapamohaj damkrata jon chacieŭ padniać rejku ci chacia b skryvić, u vyniku čaho pad adchon pajšoŭ by ciahnik. Ale nie ŭdałosia. Padniałasia nie tolki rejka, ale i špała. I Dźmitryj zabajaŭsia nahruzki i što damkrat złamajecca. Pa słovach Kanavałava, takim čynam padčas vajny zmahalisia partyzany.

Kanavałaŭ pra hetyja pakazańni siabra zajaviŭ, što nie rabiŭ ničoha taho, pra što skazaŭ Uładzisłaŭ. Zajaviŭ, što nie budzie davać pakazańniaŭ na vočnaj staŭcy z Kavalovym. Usio, što jon chacieŭ raskazać pra ŭdzieł u vybuchu Kavalova, užo skazaŭ i bolš ničoha nie maje paviedamić.

Pad pratakołam zajava advakata Kanavłava. Maŭlaŭ, Dźmitryju pakazvali nie całkam pratakoły dopytaŭ Kavalova, a tolki ich frahmienty.

15.29-15.36

Pratakoł dopytu Kanavałava ad 13.05.2011.

Znajomili z zaklučeńnie ekśpiertyzy. Pakazvali razdrukoŭki fota ź jaho mabilnika. Na adnym z fota – siabroŭka Vika. Na druhim fota – nadpisy “psichałohija teraryzmu”. Nazvy refierataŭ, jakija spampavaŭ ź internetu.

Jašče na zdymkach fota Minska.

Recept vyrabu absentu zachoŭvaŭsia na mabilniku Kanavałava.

Infarmacyja pra vybuchovyja rečy była na mabilniku. Ale nie moža skazać, ci hetaj infarmacyjaj karystaŭsia dla vyrableńnia vybuchovak.

15.13-15.28

Začytvajecca pratakoł dopytu Kanavałava ad 11 maja 2011 hoda.

Nitryt natryju byŭ znojdzieny ŭ padvale Kanavałava. Uziaŭ jaho na pracy. Źbiraŭsia vykarystoŭvać dla vybuchoŭki. Mocnaść jaje pavinna była być roŭnaj u ekvivalencie traciłu. Vybuch hetaha rečyva byŭ by macniejšy, čam ad trypierakisu acetonu. Ale tak i nie zrabiŭ.

U pratakole ŭźnikła proźvišča Natalli Karalovaj, ź jakoj Kanavałaŭ siabravaŭ z 2006 hoda da 2008 hoda, da sychodu ŭ vojska.

U listapadzie 2009 hoda Kanavałaŭ lažaŭ u špitali ŭ Minsku, dzie jamu rabili apieracyju.

U pačatku 2006 hoda ŭ kvatery Kanavałava pravodziŭsia pieratrus.

Kavalovu Kanavałaŭ nie raskazvaŭ i nie pakazvaŭ padvał, u jakim vyrablaŭ vybuchoŭki.

14.45-15.13

Pasiadžeńnie praciahvajecca paśla pierapynku.

Začytvajecca pratakoł dopytu Kanavałava ad 6 maja 2011 hoda.

Siernaja kisłata była znojdziena ŭ padvale Kanavałava. Jon skazaŭ, što vykarystoŭvaŭ jaje dla atrymańnia trypierakisu acetonu. Kupiŭ kisłatu dzieści ŭ 2010 hodzie na Smalenskim rynku.

U studzieni 2011 hoda ŭ lesie Kanavałaŭ ździejśniŭ kala stancyi Hryšany vybuchoŭku. Uzarvaŭ z dapamohaj tumblera, złučanaha dratami z vybuchoŭkaj. Vybuch zdymaŭ na videa na fotoaaparat. Zapis na kampjutar nie skidvaŭ. Mocnaść vybuchu acaniŭ u 300 h traciłu ŭ ekvivalencie.

U lutym 2011 hoda zrabiŭ jašče adzin vybuch. Vybuchoŭku zrabiŭ u 1,5-litrovaj płastykavaj butelcy. U paraŭnańni sa studzieńskaj vybuchoŭkaj jon dadaŭ jašče i aluminijevaj pudry.

Da času hetych vybuchaŭ užo vyznačyŭsia, što choča ŭzarvać stancyju mietro “Kastryčnickaja” ŭ Minsku. Płanavaŭ heta zrabić u mai ci červieni. Dla pajezdki płanavaŭ pajści na biuleteń. Bo na pracy adhuł nie dali b.

Tasoł jašče byŭ znojdzieny ŭ padvale. Jon taksama byŭ jamu patrebien dla vyrabu vybuchoŭki. Varyjant jon "znajšoŭ u internecie" i “pierapisaŭ u svoj sšytak”. Ale vybuchoŭki z tasołam tak i nie rabiŭ. Bo zatratny navat varyjant.

Aceton byŭ znojdzieny ŭ padvale Kanavałava. Taksama vykarystoŭvaŭ dla vybuchoŭki na 11.04.2011.

Začytvajecca pratakoł dopytu Kanavałava ad 7 maja 2011 hoda. Pra vybuch u Minsku ŭ 2008 hodzie.

Ideja ździejśnić vybuch na 3.08.2008 uźnikła ŭ pačatku 2008 hoda. Da hetaha na miescy nie byŭ. Kupiŭ u viciebskaj kramie mapu Minska, kab vyvučyć vakolicy miesca kala steły.

Meta vybuchu – “Destabilizavać abstanoŭku, dla zastrašvańnia nasielnictva”.

Vyrašyŭ vykarystać pakiety ad sokaŭ dla vybuchoŭki, bo dumaŭ, što na śviacie budzie valacca šmat takich pustych pakietaŭ. Tamu, maŭlaŭ, nichto nie źviernie ŭvahi na ich.

Vybraŭ pakiety na 2 ł i na 1 ł.

Na Smalenskim rynku znajšoŭ, chto pradaje 300 hramaŭ tratyłu. Za 30 ci 40 tysiač rubloŭ kupiŭ jaho. Na Połackim rynku kupiŭ hajki, hadzińniki kitajskija, try tumblery.

Zrabiŭ dva “testavyja” vybuchi. Ubačyŭ, što vyšej za 1-1,2 mietry askiepki nie raźlatajucca. Kanavałava heta zadavalniała. Maŭlaŭ, jon nie chacieŭ, kab chtości zahinuŭ, ale chacieŭ, kab było jak maha bolš paciarpiełych.

U krasaviku 2008 hoda Kanavałaŭ jeździŭ u Minsk, kab vybrać miesca dla zakładki vybuchoŭki.

3 lipienia 2008 hoda pryjechaŭ u Minsk. U stalicy adrazu vyklučyŭ mabilniki i vyniaŭ sim-kartku, kab jaho nie mahli vyličyć. Kupiŭ taksafonnuju kartu. Pazvaniŭ nakont zydmnaj kvatery. Za 70 tysiač źniaŭ kvateru na vulicy Zasłaŭskaja na sutki.

Chacieŭ uzarvać spačatku adzin zarad, a paśla schadzić pa druhi pakiet i praz 15 chvilin uzarvać druhuju vybuchoŭku.

Kala 22.45 uklučyŭ tumbler na vybuchoŭcy. Pastaviŭ čas vybuchu na 23.00. U hety čas vybuchu nie było. Čakaŭ jašče 25-30 chvilin. Čas vybraŭ tamu, što viedaŭ, što ŭ hety čas budzie vystupać prezident. Ale vybuchu nie było.

Pajšoŭ pa druhi pakiet. Pastaviŭ. Uklučyŭ tumbler. Chvilin praz 10 vybuchnuła. Hladzieŭ chvilin 10 za abstanoŭkaj. Pajšoŭ na kvateru i loh spać. Ranicaj pahladzieŭ naviny pra vybuch. Zadavoleny, što nie było achviaraŭ. Viarnuŭsia ŭ Viciebsk.

“U niejkaja stupieni ja destabilizavaŭ abstanoŭku” ŭ krainie.

U studzieni 2009 pryjazdžaŭ u Minsk. Źniaŭ kvateru. Ni z kim nie sustrakaŭsia. Metu pajezdki nie nazvaŭ.

* * *

Paviedamlaje BiełaPAN:

Viečaram 20 vieraśnia ź nieviadomych pryčyn u Minsku byŭ zatrymany Alaksandr Kruty. Na sudzie pa spravie ab terakcie ŭ minskim mietro jon pradstaŭlaje intaresy svajoj dački Inesy, paciarpiełaj padčas vybuchu 11 krasavika.

Jak skazała Inesa Krutaja, baćka patelefanavaŭ joj napiaredadni prykładna ŭ 20 hadzin i skazaŭ tolki, što jaho zatrymali i dastavili ŭ Maskoŭskaje RUUS. Ab pryčynach zatrymańnia jon ničoha nie kazaŭ.

Jak udałosia vyśvietlić svajakam prykładna ŭ 14 hadzin 21 vieraśnia, Kruty znachodzicca ŭ Maskoŭskim RUUS. Jamu inkryminujecca ŭčynieńnie złačynstva, praduhledžanaha častkaj 1-j artykuła 339-ha Kryminalnaha kodeksa «Chulihanstva». U čym dakładna jon abvinavačvajecca, svajakam u milicyi admovilisia skazać. Rodnym zatrymanaha było tolki paviedamlena, što pytańnie pra abrańnie ŭ adnosinach da jaho miery strymańnia budzie vyrašana viečaram 21 vieraśnia.

Alaksandr Kruty aktyŭna pavodziŭ siabie ŭ pracesie pa spravie ab terakcie. Mienavita jamu naležała chadajnictva ab pieranosie suda da vyrašeńnia pytańnia ab admienie ŭ Biełarusi śmiarotnaj kary, stvareńni instytuta prysiažnych zasiadacielaŭ i ŭviadzieńnia ich u praces.

Inesa Krutaja siońnia ŭpieršyniu pryjšła na pasiadžeńnie suda i miarkuje źviarnucca da sudździ z zajavaj, u jakoj zapatrabuje prypynić praces da taho čas, pakul jaje baćka nie budzie znoŭ dapuščany ŭ sud u jakaści jaje pradstaŭnika. Sama Inesa Krutaja naviedvać sud nie ŭ stanie, bo atrymała surjoznyja traŭmy padčas terakta.

* * *

21 vieraśnia na sudovym pracesie pa spravie ab vybuchach u Minsku i Viciebsku začytvalisia pratakoły dopytaŭ hałoŭnaha padazronaha Dźmitryja Kanavałava, praviedzienyja 13 i 18 krasavika.

Padčas dopytu 18 krasavika Kanavałaŭ admoviŭsia ad dadzienych raniej pakazańniaŭ ab svajoj zamiešanaści ŭ vybuchach u Viciebsku ŭ 2005 hodzie.

Śledčamu jon zajaviŭ, što raniej pryznaŭsia va ŭčynieńni hetych złačynstvaŭ pad uciskam supracoŭnikaŭ milicyi paśla zatrymańnia 12 krasavika.

Jon raskazaŭ, što ŭsio adbyvałasia ŭ pamiaškańni Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS. Dvoje supracoŭnikaŭ milicyi pakłali jaho na žyvot, ruki ŭ naručnikach zaciahnuli pad składzienyja zzadu nakryž nohi. Pavodle słoŭ Kanavałava,

jamu skazali, kab jon daŭ pakazańni pa vybuchach u Minsku ŭ 2011 i 2008 hadach i ŭ Viciebsku ŭ 2005-m.

Razam z tym na hetym ža dopycie Kanavałaŭ zajaviŭ, što pryznaje svaju zamiešanaść u vybuchach u Minsku ŭ 2008 i 2011 hadach.

* * *

Chto taki Alaksandr Kruty

Alaksandr Kruty — adzin z asudžanych za abrazu Łukašenki. Kryminalnuju spravu pavodle art. 368 KK raspačali ŭ mai 2003 h. Na toj momant jon žyŭ u Niaśvižy, zajmaŭsia pravaabarončaj dziejnaściu. Paśla zaviadzieńnia spravy jaho adpuścili pad raśpisku. Jon źjechaŭ u Minsk, dzie znachodziŭsia da vosieni 2007 hoda. Jon byŭ iznoŭ zatrymany i źmieščany ŭ žodzinskaje SIZA.

24 studzienia 2008 hoda sud Niaśvižskaha rajona pryznaŭ Alaksandra Krutoha vinavatym u publičnaj abrazie Łukašenki. Z pryčyny adsutnaści vialikaj pahrozy dla hramadstva jaho vyzvalili ad adkaznaści i spynili spravu. Adnak damoŭ jon patrapiŭ nie adrazu.

U časie śledstva pravodziłasia sudova-miedycynskaja ekśpiertyza, jakaja vyjaviła ŭ Krutoha paranaidalnuju šyzafreniju. Zamiest vyzvaleńnia jaho nakiravali na lačeńnie ŭ respublikanski psichijatryčny špital u Navinkach.

U lutym 2008 hoda sudovaja kalehija pa kryminalnych spravach Minskaha abłasnoha suda admianiła pastanovu suda Niaśvižskaha rajona i admianiła vytvorčaść pa spravie Krutoha.

U svoj čas Alaksandr Kruty, fizik pa adukacyi, pracavaŭ na Ministerstva abarony, potym staŭ pradprymalnikam.

«Heta bieskampramisny i valavy čałaviek, mieŭ vialiki archiŭ dakumientaŭ, bo nie prapuskaŭ nivodnaha vypadku parušeńnia pravoŭ svaich ziemlakoŭ», — charaktaryzavaŭ u 2007 hodzie Krutoha hramadski aktyvist ź Niaśviža Aleś Jaźvinski.

• 0
• 0
• 0
• 0
• 0
• 0
• 0
• 0