Pačatak vypłaty 500 tysiač vyklikaŭ vialiki ažyjataž.
«Na našaj pošcie siońnia nie było biełaruskich rubloŭ», — paviedamiŭ «NN» naš čytač ź Minska. Zdaryłasia heta ŭ adnym z paštovych adździaleńniaŭ u mikrarajonie «Paŭdniovy Zachad».
Zahadčyca adździaleńnia źniała słuchaŭku nie adrazu. U razmovie była nadzvyčaj emacyjnaja.
Pa jaje słovach, siońnia — pieršy dzień vydačy dapamohi «na harodninu», tyja samyja 500 tysiač rubloŭ. Heta vyklikała nieabyjaki ažyjataž — u adździaleńni pošty bitkom narodu.
«Ludzi pa hrošy iduć, jak z vajny sa ściahami! Usie chočuć u pieršy dzień atrymać. Ale ž vydača hrošaj zhodna rasparadžeńnia Łukašenki budzie adbyvacca miesiac. A mo i bolš. Bo nam nichto nie nazyvaŭ kankretnaj daty» — kaža zahadčyca pošty.
Ź jaje tłumačeńniaŭ vynikaje, što taki napłyŭ ludziej byŭ niečakanym.
«Atrymali na vydaču 100 miljonaŭ — za hadzinu ich užo niama. Ja tłumačyła ludziam, što vydavać budziem ceły miesiac, što nierealna absłužyć usich za raz. Ale ich poŭnaja zała, svaracca, bjucca za hrošy».
Žančyna patłumačyła, što jaje adździaleńnie pryniała adpaviednyja miery, paviedamiła svajo kiraŭnictva i ciapier čakaje dadatkovyja 100 miljonaŭ rubloŭ. «Ja trymaju nievialiki rezierv dla tych, kamu ŭžo zusim niama čakać, u kaho vostraja patreba ŭ hrošach», — kaža zahadčyca pošty.
Nahadajem, što 15 vieraśnia Alaksandr Łukašenka padpisaŭ ukaz № 417 «Ab adnarazovaj materyjalnaj dapamozie». Ukaz praduhledžvaje akazańnie adnarazovaj materyjalnaj dapamohi ŭ 500 tysiač rubloŭ asobam, jakija na 1 vieraśnia 2011 hoda źjaŭlalisia rabotnikami biudžetnaj śfiery, uklučajučy dziaržaŭnych słužačych i vajennasłužačych, atrymalnikami dapamoh (pa dohladzie dziciaci, dziciaci-invalida i invalida I hrupy) i niepracujučymi atrymalnikami piensij. Vypłaty pavinny pačacca ŭ 3-j dekadzie vieraśnia.
Kamientary