Biełaruski ŭrad płanuje pryciahnuć kredyt Śbierbanka Rasii ŭ pamiery 1 młrd dołaraŭ ZŠA pad zastavu akcyj AAT «Naftan», paviedamiŭ namieśnik prem'jer-ministra Siarhiej Rumas na pres-kanfierencyi 21 vieraśnia.
«My doŭha strukturavali hetuju ździełku. Dva tydni tamu sa Śbierbankam było padpisana pahadnieńnie ab tym, što kredyt budzie pradastaŭleny pad załoh akcyj inšaha pradpryjemstva», — skazaŭ Rumas. Raniej płanavałasia, što kredyt Śbierbanka budzie pradastaŭleny pad załoh akcyj «Biełaruśkalija», adnak, jak patłumačyŭ vice-premjer, urad nie zachacieŭ zakładvać akcyi hetaha pradpryjemstva, i było znojdziena inšaje załohavaje zabieśpiačeńnie. Rumas paviedamiŭ, što ŭ jakaści załoha papiarednie moža vystupać 51-pracentny pakiet akcyj «Naftana».
Razam z tym vice-premjer adznačyŭ, što zaklučeńnie hetaj ździełki zatrymlivajecca. Pieršapačatkova płanavałasia pryciahnieńnie sindykavanaha kredytu (ad niekalkich bankaŭ), adnak ciapier, pavodle słoŭ Rumasa, inšyja ŭdzielniki sindakata «z pryčyny situacyi na suśvietnym rynku admovilisia ad udziełu ŭ im». Ciapier viadziecca pošuk mahčymych inšych udzielnikaŭ sindykata. U pryncypie, adznačyŭ vice-premjer, Biełaruś moža pryciahnuć kredyt tolki Śbierbanka (na adzin hod). «My razhladajem hety kredyt jak padušku biaśpieki. Siońnia vostraj patreby ŭ takoj padušcy niama», — zajaviŭ Rumas.
Jon patłumačyŭ, što raniej srodki płanavałasia pryciahnuć dla stabilizacyi situacyi na valutnym rynku, adnak ciapier padziei na rynku, na dumku ŭrada, raźvivajucca ŭ pazityŭnym klučy.
Kamientary