Baćka paciarpiełaj Krutoj zatrymany, bo vyliŭ maču na hałavu hałoŭuraču

Viečaram 20 vieraśnia byŭ zatrymany Alaksandr Kruty, jaki na sudzie pa spravie ab terakcie ŭ mietro pradstaŭlaje intaresy svajoj dački Inesy, paciarpiełaj padčas vybuchu 11 krasavika. Alaksandr Kruty źviarnuŭ uvahu na siabie tym, što chadajničaŭ pra pieranos suda da času admieny śmiarotnaha pakarańnia i ŭviadzieńnia suda prysiažnych. Faktyčna, heta było vykazvańnie niedavieru da suda i śledstva pa spravie.

Inesa Krutaja 21 vieraśnia sama pryjšła na pasiadžeńnie suda i mierkavała źviarnucca da sudździ z zajavaj, kab zapatrabavać prypynić praces da taho čas, pakul jaje baćka nie budzie znoŭ dapuščany ŭ sud u jakaści jaje pradstaŭnika. Sama Inesa Krutaja naviedvać sud nie ŭ stanie, bo atrymała surjoznyja traŭmy padčas terakta.

Adnak 21 vieraśnia padać zajavu jana nie paśpieła. A 

22 vieraśnia sudździa Fiedarcoŭ začytaŭ infarmacyju pra situacyju z Krutym.

Zhodna ź im, 17 žniŭnia 2011 hoda [h.zn. miesiac nazad] Kruty va ŭpraŭleńni achovy zdaroŭja vyliŭ maču z dvuch paŭlitrovych słoikaŭ na hałoŭnaha ŭrača. U suviazi z hetym zaviedziena kryminalnaja sprava ŭ adnosinach da Krutoha za chulihanstva. Sprava zaviedziena 19 žniŭnia.

Svajakam Krutoha stała viadoma, što pa nakiravańni prakurora Alaksandr Kruty adpraŭleny ŭ Respublikanski navukova-praktyčny centr psichičnaha zdaroŭja (Navinki).

Alaksandra Krutoha ŭ svoj čas asudžali za «abrazu Łukašenki».

24 studzienia 2008 hoda sud Niaśvižskaha rajona pryznaŭ Alaksandra Krutoha vinavatym u publičnaj abrazie Łukašenki. Z pryčyny adsutnaści vialikaj pahrozy dla hramadstva jaho vyzvalili ad adkaznaści i spynili spravu. Adnak damoŭ jon patrapiŭ nie adrazu.

U časie śledstva pravodziłasia sudova-miedycynskaja ekśpiertyza, jakaja vyjaviła ŭ Krutoha paranaidalnuju šyzafreniju.

U lutym 2008 hoda sudovaja kalehija pa kryminalnych spravach Minskaha abłasnoha suda admianiła pastanovu suda Niaśvižskaha rajona i admianiła vytvorčaść pa spravie Krutoha.

U svoj čas Alaksandr Kruty, fizik pa adukacyi, pracavaŭ na Ministerstva abarony, potym staŭ pradprymalnikam.

«Heta bieskampramisny i valavy čałaviek, mieŭ vialiki archiŭ dakumientaŭ, bo nie prapuskaŭ nivodnaha vypadku parušeńnia pravoŭ svaich ziemlakoŭ», — charaktaryzavaŭ u 2007 hodzie Krutoha hramadski aktyvist ź Niaśviža Aleś Jaźvinski.

U suviazi z zatrymańniem Alaksandra Krutoha, inšy paciarpieły pad čas vybuchu ŭ mietro Samveł Saakian zajaviŭ, što jon źbirajecca naviedvać usie sudovyja pasiadžeńni, bo nie maje harantyj, što i jaho nie zatrymajuć. Saakian, jak i Kruty, byŭ samym aktyŭnym z udzielnikaŭ pracesu z boku paciarpiełych. Jany padavali chadajnictvy i aktyŭna zadavali pytańni.

• 0
• 0
• 0
• 0
• 0
• 0