Pryvałka pad Hrodnam moža stać novym kurortam
Raka i šmatlikija krynicy minieralnaj vady.
Nievialiki pasiołak Pryvałka la biełaruska-litoŭskaj miažy moža stać novym biełaruskim kurortam. Architektar Uładzimir Isačenka raspracavaŭ padrabiaznuju schiemu terytaryjalnaj arhanizacyi tut kurorta i ŭ vieraśni pieradaŭ dakumienty ŭ administracyju SEZ «Hrodnainviest».
Terytoryja hetaj vioski, a taksama častka ziemlaŭ Hrodzienskaj puščy ŭvajšli ŭ skład «Śpiecyjalnaha turyscka-rekreacyjnaha parka «Aŭhustoŭski kanał». Ciapier dla inviestaraŭ dziejničajuć značnyja lhoty ŭ padatkaabkładańni, arhanizacyi biznesu, budaŭnictvie pa advodzie ziamli i h.d. Heta značyć, što mohuć być realizavany darahija prajekty pa budaŭnictvie lakarniaŭ, sanatoryjaŭ, pansijanataŭ. Raniej na ich mahli zamachnucca chiba što ŭ savieckija časy, kali pravodzilisia maštabnyja daśledavańni biełaruskich nietraŭ na pradmiet karysnych vykapniaŭ i ŭ napramku azdaraŭleńnia.
Ułasna, hetyja daśledavańni, a taksama asabistyja šmathadovyja napracoŭki vykarystaŭ Uładzimir Isačenka, afarmlajučy padrabiaznuju funkcyjanalna-płanirovačnuju schiemu kurorta Pryvałka. Dla kožnaha abjekta jość svajo abhruntavańnie. Tak, na schiemie paznačanyja dva sanatoryi dla darosłych na 350 miescaŭ i adzin dziciačy na 150. Lačebnyja karpusy prapanoŭvajuć pabudavać na bierazie Niomana, darečy, niedaloka ad zakansiervavanych śvidravin ź minieralnaj vadoj. Tam ža praduhledžany spartkompleks, park kurortny, hatel, žyłaja zona, kamunalny ŭčastak. Na bierazie raki Uładzimir Isačenka prapanuje pabudavać prystań.
Raźvićciu kurorta mohuć spryjać unikalnyja pryrodnyja resursy: minieralnyja krynicy, lačebnyja hrazi. U kancy 80-ch hadoŭ na učastku Parečča-Hrandzičy-Pryvałka zrabili 26 śvidravin i ŭ 21 ź ich vyjavili minieralnuju vadu chłarydna-kalcyjevaha typu. Śvidraviny paznačanyja i na karcie-schiemie prykładna tam, dzie moh by raźmiaścicca sanatoryj, adnak u hetym miescy ich letaś čamuści zasypali.
Na karcie-schiemie adznačany jašče adzin sanatoryj i rekreacyjnyja zony z sažałkami i lačebnymi parkami vakoł ich. A da šašy pa lesie zapłanavana prakłaści łyžarolernuju trasu.
Kamientary