Hałoŭnaja zadača KDB

Z samaha ranku aŭtorka aperatyŭnyja hrupy KDB zatrymlivali demakratyčnych aktyvistaŭ pa ŭsioj krainie. Čynili pieratrusy ŭ chatach i ofisach, kanfiskoŭvali kamputary i dakumenty. U vyniku čatyry čałavieki apynulisia ŭ «amerykancy»: pres-sakratar KDB abvieściŭ ab aryšcie čatyroch čałaviek — Mikoły Astrejki, Eniry Branickaj, Alaksandra Šałajki j Cimocha Drančuka. U aŭtorak jany padazravalisia va ŭčynieńni złačynstva — paklopie na Alaksandra Łukašenku (art.367, č.1 Kryminalnaha kodeksu). Užo ŭ sieradu artykuł pierakvalifikavali: dziejnaść ad imia niezarehistravanaj arhanizacyi (art.193, č.2). Da piatnicy ich pratrymajuć u izalatary, a potym buduć abvinavačvać abo vypuskać.

Supracoŭniki abłasnych upraŭleńniaŭ KDB praviali pieratrusy ŭ kvaterach aktyvistaŭ niezarehistravanaj inicyjatyvy «Partnerstva» ŭ Mahilovie, Bychavie, Połacku, Navapołacku, Viciebsku, Homieli, Bieraści. Ale sankcyju na pieratrusy davała Prakuratura Miensku na hruncie raspačataj joju spravy.

C.Drančuka ŭziali kala «Akademknihi». Jahonuju mašynu spynili supracoŭniki DAI, tut ža da jaho padyšli kala 10 aperatyŭnikaŭ KDB. Razam pajechali dachaty. Adčyniła žonka. Jana čakaje dzicia j znachodzicca na apošnim miesiacy ciažarnaści. Kamuflaž i maski na tvarach dzieciukoŭ jaje, viadoma, napałochali. Try hadziny čynili pieratrus. U vyniku skanfiskavali dva kamputary (adzin — chatni, druhi — noŭtbuk), dakumenty, natatniki, znački, niekalki brašuraŭ. Ahułam — 65 punktaŭ. Mabilny telefon jaje muža niekalki hadzinaŭ adkazvaŭ doŭhimi hudkami, a potym jaho, vidać, prosta niechta vyklučyŭ. Dadamo, što zranku na mašynie Drančuk jechaŭ nabyvać žoncy kvietki, kab pavinšavać jaje z dniom narodzinaŭ. Nie paśpieŭ.

U hety ž čas rabili pieratrus i ŭ chacie Mikoły Astrejki. Taja samaja historyja. Da drobiaziaŭ. Taksama ŭzbrojenaja hrupa ŭ maskach. Taksama kanfiskacyja kamputaraŭ, natatnikaŭ i dakumentaŭ.

Zranku pryjšli j da Alaksandra Šałajki. Jakraz u hety čas da jaho na vulicu Lenina zavitaŭ eks-deputat Uładzimier Navasiad. I ŭsie piać hadzinaŭ, padčas jakich pravodzili pieratrus u adnapakajovaj kvatery, Navasiad byŭ vymušany pravieści «ŭ haściach». Paśla hetaha Šałajku taksama zatrymali j zaklučyli pad vartu.

Kiraŭnik štabu Alaksandra Milinkieviča Siarhiej Kalakin paraŭnaŭ zatrymańni i pieratrusy na kvaterach demakratyčnych aktyvistaŭ z analahičnymi dziejańniami ŭładaŭ Polščy ŭ 1981 h., a sytuacyju ŭ krainie — z časami «Salidarnaści».

Fakt adnačasovych pieratrusaŭ i aryštaŭ pa ŭsioj krainie navodzić na dumku, što KDB i Prakuratura buduć sprabavać dakazać najaŭnaść niejkaj «apazycyjnaj sietki».

Pieršaje, što naprošvajecca z ulikam zaniatkaŭ Astrejki j Branickaj — specsłužby sprabujuć sarvać niezaležnaje nazirańnie za vybarami, jakoje na hety raz — va ŭmovach, kali ŭ kamisii nie ŭklučyli nikoha z vyłučencaŭ apazycyi, a naziralnikam ad začynienych hramadzkich arhanizacyjaŭ niemahčyma trapić na ŭčastki, užo nia kažučy pra vizualny kantrol za padlikam hałasoŭ, — mahło adbyvacca tolki ŭ formie apytańniaŭ na vychadzie z učastkaŭ dla hałasavańnia. U takim razie viedamstva Sucharenki, značyć, ličyła aryštavanych asobaŭ najbolš niebiaśpiečnymi ŭ hetym sensie.

❏

Cimoch Drančuk

Pavialičyć

Jamu 24 hady. Pachodzić ź Miensku. Žanaty, žonka čakaje dzicia. Skončyŭ Biełaruski licej, vyšejšaj adukacyi nia maje. Vysoki, bialavy, jon byŭ adnym z samych zaŭvaž-nych aktyvistaŭ niezarehistravanych «Maładoha frontu», paśla — «Zubra», apošnija dva hady — ruchu Andreja Klimava. Siabar AHP.

❏

Alaksandar Šałajka

Pavialičyć

Jamu 29 hadoŭ. Skončyŭ fakultet mižnarodnych adnosinaŭ BDU, braŭ udzieł u Zadzinočańni biełaruskich studentaŭ. Maje žonku i syna Cimocha, jakomu 11 miesiacaŭ.

❏

Enira Branickaja

Pavialičyć

Joj 24 hady. Pachodzić ź Mienskaj vobłaści. Vučyłasia razam z Astrejkam.

❏

Mikoła Astrejka

Pavialičyć

Jamu 26 hadoŭ. Pachodzić ź Mienskaj vobłaści. Žanaty, pabraŭsia šlubam z žonkaj Palinaj tydzień tamu — 17 lutaha.

Skončyŭ jurydyčny fakultet BDU, a pierad tym — Biełaruski licej. Juryst-palitolah. Astrejka pracavaŭ u likvidavanym uładami pravaabarončym centry «Viasna», byŭ siabram AHP, adkul jaho vyklučyli ŭ 2003 hodzie. Letaś adsiedzieŭ 15 sutak za sprobu pravieści ŭstanoŭčy schod «Partnerstva».

• 0
• 0
• 0
• 0
• 0
• 0
• 0
• 0