Tramp ź siamjoju chočuć atrymać 10 miljardaŭ dalaraŭ ad Minfina ZŠA
Donald Tramp razam z členami svajoj siamji i kampanijaj Trump Organization padaŭ pazoŭ suprać Padatkovaj słužby ZŠA i Ministerstva finansaŭ, patrabujučy kampiensacyju nie mienš jak 10 miljardaŭ dalaraŭ. Heta adbyvajecca na fonie značnaha deficytu biudžetu i rostu dziaržaŭnaha doŭhu ZŠA, jakija, pavodle MVF, u značnaj stupieni ŭzmacnilisia paśla pryniaćcia inicyjavanaha Trampam padatkovaha zakona, piša Financial Times.
Pryčynaj pazovu stała ŭciečka padatkovych dekłaracyj Trampa. Hetyja dakumienty ŭ 2019—2020 hadach pieradaŭ vydańniam The New York Times i ProPublica Čarlz Litłdžon, były supracoŭnik kansałtynhavaj kampanii Booz Allen Hamilton, jakaja pracavała z Padatkovaj słužbaj. Raniej, padčas svajoj pieršaj prezidenckaj kampanii, Tramp admoviŭsia publikavać padatkovyja dekłaracyi, parušyŭšy šmathadovuju tradycyju.
U pazovie śćviardžajecca, što pieradača infarmacyi «levym ŚMI» naniesła surjoznuju škodu dziełavoj reputacyi i finansam Trampa i jaho siamji, pryviała da publičnaha prynižeńnia i sfarmavała skažony vobraz ich dziejnaści.
Na asnovie źlitych materyjałaŭ The New York Times paviedamlała, što ŭ 2016 hodzie Tramp zapłaciŭ usiaho 750 dalaraŭ fiederalnaha padachodnaha padatku, a za 10 z papiarednich 15 hadoŭ nie płaciŭ jaho naohuł, vykarystoŭvajučy finansavyja schiemy, pry jakich aficyjnyja straty pieravyšali prybytki.
U 2024 hodzie Litłdžona prysudzili da piaci hadoŭ pazbaŭleńnia voli za razhałošvańnie padatkovaj tajamnicy. ProPublica na padstavie hetaj uciečki apublikavała bolš za 50 artykułaŭ pra padatkovyja stratehii najbahaciejšych ludziej ZŠA, u tym liku Iłana Maska, Džefa Biezasa, Uorena Bafieta i Majkła Błumbierha.
Jak adznačaje The Wall Street Journal, kali sud prymie pazoŭ da razhladu, sprava budzie biesprecedentnaj. Choć Tramp vystupaje jak pryvatnaja asoba, jon adnačasova zajmaje pasadu prezidenta i maje paŭnamoctvy zvalniać tych samych čynoŭnikaŭ, jakija faktyčna źjaŭlajucca adkazčykami: ministra finansaŭ, kiraŭnika Padatkovaj słužby i hienprakurora.
U vyniku padnačalenyja Trampu dziaržaŭnyja słužboŭcy apynucca ŭ situacyi, kali im daviadziecca abaraniać u sudzie pazicyju ŭradavych struktur ad pazovu, padadzienaha samim prezidentam, a taksama vieści ź im pieramovy nakont mahčymych kampramisaŭ i vypłat.
Tramp padaŭ pazoŭ suprać BBC na piać miljardaŭ dalaraŭ
Tramp zahadaŭ rasśledavać mahčymyja suviazi Epštejna z Klintanam i bankirami. Miniust ZŠA padparadkavaŭsia
«Bi-bi-si» vybačyłasia pierad Trampam za mantaž jaho pramovy ŭ prahramie
Tramp padaŭ pazoŭ na 15 miljardaŭ dalaraŭ suprać haziety The New York Times
Ciapier čytajuć
Kaleśnikava: «Mianie šakuje maštab nianaviści i ahresii». Maryja patłumačyła, što dla jaje značyć viartańnie da narmalnaści41
Kaleśnikava: «Mianie šakuje maštab nianaviści i ahresii». Maryja patłumačyła, što dla jaje značyć viartańnie da narmalnaści
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ1010
Kamientary