U Minsku siaredni ŭzrost u mužčyn, jakija ŭstupili ŭ pieršy šlub, skłaŭ letaś 27 hadoŭ, u paŭtorny šlub — 40,4 hoda.Pra heta karespandentu BiełTA paviedamili ŭ hałoŭnym statystyčnym upraŭleńni Minska.
Darečy, u 2000 hodzie tyja, chto ŭstupiŭ u pieršy šlub, byli značna maładziejšyja — 25,5 hadoŭ. Uzrost ustupleńnia ŭ paŭtorny šlub praktyčna nie źmianiŭsia. Usiaho ŭ minułym hodzie vuzami Himienieja źviazali siabie 16 028 mužčyn.
Amal va ŭsich uzrostavych hrupach mužčyny brali za žonak žančyn, maładziejšych za ich abo adnahodak. Vyklučeńnie skłali žanichi va ŭzroście 18–19 i 20–24 hadoŭ, ź jakich kožny druhi i kožny piaty adpaviedna aformili adnosiny z žančynami, starejšymi za siabie.
Kožny čaćviorty z tych, chto braŭ šlub u minułym hodzie, raniej užo byŭ žanaty i na momant stvareńnia novaj siamji byŭ raźviedzieny albo ŭdaviec.
Aficyjna ŭ stalicy letaś skasavali šluby 8230 siemjaŭ. Razvodziacca mužčyny roznych uzrostaŭ, ale čaściej za ŭsio ŭ minułym hodzie skasoŭvali šlub mužčyny va ŭzroście 30–34 hadoŭ (kožny piaty).
Majuć miesca razvody i va ŭzroście mienš 20 hadoŭ, a taksama 60 hadoŭ i bolš. Tak, letaś raźviałosia troje mužčyn va ŭzroście 19 hadoŭ, jakija pražyli ŭ šlubie 1 hod i mienš. Va ŭzroście 60 hadoŭ i bolš skasavali šlub 227 mužčyn, asnoŭnaja častka ź jakich pražyła ŭ šlubie bolš za 20 hadoŭ, a 14 mužčyn — 1 hod i mienš.
Na 1 studzienia 2011 hoda kolkaść nasielnictva Minska skłała 1864,1 tys. čałaviek, ź jakich 853,6 tys., abo 45,8% — mužčyny.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2323
Kamientary