Novyja niestykoŭki i supiarečnaści na pracesie Kanavałava-Kavalova
Razychodziacca niekatoryja śviedčańni i pakazańni, vyniki śledčaha ekśpierymientu.
U sudzie pa spravie abvinavačvanych u teraryźmie Dźmitryja Kanavałava i Uładzisłava Kavalova 25 kastryčnika było prademanstravana videa śledčaha ekśpierymientu ad 20 krasavika 2011 hoda, što tyčyŭsia padziej 2008 hoda. Na im Kanavałaŭ pakazvaŭ, jak jon vyrablaŭ vybuchovyja prystasavańni.
Adkazvajučy na pytańnie pra matyvy svaich dziejańniaŭ, Kanavałaŭ spačatku paŭtaryŭ frazu, jakaja užo hučała niekalki razoŭ, ab destabilizacyi stanovišča ŭ Respublicy Biełaruś, a potym zajaviŭ: «Mnie nie padabajecca palityka našaha prezidenta». Dalej havaryć na hetu temu Kanavałaŭ admoviŭsia.
Na videa Kanavałaŭ raspaviadaŭ i pakazvaŭ, jak vyrablaŭ vybuchovaje rečyva dla vybuchovych prystasavańniaŭ, što spracavała i nie spracavała na śviatkavańni Dnia Niezaležnaści 4 lipienia 2008 hoda, jak vyrablaŭ sami vybuchovyja prystasavańni, detanatary. Pakazvaŭ hieamietryju zarada, heta značyć raźmiaščeńnie ŭ pakiecie
Śviedki ž, jakija znajšli vybuchovaje prystasavańnie, što nie spracavała, raniej u sudzie kazali: hajki byli ŭ prazrystaj upakoŭcy, tamu jany ich i razhledzieli.
Aprača taho, na śledčym ekśpierymiencie Kanavałaŭ paviedamiŭ, što tumbler zasunuŭ u pakiet praź jaho nakryŭku, paškodziŭšy miembranu palcam, i prademanstravaŭ heta. Pavodle słoŭ śviedak, nakryŭka pakieta była zafiksavanaja stoparam i, kab adkryć pakiet, im daviałosia adarvać miembranu, pad jakoj akazaŭsia tumbler.
Kanavałaŭ 20 krasavika raskazvaŭ, što nie pamiataje, kudy dakładna da budzilnika prypajvaŭ pravady. Naohuł jaho dziejańni na śledčym ekśpierymiencie byli dastatkova niaŭpeŭnienymi. Mahło skłaścisia ŭražańnie, što, naprykład, adnaŭleńnie elektronnaha łancuhu prystasavańnia ujaŭlaje dla jaho peŭnuju ciažkaść. Adkazvajučy na pytańni, Kanavałaŭ skazaŭ, što vałodaje minimalnymi viedami ŭ radyjotechnicy i radyjoelektronicy, chacia schiemu, pavodle jaho słoŭ, źbiraŭ sam.
Na adnym z dopytaŭ, što papiaredničali śledčamu ekśpierymientu, Kanavałaŭ, kali malavaŭ prystasavańnie bomby, jakaja nie spracavała 4 lipienia, raźmiaściŭ paražalnyja elemienty źvierchu i źnizu vybuchovaha rečyva, kali pakiet raźmiaščajecca viertykalna.
Na śledčym ekśpierymiencie ž jon pakazaŭ, što ŭpakoŭki z hajkami raźmiaščalisia vakoł vybuchovaha rečyva ŭ formie litary «P».
Častka materyjałaŭ śledčaha ekśpierymientu adnosiłasia i da vybuchu ŭ mietro 11 krasavika 2011 hoda. Na hetym śledčym dziejańni Kanavałaŭ zajaviŭ, što pry vyrabie vybuchovaha prystasavańnia nie vykarystoŭvaŭ aluminijevuju pudru.
Adnak, jak vyśvietliłasia, raniej na dopytach jon kazaŭ zvarotnaje.Hetuju niestykoŭku Kanavałaŭ rastłumačyŭ tym, što pamyliŭsia.
Kamientary