Kiroŭcy vybirajuć štrafy zamiest techahladu

U Bresckaj vobłaści pavialičvajecca kolkaść aŭtamabilaŭ, jakija nie prajšli techahlad. Na dadzieny momant takich bolš za 30 tysiač. Z pryčyny ciapierašniaj ekanamičnaj situacyi takaja pracedura zrabiłasia darahim zadavalnieńniem.

U Bresckaj vobłaści raście kolkaść aŭtamabilaŭ biez techahladu. Za dziesiać miesiacaŭ 2011 hoda ŭ vobłaści supracoŭnikami DAI było vyjaŭlena bolš za 30 tysiač aŭtamabilaŭ biez techahladu, što na 5000 bolš, čym za ŭvieś 2010 hod.

— Pry hetym bolšaść — kiroŭcy z rajonaŭ, u Breście vyjaŭlenaja minimalnaja kolkaść takich aŭtamabilaŭ, — paviedamili va UDAI. — Što da padroblenych techahladaŭ, to za hety pieryjad było vyjaŭlena 10 vypadkaŭ, heta na siem mienš, čym u minułym hodzie.

Sami kiroŭcy matyvujuć admovu ad prachodžańnia dziaržtechahladu darahoŭlaj ramontu, nieabchodnaha, kab padrychtavać aŭtamabil.

— Navošta mnie padrobleny techahlad? — kaža bieraściejec Juryj. — Ja budu jeździć bieź jaho. Heta ŭsio roŭna tańniej abydziecca, čym ramont. Navat kali kožny miesiac płacić pa 17 500 štrafu, to za hod ja zapłaču kala 25 dalaraŭ pry siońniašnim kursie. A ramont mnie abydziecca jak minimum u 10 razoŭ daražej.

Kali ŭličvać, što žychary Bresckaj vobłaści addajuć pieravahu karystanym aŭtamabilam, to nieskładana zdahadacca, što praktyčna ŭ kožnaha aŭtaŭładalnika jość nieabchodnaść u toj ci inšaj stupieni adramantavać mašynu.

Ceny na ramont u bresckich majsterniaŭ siońnia kusajucca. Naprykład, zamiena tarmaznych kałodak kaštuje 10–15 dalaraŭ, ramont padvieski — samaha prablemnaha miesca ŭ aŭtamabili — abydziecca ŭ sumu ad miljona biełaruskich rubloŭ tolki za pracu, biez uliku zapčastak, pieraborka ruchavika ŭ vypadku niaspraŭnaści budzie kaštavać kala 300–400 dalaraŭ.

— Takaja situacyja nazirajecca va ŭsioj respublicy, a nie tolki ŭ Bresckaj vobłaści, — kaža namieśnik načalnika ŭpraŭleńnia UP «Biełtechahlad» Alaksandr Sapromienka. — Sapraŭdy, my nazirajem źnižeńnie kolkaści aŭtamabilaŭ, jakija prachodziać dziaržtechahlad na našych stancyjach. Kiroŭcy kažuć, što heta dla ich doraha. A pakarańnie abmiažoŭvajecca adnosna nievialikim štrafam (17 500 rubloŭ) i papiaredžańniem. My ŭnosili prapanovu ab pavyšeńni štrafu da čatyroch bazavych vieličyń. Ale atrymali admovu. Pavodle dadzienych DAI, pracent aŭtamabilaŭ biez techahladu, jakija traplajuć u DTZ, davoli nizki. Ale heta pakul što, i kali tak budzie praciahvacca, to kolkaść udzielnikaŭ DTZ biez techahladu ŭzraście. Ale budzie pozna.

• 0
• 0
• 0
• 0
• 0
• 0
• 0
• 0