Google źjaŭlajecca najlepšym pracadaŭcam u śviecie

Biaspłatnaje charčavańnie, placoŭka dla plažnaha valejbołu, basejn, 5 tys. dalaraŭ datacyi dla supracoŭnikaŭ, jakija nabyvajuć mašynu z hibrydnym ruchavikom – heta tolki niekalki pryjemnaściaŭ, što čakajuć supracoŭnikaŭ hałoŭnaha adździełu «Google» u Maŭncin‑Vju (Kalifornija).

Štotydniovik «Fortune» nadrukavaŭ štohadovy śpis sta najlepšych pracadaŭcaŭ Ameryki. Na pieršym miescy apynuŭsia internet‑hihant «Google». Zasnavany ŭ 1998 h. dvuma vypusknikami Ŭniversytetu Stenfard Łerry Pejdžam i Siarhiejem Brynam, «Google» słavicca raśpieščvańniem svaich supracoŭnikaŭ i svajoj tvorčaj, volnaj atmasferaj. Sioj‑toj prychodzić siudy na pracu u pižamie, chto inšy ŭ smokinhu, mnohija pryśviačajuć pracoŭny čas ŭłasnym prajektam. Kiraŭnictva nie škaduje hrošaŭ na toje, kab radavać kalektyŭ.

Pa ŭsim budynku firmy raskidanaja bieźlič baraŭ ź biaspłatnymi łasunkami i napojami. Na biaspłatny łanč možna pajści ŭ lubuju z adzinaccaci kaviarniaŭ – indyjskaja, kitajskaja i inš. kuchni na vybar. Kab spalić źjedzienyja kałoryi, supracoŭniki majuć dobra abstalavany fitnes‑centar, biljard i masažystaŭ. I ŭsio biaspłatna. Biaspłatna možna taksama pamyć mašynu, skarystacca pralniaj ci pasłuhami dantysta.

Maładym baćkam viartajucca hrošy, jakija jany traciać na ježu pa‑za firmaj padčas pieršych tydniaŭ žyćcia svajho dziciaci, a paźniej, kali dzieci padrastuć, ich možna addać u firmovy dziciačy sadok. Haspadary chatnich žyviołaŭ mohuć brać ich z saboj na pracu.

Hetkim niezvyčajnym sacyjalnym bahaćciem supracoŭniki abaviazanyja prybytkam firmy, jakija na praciahu pieršych dzieviaci miesiacaŭ 2006 h. skłali zvyš 2 młrd. dalaraŭ. Pavodle kiraŭnictva firmy, usie hetyja vydatki apłočvajucca ź liškam, bo dziakujučy im raście pradukcyjnaść, a firma moža vybirać sapraŭdy najlepšych pracaŭnikoŭ. Štodzień «Google» atrymlivaje kala 3 tys. zajavaŭ na pracu (kala miljonu štohod).

Pra rejtynh «Fortune»

U rejtynh «Fortune» traplajuć firmy, jakija isnujuć nia mienš za 7 hod i dzie pracuje zvyš tysiačy ludziej. U minułym hodzie pieršaje miesca zajmała kalifarnijskija bijatechnalahičnaja firma «Genentech». Rejtynh stvarajecca na padstavie adkazaŭ prynamsi 400 vypadkova abranych supracoŭnikaŭ kožnaj firmy na pytańni ankiety, dasyłanaj arhanizatarami. Na dźvie trecija rejtynh zaležyć ad adkazaŭ ankiety, i na adnu treciuju ad abjektyŭnych dadzienych pra zarobki, premii, demahrafičnyja faktary i kulturu arhanizacyi, jakija pradastaŭlaje sama firma.

Najlepšyja pracadaŭcy ZŠA pavodle «Fortune»

1. Google

2. Genentech

3. Wegmans Food Markets

4. Container Store

5. Whole Foods Market

• 0
• 0
• 0
• 0
• 0
• 0
• 0
• 0