Biznesoŭcaŭ prosiać vyrablać prasy i zubačystki

Tema minimizacyi impartu pry maksimalnym naroščvańni ekspartu nabyła asablivuju aktualnaść u pieryjad kryzisu i stała hałoŭnaj temaj sieminara, jaki prajšoŭ u Žłobinie. Dziaržava choča pryciahnuć biznes da vytvorčaści spažyvieckich tavaraŭ

Sieminar byŭ pryśviečany raźvićciu impartazamiaščalnych vytvorčaściaŭ, meta jakoha — pryciahnieńnie małoha i siaredniaha biznesu da asvajeńnia vytvorčaści spažyvieckich tavaraŭ, jakija ciapier uvoziacca z-za miežaŭ krainy. Na heta vydatkoŭvajucca niemałyja srodki, i ličby pastajanna rastuć.

Letaś vydatki na impart dasiahnuli sumy 5,6 młrd dalaraŭ. Užo tady heta składała 122,3% da ŭzroŭniu papiaredniaha hoda. Za studzień-vierasień 2011 impart užo ŭźlacieŭ da 5,5 młrd dalaraŭ i vyras na 47% u paraŭnańni z anałahičnym pieryjadam 2010 hoda. Salda zamiežnaekanamičnaj dziejnaści pa-raniejšamu ŭ minusach. Situacyju na ŭnutranym rynku krychu źmiakčyŭ niadaŭni ažyjataž na charčovyja tavary, kali biełaruskaje kuplali z padvojenaj siłaj. Zrešty, uličvajučy abstaviny, jakija pryviali da takoha popytu, i «spažyvieckuju interviencyju» rasijcaŭ na asabliva «čaŭnočnym uzroŭni», naŭrad ci možna ličyć heta dasiahnieńniem markietynhavaj palityki našych vytvorcaŭ.

Homielščyna va ŭsioj hetaj statystycy, jak zaŭvažyŭ namieśnik staršyni abłvykankama Balasłaŭ Pirštuk, hladzicca dosyć niadrenna. Udzielnaja vaha impartu tavaraŭ, jaki prypadaje na rehijon, składaje ŭsiaho 2%.

— Nie spakušajciesia, — paryravaŭ ministr handlu Valancin Čakanaŭ. — Prosta vialikaja častka impartnych tavaraŭ pastupaje spačatku ŭ Minsk, a ź jaho ŭžo razychodzicca pa haradach i vioskach.

Rabić u takoj situacyi niešta treba. Dziaržava vyrašyła pryciahnuć da stvareńnia vytvorčaściaŭ, aryjentavanych na zamiaščeńnie impartu i pavieličeńnie ekspartu, pradprymalnikaŭ. Ministerstva handlu padrychtavała śpis z 399 najmieńniaŭ taho, čym jany mohuć raznastaić svoj biznes. U pieralik trapili tavary, anałahi jakich u respublicy nie vypuskajucca abo vypuskajucca ŭ niedastatkovaj kolkaści.

Kab biznesoŭcy nahladna ŭjavili maštaby patencyjnaha rynku, pierad sieminaram była arhanizavanaja vystava impartnych spažyvieckich tavaraŭ. Tolki Homielskaja vobłaść maje patrebu amal u troch tysiačach prasaŭ, bolš čym u čatyroch tysiačach elektradrylaŭ, 14 tysiačach šłanhaŭ dla źmiašalnika ŭ mietaličnaj aplotcy. U liku patencyjnych vytvorčaściaŭ — haspadarčyja tavary, instrumienty, abutak, adzieńnie, bytavaja chimija, pralnyja mašyny i mnohaje inšaje.

Zrešty, adnoj kolkaściu prablemy nie vyrašyć. Valancin Čakanaŭ pryznaŭ, što da jakaści biełaruskich tavaraŭ jość vialikija pytańni. Prytym što i košt daloka nie raduje.

Kab zrabić jakaść bolš pryvabnaj, nieabchodna istotna aptymizavać vytvorčaść. Da prykładu, upakoŭka impartnych zubačystak kaštuje 6000 rubloŭ, ajčynnych — udvaja bolš.

Va ŭradzie taksama spadziajucca, što impartazamiaščalnaja pradukcyja nie tolki zadavolić unutrany popyt, ale i budzie aryjentavanaja na ekspart.

Uvohule, «luby kapryz za vaš ekspart». Praŭda, varta ŭličyć, što ŭ struktury vydatkaŭ na impart spažyvieckija tavary zajmajuć paraŭnalna nievialikuju častku. Zatoje 70% srodkaŭ idzie na zakup enierhanośbitaŭ, syraviny i kamplektavalnikaŭ dla vytvorčaści. Davoli prablematyčna padličyć, kolki ajčynnych zubačystak treba vyrabić, kab kampiensavać vydatki na haz.

• 0
• 0
• 0
• 0
• 0
• 0
• 0
• 0