Бізнэсоўцаў просяць вырабляць прасы і зубачысткі

Тэма мінімізацыі імпарту пры максімальным нарошчванні экспарту набыла асаблівую актуальнасць у перыяд крызісу і стала галоўнай тэмай семінара, які прайшоў у Жлобіне. Дзяржава хоча прыцягнуць бізнэс да вытворчасці спажывецкіх тавараў

Семінар быў прысвечаны развіццю імпартазамяшчальных вытворчасцяў, мэта якога — прыцягненне малога і сярэдняга бізнэсу да асваення вытворчасці спажывецкіх тавараў, якія цяпер увозяцца з-за межаў краіны. На гэта выдаткоўваюцца немалыя сродкі, і лічбы пастаянна растуць.

Летась выдаткі на імпарт дасягнулі сумы 5,6 млрд даляраў. Ужо тады гэта складала 122,3% да ўзроўню папярэдняга года. За студзень-верасень 2011 імпарт ужо ўзляцеў да 5,5 млрд даляраў і вырас на 47% у параўнанні з аналагічным перыядам 2010 года. Сальда замежнаэканамічнай дзейнасці па-ранейшаму ў мінусах. Сітуацыю на ўнутраным рынку крыху змякчыў нядаўні ажыятаж на харчовыя тавары, калі беларускае куплялі з падвоенай сілай. Зрэшты, улічваючы абставіны, якія прывялі да такога попыту, і «спажывецкую інтэрвенцыю» расійцаў на асабліва «чаўночным узроўні», наўрад ці можна лічыць гэта дасягненнем маркетынгавай палітыкі нашых вытворцаў.

Гомельшчына ва ўсёй гэтай статыстыцы, як заўважыў намеснік старшыні аблвыканкама Баляслаў Пірштук, глядзіцца досыць нядрэнна. Удзельная вага імпарту тавараў, які прыпадае на рэгіён, складае ўсяго 2%.

— Не спакушайцеся, — парыраваў міністр гандлю Валянцін Чаканаў. — Проста вялікая частка імпартных тавараў паступае спачатку ў Мінск, а з яго ўжо разыходзіцца па гарадах і вёсках.

Рабіць у такой сітуацыі нешта трэба. Дзяржава вырашыла прыцягнуць да стварэння вытворчасцяў, арыентаваных на замяшчэнне імпарту і павелічэнне экспарту, прадпрымальнікаў. Міністэрства гандлю падрыхтавала спіс з 399 найменняў таго, чым яны могуць разнастаіць свой бізнэс. У пералік трапілі тавары, аналагі якіх у рэспубліцы не выпускаюцца або выпускаюцца ў недастатковай колькасці.

Каб бізнэсоўцы наглядна ўявілі маштабы патэнцыйнага рынку, перад семінарам была арганізаваная выстава імпартных спажывецкіх тавараў. Толькі Гомельская вобласць мае патрэбу амаль у трох тысячах прасаў, больш чым у чатырох тысячах электрадрыляў, 14 тысячах шлангаў для змяшальніка ў металічнай аплётцы. У ліку патэнцыйных вытворчасцяў — гаспадарчыя тавары, інструменты, абутак, адзенне, бытавая хімія, пральныя машыны і многае іншае.

Зрэшты, адной колькасцю праблемы не вырашыць. Валянцін Чаканаў прызнаў, што да якасці беларускіх тавараў ёсць вялікія пытанні. Прытым што і кошт далёка не радуе.

Каб зрабіць якасць больш прывабнай, неабходна істотна аптымізаваць вытворчасць. Да прыкладу, упакоўка імпартных зубачыстак каштуе 6000 рублёў, айчынных — удвая больш.

Ва ўрадзе таксама спадзяюцца, што імпартазамяшчальная прадукцыя не толькі задаволіць унутраны попыт, але і будзе арыентаваная на экспарт.

Увогуле, «любы капрыз за ваш экспарт». Праўда, варта ўлічыць, што ў структуры выдаткаў на імпарт спажывецкія тавары займаюць параўнальна невялікую частку. Затое 70% сродкаў ідзе на закуп энерганосьбітаў, сыравіны і камплектавальнікаў для вытворчасці. Даволі праблематычна падлічыць, колькі айчынных зубачыстак трэба вырабіць, каб кампенсаваць выдаткі на газ.

• 0
• 0
• 0
• 0
• 0
• 0
• 0
• 0