Ci chutka apazycyi pačnuć prypłočvać ź biudžetu? :)
Dziaržaŭnyja medyi raniej nie byli zaŭvažanyja ŭ papularyzacyi demakratyčnych reformaŭ. A tut raptam... Piša ŭ svaim błohu Alaksandar Kłaskoŭski.
Kazaski prezydent Nazarbajeŭ abvieściŭ pra namier demakratyzavać palityčnuju systemu. Dziela hetaha źbirajecca navat pierarabić kanstytucyju. Zrešty, niečakanaściu jość nie jahonaja rytoryka, a toje, što pra heta paviedamiła BIEŁTA.
Niejak raniej nie zaŭvažałasia, kab našyja dziaržaŭnyja medyi reklamavali demakratyčnyja reformy :)
Vypadkovaść — ci prykmieta adlihi?
Kaniešnie, eksperty lohka daviaduć vam, što aŭtarytarny kazaski lider zajmajecca butaforyjaj. Jon daŭno flirtuje z Zachadam ("lacić na dvuch kryłach":) Pa-pieršaje, intaresy biznesu. Pa-druhoje, jość ambicyjnaja meta, kab Astana atrymała praz dva hady staršynioŭstva ŭ ABSE.
Dyj uvohule — našto być izhojem? Chiba nia łaščyć samalubstva mahčymaść rehularna lotać ź nietraŭ Azii ŭ stalicy Staroha Śvietu dy być na adnoj nazie ź liderami zachodnich demakratyjaŭ?
I ŭsio ž! Varta pryznać, što azijacki palityk chacia b vykarystoŭvaje leksyku ("demakratyčnyja reformy", "palityčnaja madernizacyja"), jakaja našym kiroŭnym viarcham dasiul uvohule padavałasia, musić, tabujavanaj :)
Dy i što da sutnaści — Nazarbajeŭ prapanuje niejmavierna kramolnyja pa biełaruskich mierkach rečy. Źbirajecca, naprykład, addać parlamentaram farmavańnie Kanstytucyjnaje rady dy CVK. I navat prypłočvać apazycyi ź biudžetu! (Nu, skažam mieniej sensacyjna — finansavać partyi, što damohucca pradstaŭnictva ŭ parlamencie.)
Vypadkova nadrukavała BIEŁTA hetuju natatku ci nie — u pryncypie cikavaje pytańnie: a ci zdolnaje biełaruskaje kiraŭnictva chacia b na imitacyjnyja kroki a-la chitry Nazarbajeŭ?
Praŭładnyja strahehi peŭna ž prapanujuć i takija scenary. Ale Biełaruś nie Kazachstan. Kolki b ni hrašyli pałymianyja revalucyjanery na abyvatala, jaki dumaje straŭnikam, usio ž našaje hramadztva nie prycisnutaje takim žachlivym presam azijatčyny. Jość patencyjał.
I toje, što naviersie jak ahniu bajacca navat hameapatyčnych dozaŭ demakratyi, lišni raz davodzić: tam adčuvajuć niebiaśpieku łancuhovaj reakcyi.
Siońnia šmat što zaležyć ad pryncypovaści Eŭropy. U stasunkach z Nazarbajevym jana trochi zapluščvaje vočy. Pa-pieršaje, papraŭka na Aziju. Pa-druhoje, na bahaćcie enerharesursaŭ. Za košt Kazachstanu Brusel choča asłabić hazavuju zaležnaść ad Maskvy. Prahmatyzm, panovie!
Voś i Miensk siońnia raźličvaje, što biurhieram važniej za ŭsio, kab haz biez prablemaŭ pampavaŭsia praź Biełaruś dy spraŭna hreŭ ich utulnyja katedžy. Karaciej, palubi nas, Eŭropa, čornieńkimi, a bieleńkimi nas chto chočaš palubić...
Druhi čyńnik, na jaki raźličvajuć viarchi, — toje, što palityčnaja apazycyja i dalej budzie dyskredytavać sama siabie permanentnymi zvadkami. Dy jašče i ŭzmacniać tym samym apatyju siarod čałaviečaha resursu pieramienaŭ.
Siońnia vysoki kiraŭnik moža artystyčna raźvieści rukami. Dyjaloh? Kruhły stoł? Ź kim? Šmathałovaja istota ADS prynamsi apošni hod tolki i skubiecca sama z saboj.
Siońnia subjekty kaalicyi viaduć miž saboj pieramovy nie raŭnujučy jak "Fatach" z "Chamasam" :)
Im kali i prypłočvać ź biudžetu, dyk chiba za talenavitaje vypuskańnie pary ŭ śvistok! :)
Kamientary