Minsielhascharč: Śviniej u Navahrudskim rajonie źniščyli ŭ ramkach vučeńniaŭ
Takim čynam adpaviednyja słužby vučylisia zmahacca z afrykanskaj čumoj śviniej.
Ministerstva sielskaj haspadarki i charču ŭ aŭtorak raźmiaściła na svaim sajcie aficyjnuju infarmacyju pra dziejańni sanitarnych słužbaŭ u Navahrudskim rajonie.
Raniej źjaviłasia infarmacyja, što ŭ vioscy Niaznanava Navahrudskaha rajona sanitarnyja słužby źniščyli śviniej z pryvatnych padvorkaŭ. Nibyta, u vioscy była vyjaŭlenaja afrykanskaja čuma śviniej.
Śviniej spalili — akurat tak zmahajucca z čumoj.Viaskoŭcy paviedamili žurnalistam, što im pačali vypłočvać kampiensacyju z raźliku 15 tysiač rubloŭ za kiłahram.
Z paviedamleńnia ministerstva vynikaje, što
«na terytoryi Navahrudskaha i Karelickaha rajonaŭ Hrodzienskaj vobłaści 16—18 lutaha 2012 hoda byli praviedzieny rehijanalnyja vučeńni ŭ režymie maksimalna nabližanaj da realnych umoŭ abstanoŭki, z prymianieńniem efiektu niečakanaści i adpracoŭkaj ŭsich kankretnych dziejańniaŭ i prafiłaktyčnych mierapryjemstvaŭ».
Adnym z asnoŭnych patrabavańniaŭ ministerstva i Departamienta vieterynarnaha i charčovaha nahladu da kiraŭnikoŭ miascovych orhanaŭ ułady źjaŭlajecca arhanizacyja i praviadzieńnie abłasnych i rehijanalnych vučeńniaŭ pa adpracoŭcy dziejańniaŭ terminovaha reahavańnia na vypadak uźniknieńnia zachvorvańniaŭ. «Praktyka praviadzieńnia takoha rodu vučeńniaŭ rekamiendavana Mižnarodnym epizaatyčnym biuro», — havorycca ŭ paviedamleńni ministerstva.
Varta adznačyć, što
aficyjnyja tłumačeńni ministerstva źjavilisia praź piać dzion paśla vučeńniaŭ na Navahrudčynie.Da hetaha času ni pradstaŭniki miascovych uładaŭ, ni supracoŭniki vieterynarnych ustanovaŭ, ni čynoŭniki ministerstva nie kamientavali situacyju. Tak, karespandentu «NN» va ŭpraŭleńni sielskaj haspadarki rajvykankama supracoŭnica zajaviła: «Ja nie śpiecyjalist. Zvanicie načalniku albo ŭ vietlačebnicu». Supracoŭnik rajonnaj vietstancyi paviedamiŭ , što «nie maje takoj infarmacyi, u nas u rajonie ŭsio dobra».
Maŭčańnie ŭładaŭ pryviało da paničnych nastojaŭ siarod viaskoŭcaŭ.Jak paviedamili «NN» žychary abodvuch rajonaŭ pačali rezać śviniej, nie čakajučy haściej ź vietsłužby. Karcina była fantasmaharyčnaja.
Jedzieš pad Navahrudkam – u kožnaj vioscy smalać kabanoŭ.Ludzi ŭ razhublenaści — kali heta byli vučeńni, to navošta było zabivać i spalvać śviniej.
Pa nieaficyjnaj infarmacyi, supracoŭnikam adnaho sa śvinakompleksaŭ u Karelickim rajonie pad pahrozaj zvalnieńnia zahadali źvieści z pryvatnych padvorkaŭ śviniej.
Žychary Niaznanava raspaŭsiudžvajuć čutku, što z vosieni ŭ adnaho ź miascovych fiermieraŭ sapraŭdy adbyłasia pamorka na śvińni, ale haspadar nikudy nie źviartaŭsia, a śviniej zakapaŭ.I što, maŭlaŭ, kali analizy paćvierdziać fakt afrykanskaj čumy, to, pavodle normaŭ, śviniej pryjdziecca spalić u radyusie 30 kiłamietraŭ vakoł.
Zahadkavaści historyi dadaje i toj fakt, što ŭ aŭtorak ź Niaznanava supracoŭniki milicyi vydalili žurnalistaŭ, jakija pryjechali rabić tudy repartaž.Jak paviedamlaje «Salidarnaść», pad razdaču trapiŭ i ich fotakarespandent Siarhiej Bałaj. Jon raskazaŭ, što ŭ vioscy adbyvajucca dziŭnyja rečy. Miascovyja žychary paźbiahali žurnalistaŭ. U vioscy na toj momant adbyvałasia dezinfiekcyja padvorkaŭ.
Nieŭzabavie padjechali niekalki milicejskich aŭto z Navahrudka. Dvoje padpałkoŭnikaŭ zajavili, što na terytoryi, dzie pravodziacca vučeńni, žurnalistam znachodzicca nielha.Fotazdymki prymusili vydalić.
Na pytańnie, što za vučeńni i na jakoj terytoryi jany prachodziać, prahučaŭ adkaz, što heta zasakrečanaja infarmacyja.
Z razmoŭ ź niekatorymi viaskoŭcami reparcioram ŭsio ž taki ŭdałosia vyśvietlić, što ŭ minułuju piatnicu na padvorki pryjazdžali supracoŭniki vietstancyi i milicyi, źbivali zamki, zabivali śviniej i vyvozili. Heta adbyvałasia, u tym liku, i ŭ adsutnaść haspadaroŭ.
Vylecieła ŭ nieviadomym kirunku śpikierka KR Anžalika Mielnikava30
Kamientary