Da 5000 čałaviek vyjšli na Dzień Voli ŭ Minsku

Ciahniki nie spynialisia na Akademii navuk, siek viecier i doždž. Niahledziačy na zastrašvańnie, ludzi roznych pakaleńniaŭ u roŭnaj kolkaści: maładyja, siaredniaha pakaleńnia, stałaha vieku — vyjšli na šeście ŭ honar Dnia Voli. Była narodnaja tvorčaść: ludzi pryjšli ź dziasiatkami samarobnych płakataŭ. Akcyja była samaj masavaj ad časoŭ Płoščy 2010 hoda. Takoha šmatlikaha Dnia Voli nie było ad 2007 hoda. Łukašenkaŭcy rabili drobnyja paskudstvy: nie prapuścili na mitynh mašynu z hukaŭzmacnieńniem, jakuju raniej harvykankam uzhadniŭ, demanstratyŭna filmavali sabranych na videa. Ludzi skandavali: «Nie być skotam!»

16:30

Milicyja daje ličbu 700 udzielnikaŭ. Pry hetym łukašenkaŭskaje ž ahienctva «Interfaks» daje ličbu 1500 čałaviek. Aficyjnaje ahienctva BiełTA piša pra «niekalki socień». Karespandent zastaŭsia ananimnym. :)

15:45

Akcyja abviaščajecca skončanaj, ludzi razychodziacca.

15:30

Zastałosia čałaviek 300.

Vystupili Viktar Ivaškievič i Vital Rymašeŭski. Jany zaklikali da bajkotu vybaraŭ. A voś Viktar Karniajenka, naavarot, zaklikaŭ da aktyŭnaha nazirańnia na vybarach, na što ź mitynhu stali skandavać: «Baj-kot!».

Vystupiŭ staršynia Partyi BNF Alaksiej Janukievič, jaki zaklikaŭ trymacca Rady BNR, a nie stvarać novy ŭrad u emihracyi.

Vystupiŭ Alaksandr Milinkievič, jaki zajaviŭ, što ŭ nas nie pavinna być nijakaj ideałohii, aproč nacyjanalnaj.

Vystupiŭ Uładzimir Chalip, jaki zajaviŭ, što svaboda ŭ Biełaruś pryjdzie znutry.

15:19

Vystupiła žonka Siarhieja Kavalenki Alena. Jana źviarnułasia da Łukašenki, kab toj prajaviŭ miłasernaść i vypuściŭ muža z turmy.

Źbirajecca vystupać Vajciuškievič.

15:17

Pačaŭsia mitynh. Pieršym vystupiŭ Uładzimir Kołas, druhim — mastak Alaksiej Maračkin, jaki začytaŭ zvarot staršyni Rady BNR Ivonki Surviły. Ludzi skandujuć «Svabodu» Siarhieju Kavalenku.

Na mitynh za turnikiety pajšła prykładna pałova ŭdzielnikaŭ šeścia. Astatnija zastalisia vakoł, kab nie prachodzić praź videakamiery.

14:51

Na Banhałory niama nijakich stacyjanarnych mietałašukalnikaŭ, ahladajuć vybaračna z ručnymi mietałašukalnikami. Prapuskajuć sa ściahami. mnoha brudu pad nahami.

Na płoščy ŭžo kala 300–400 čałaviek, častka ludziej syšła.

Ludzi fatahrafujucca na fonie ściahoŭ. Na scenie visić bieł-čyrvona-bieły ściah. Raskazvajuć, što, jak zaŭsiody, na mitynh śpiecnazaŭcy nie puścili aparaturu. Jana była apłačana pa damoŭlenaści z harvykankamam, ale śpiecnazaŭcy na padychodzie aparaturu nie puścili. Pryjdziecca praź miehafon pramaŭlać.

14:46

Hałava kałony dajšła da placoŭki ŭ parku, chvost za Makdonaldsam.

14:27

Hałava kałony dajšła amal da rłoščy Banhałor, usio cicha-mirna, biez pravakacyj, z-za taho, što vuzkija chodniki, kałona mocna raściahnułasia. Ludzi skandujuć: «Kroŭju, potam, nie być skotam!».

Kolkaść udzielnikaŭ možna acanić na piać tysiač.

14:20

Dałučylisia da šeścia hiei i leśbijanki, padniali svaje ściahi i bieł-čyrvona-biełyja ściahi.

14:14

Apošnija ŭdzielniki pierachodziać praz praśpiekt. Vialiki zator z aŭto, na Surhanava niechta z bałkona vyviesiŭ bieł-čyrvona-bieły ściah. Hałava kałony amal dajšła da vulicy Jakuba Kołasa. Ludzi iduć chodnikami, za paradkam sočyć jak milicyja, tak i družyńniki ŭdzielnikaŭ šeścia.

14:03

Pačatak kałony ŭžo dajšoŭ da Surhanava, chvost jašče na placoŭcy pierad AN. Ludzi pierasiakajuć praśpiekt prajeznaj častkaj. Ruch aŭtamabilaŭ dla ich pierakryli.

Udzielničaje da piaci tysiač čałaviek.

13:57

Pačynajecca šeście. Napieradzie — namieśnik načalnika minskaj milicyi Ihar Jaŭsiejeŭ i Chazałbiek Atabiekaŭ — kamandzir śpiecyjalnaj bryhady ŭnutranych vojskaŭ Uručča, uklučany dniami ŭ čorny śpis ES. Ale jon siońnia ŭ džynsach.

Ruch pačaŭsia. Pajšoŭ mocny doždž, siače viecier.

13:54

Rychtujecca šeście, užo bolej za 3 tysiačy čałaviek na placoŭcy.

Prykładna pałova ihnaravała ramki, staić na chodnikach vielmi mnoha płakataŭ.

Pryjšli lidar Ruchu za Svabodu Alaksandr Milinkievič, Ina Kulej, Viktar Karniajenka, lidar «Spraviadlivaha śvietu» Siarhiej Kalakin. Nie vidać kiraŭniki «Havary praŭdu» — moža, dzie ŭ adjeździe. Prysutnyja Alaksiej Janukievič, Anatol Labiedźka. Šmatlikija dziejačy kultury: ad Alesia Navaryča da Jazepa Januškieviča, narodnaja artystka Biełarusi Zinaida Bandarenka z mužam, fiłosaf Valer Bułhakaŭ z žonkaj, mastak Alaksiej Maračkin, archieołah Lavon Kaladzinski, skulptar Hienik Łojka.

Vystupiŭ Uładzimir Kołas, skazaŭ, što zaraz budzie farmavacca kałona dla pachodu na Banhałor, papiaredziŭ, kab ludzi abaviazkova išli pa tratuary (chodnikach), kab vykanać damoŭlenaść ź milicyjaj.

13:44

Na prystupkach źjaviłasia raściažka «Svabodu Bandarenku!» Maładafrontaŭcy apranuli majki z nadpisami «Svabodu Daškieviču!» i «Svabodu Łobavu!»

13:39

Pierastali spyniacca ciahniki mietro na Akademii navuk.

Jość ściahi Chryścijanskaj demakratyi, Maładyja demakrataŭ, ściah KCHP — BNF.

Ludzi roznych pakaleńniaŭ u roŭnaj kolkaści: maładyja, siaredniaha pakaleńnia, stałaha vieku.

Mašyny, što jeduć praśpiektam, sihnalać. Ludzi skandujuć «Žyvie Biełaruś».

13:30

Vystupiŭ Uładzimir Kołas (adzin z zajaŭnikaŭ akcyi). Jon skazaŭ, što šeście pačniecca, a 14-j, a pakul prapanavaŭ hutaryć i śviatkavać.

Ludziej vielmi šmat, pad dźvie tysiačy čałaviek, usie stajać ščylna, niama dzie jabłyku ŭpaści.

Pryjšoŭ eks-kandydat u prezidenty (ad BCHD) Vital Rymašeŭski.

13:26

Ludzi z dematyvatarami źjavilisia: «ŠOS» (z padrabiaznaj rasšyfroŭkaj kožnaha słova), «Łukašenka — łudak», «Łukašenka, chutka sustreniešsia z Kadafi». Hetyja dematyvatary prynieśli, kažuć, maładafrontaŭcy.

13:21

Ludziej usio boleje. Źjavilisia płakaty: «Łukašenka — heta tupik», «Dzie maje 500 dalaraŭ?», «Hdie dieńhi», «Svobodu politzaklučionnym», ludzi hukajuć «Žyvie Biełaruś».

Žonka palitviaźnia Siarhieja Kavalenki Alena Kavalenki pryjšła z płakatam «Svabodu pamirajučamu».

Nacyjanał-balšaviki razdajuć ulotki «Čamu tak kiepska žyviom». Siabry Kansiervatyŭna-chryścijanskaj partyi razdajuć ulotki za bajkot vybaraŭ. Napružańnie ŭ pavietry adčuvajecca, ale ściahoŭ niamała.

13:16

Čałaviek užo 500, placoŭka ščylna zapoŭniena. Pryjšoŭ baćka Iryny Chalip — Uładzimir Chalip, hraf Prušynski vitajecca sa śpiecnazaŭcami. Pryjšoŭ eks-kandydat u prezidenty Ryhor Kastusioŭ.

Kala 50 čałaviek stajać za aharodžami i nie zachodziać na zbor.

Žančyny śpiavajuć biełaruskija pieśni.

13:07

Ludziej usio boleje, pajšoŭ doždž, navat mokry śnieh. Mnoha bieł-čyrvona-bieły ściahoŭ, šmat ściahoŭ Jeŭrasajuza. Niejki chłopiec chadziŭ z kardonkaj «fak kremlin», jaho ŭsie fatahrafavali.

400 čałaviek kala Akademii navuk. Nastroj u bolšaści pazityŭny.

13:01

Źjavilisia try bieł-čyrvona-biełyja ściahi. Jość bieł-čyrvona-biełyja parasony. Ludziej prapuskajuć praź mietaličnyja ramki (ale chto paśpieŭ, dajšoŭ da prezidyuma biez prachodžańnia).

Pryjšoŭ staršynia arhkamiteta Uładzimir Kołas — jon prahulvajecca pad bieł-čyrvona-biełym ściaham, palityk Viktar Ivaškievič daje intervju.

Sabrałasia ŭžo kala 200 čałaviek.

12:54

Kala Akademii navuk, pierad prezidyumam, užo sabrałasia kala 150 čałaviek, ściahoŭ pakul niama. Śpiecnaz pačynaje stavić mietaličnyja turnikiety.

Ź viadomych ludziej pakul nikoha niama. Pryjšoŭ bard Andrej Mielnikaŭ.

12:52

Kala Banhałora stajać milicejskija patruli, pakul abstanoŭka spakojnaja ŭ horadzie.

12:42

Nadvorje mianiajecca, zaźziała sonca, jakoje prahnała chmary preč. Nad Minskam — amal biazvobłačnaje nieba.

12:39

Na skryžavańni vulicy Surhanava i praśpiekta Niezaležnaści — uzmocnieny kantrol DAI, daišniki ŭ cyvilnym vybaračna spyniajuć kiroŭcaŭ i praviarajuć dakumienty.

12:15

Milicyja pačała aharodžvać placoŭku dla mitynhu ŭ parku Družby narodaŭ kala płoščy Banhałor, paviedamlaje Radyjo Svaboda

11:52

U rajon Akademii navuk skiravalisia pieršyja samotnyja aŭtazaki.

Nadvorje, praŭda, siońnia nie nadta šmataabiacalnaje. Prajšoŭ śnieh, abiacajuć mocny viecier. Tempieratura pavietra ŭ rajonie +5–7 hradusaŭ.

***

Analityki nazyvajuć heta vynikam cisku Jeŭrasajuza: upieršyniu ad času Płoščy ŭłady dazvolili manifiestacyju ŭ centry Minska.

«Nie budzie nijakich pieraškodaŭ u vykarystańni nacyjanalnaj simvoliki», — paviedamiŭ Viktar Ivaškievič. «Hetaja data pavinna jadnać nas usich», — dadaje Uładzimir Kołas.

Što takoje Dzień Voli?

Niezaležnaść Biełaruskaj Narodnaj Respubliki była abjaŭlena ŭ noč z 24 na 25 sakavika 1918 u Minsku. Hety dzień z časam atrymaŭ nazvu Dzień Voli. Pačynajučy z kanca 1980-ch, u Minsku jaho adznačajuć masavymi vuličnymi manifiestacyjami. Jany jadnajuć roznyja palityčnyja siły, što vystupajuć za niezaležnaść, demakratyju i jeŭrapiejski vybar.

* * *

Dzień Voli ŭ śviecie

Maskva. Sustreča sa Skurko i vystup Vajciuškieviča

Maskoŭskaje tavarystva biełaruskaj kultury imia Franciška Skaryny zaprašaje na sustreču z Andrejem Skurko, redaktaram «Našaj Nivy». Śpiavać budzie Źmicier Vajciuškievič. Pa zakančeńni mierapryjemstva — siabroŭskaja viačera ŭ kaviarni «Biełaja Ruś». 24 sakavika, a 13.00, Rasijskaja dziaržaŭnaja biblijateka, Vazdźvižanka, 5/3.

Ńju-Džersi. Bankiet biełarusaŭ ZŠA

Biełarusy Amieryki źjeducca na Dzień Voli ŭ Ńju-Branśvik (štat Ńju-Džersi). Uračystaja Akademija, bankiet i kancert adbuducca 25 sakavika, a 12.30 u Garden State Ballroom hatela Hyatt Regency pa adrasie: 2 Albany Street, New Brunswick, New Jersey. Pierad imprezaj, a 10-j ranicy adbudziecca Śviatoje Nabaženstva ŭ Carkvie Sv. Maci Božaj Žyrovickaj u Highland Park. Kvitki pa zamovie: $55 darosłym, $45 studentam. Kvitki pry dźviarach: $65 darosłym, $55 studentam.

Vilnia. Biełaruski tydzień

Imprezy projduć u Sojmie i Ratušy. A 25 sakavika, a 12-j na mohiłkach Rosy i Lipoŭka adbudziecca ŭskładańnie kvietak na mahiły padpisantaŭ Akta ab abviaščeńni niezaležnaści BNR. A 13-j startuje śviatočny aŭtaprabieh pa Vilni i da litoŭska-biełaruskaj miažy.

Miunster. Biełarusy Niamieččyny śviatkujuć da ŭpadu

«Mierapryjemstva pačniecca 24 sakavika (subota) a 19.00 i da ŭpadu», — pišuć u abviestcy biełarusy Niamieččyny. — Śviata adbudziecca ŭ chatniaj atmaśfiery, płanujecca śviatočny stoł, biełaruskaja muzyka i śpievy. U sustrečy ŭžo paćvierdzili ŭdzieł biełarusy z Kila, Hanoviera, Bierlina, Talina i Miunstera.

Biełastok. Malebien i kancert

Liturhija i malebien projduć u carkvie Ahija Safija na vulicy Traviastaj, a 10-j hadzinie. A 14-j — pakaz filma i kancert u Domie kultury «Spodki» na vulicy Śviatoha Rocha.

Varšava. Biełaruskaja mara

Biełarusy Varšavy adznačać Dzień Voli biełaruskaj imšoj, a taksama pakazam filma «Biełaruskaja mara» i kancertam Paliny Respubliki. Impreza adbudziecca ŭ kłubie «Pracoŭnia» (Papiałuški, 16).

• 0
• 0
• 0
• 0
• 0
• 0
• 0
• 0