Biełaruskija hateli ŭ 2011 h. byli zapoŭnieny na 40%

Siaredniaja zahruzka biełaruskich hatelaŭ u 2011 hodzie źniziłasia na 4% u paraŭnańni z 2010 hodam i skłała 41%.

Jak paviedamlaje aficyjny sajt Nacyjanalnaha statystyčnaha kamiteta, hatelnyja pasłuhi prapanoŭvali 317 hatelaŭ, 24 hatelnyja kompleksy, vosiem turyscka-hatelnych kompleksaŭ, dva mateli i 93 inšyja abjekty. Ich adnačasovaja ŭmiaščalnaść na kaniec 2011 hoda skłała 29 tys. miescaŭ.

Mižnarodnuju katehoryju kłasifikacyi pa zorkach majuć tolki 26 hatelaŭ i vosiem hatelnych kompleksaŭ.

U 2011 hodzie ŭ hatelach i anałahičnych srodkach raźmiaščeńnia pražyvali 1 młn. 738 tys. čałaviek. Heta na 6,5% bolš, čym u 2010 hodzie. Ź ich kolkaść hramadzian Biełarusi skłała 1 młn. 144,2 tys., hramadzian inšych dziaržaŭ — 593,8 tys., u tym liku krain SND — 440,3 tys.

Siarod hramadzian krain SND, jakija pakarystalisia pasłuhami hatelaŭ i anałahičnych srodkaŭ raźmiaščeńnia, pieravažali hramadzianie Rasii i Ukrainy. Ich dola ŭ ahulnaj kolkaści raźmieščanych zamiežnych hramadzian skłała 69%.

Siarod žycharoŭ dalokaha zamiežža 48% składali hramadzianie Hiermanii, Italii, Łatvii, Litvy, Polščy.

Siaredniaja praciahłaść znachodžańnia adnaho čałavieka ŭ hatelach u 2011 hodzie, jak i na praciahu piaci minułych hadoŭ, skłała ŭ siarednim 2,5 sutak.

Biełstat paviedamlaje, što na terytoryi Biełarusi ŭ 2011 hodzie pracavała 421 sanatorna-kurortnaja i azdaraŭlenčaja arhanizacyja, u tym liku 93 bazy adpačynku, 73 sanatoryi, 22 azdaraŭlenčyja centry, 19 turystyčnych baz, 13 dziciačych reabilitacyjna-azdaraŭlenčych centraŭ, šeść turyscka-azdaraŭlenčych kompleksaŭ, try damy adpačynku i adzin pansijanat.

U sanatorna-kurortnych i azdaraŭlenčych arhanizacyjach u 2011 hodzie było raźmieščana 813,3 tys. čałaviek. Heta na 102,7 tys. bolš, čym u 2010 hodzie.

U ahulnaj kolkaści naviedvalnikaŭ sanatorna-kurortnych i azdaraŭlenčych arhanizacyj hramadzianie Biełarusi skłali 77%, ź ich 29% — dzieci da 18 hadoŭ.

U 2011 hodzie na terytoryi Biełarusi ažyćciaŭlali dziejnaść 1 tys. 576 subjektaŭ ahraekaturyzmu. Heta na 329 subjektaŭ bolš, čym u 2010 hodzie. Kolkaść turystaŭ, jakija pakarystalisia pasłuhami ahraekaturyzmu za 2011 hod, skłała 145 tys. Heta na 21,5% bolš, čym u 2010 hodzie. Hramadzianie Biełarusi ŭ ahulnaj kolkaści ahraekaturystaŭ skłali 85%. Siaredniaja praciahłaść znachodžańnia turystaŭ u ahraekasiadzibach u 2011 hodzie skłała 7,2 dni i ŭ paraŭnańni z 2010 hodam pavialičyłasia amal u try razy.

• 0
• 0
• 0
• 0
• 0
• 0
• 0
• 0