ZŠA padtrymlivajuć uzmacnieńnie sankcyj Jeŭrasajuza suprać Biełarusi i zaklikajuć Mižnarodnuju fiederacyju chakieja «prypynić płan praviadzieńnia čempijanatu śvietu pa chakiei 2014 hoda ŭ Minsku». Pra heta zajavili BiełaPAN u pasolstvie Złučanych Štataŭ Amieryki.
«My vitajem rašeńnie ES ad 23 sakavika ab pašyreńni sankcyj. Złučanyja Štaty salidarnyja z partniorami ź Jeŭrapiejskaha sajuza i padtrymlivajuć ich zaklik da Biełarusi spynić represii ŭ dačynieńni da hramadzianskaj supolnaści i demakratyčnaj apazicyi», — zaznačyli ŭ pasolstvie ZŠA.
«Pieršym krokam u hetym kirunku pavinna stać nieadkładnaje vyzvaleńnie i reabilitacyja ŭsich palityčnych źniavolenych, i my ciesna kaardynujem našy dziejańni ŭ adkaz na praciah pieraśledu», — padkreślili ŭ dyppradstaŭnictvie.
Pasolstva ZŠA adznačaje, što
«sankcyi skiravany nie suprać naroda Biełarusi, a suprać tych, chto niasie adkaznaść za praciah zadušeńnia asnoŭnych svabod paśla prezidenckich vybaraŭ 2010 hoda».
Adznačajecca taksama, što «i ZŠA, i ES pavialičyli padtrymku biełaruskaha naroda ŭ jaho pamknieńni pabudavać sučasnaje, demakratyčnaje i praćvitajučaje hramadstva».
U dyppradstaŭnictvie nahadvajuć, što Akt ab demakratyi ŭ Biełarusi, pryniaty kanhresam ZŠA ŭ śniežni 2011 hoda i padpisany prezidentam Barakam Abamam u studzieni 2012 hoda, «zaklikaje Mižnarodnuju fiederacyju chakieja prypynić płan praviadzieńnia čempijanatu śvietu pa chakiei 2014 hoda ŭ Minsku da taho času, pakul urad Biełarusi nie vyzvalić usich palitźniavolenych».
U toj ža čas «pasolstva ličyć za lepšaje nie rabić mierkavańniaŭ» adnosna mahčymaści bajkotu zbornaj ZŠA čempijanatu śvietu 2014 hoda, kali jon projdzie ŭ Minsku.
Kamientary